那些年 ~ 我們一起再次到訪的台北 Day-3h 第十七回 烏來「美人湯溫泉會館」

2012年7月10日(TUE)

上文講到我哋喺平溪沿線玩得非常開心，尤其是最尾嗰兩站，分別喺有「天燈之鄉」稱號嘅平溪放許願天燈，甚有意思，繼而走訪台灣最幸福的車站「菁銅車站」，十分古色古香嘅懷舊鄉鎮。接近傍晚19:00 我哋就要離開新北市瑞芳區，接著轉移到另一個區間，車子現正在漆黑的公路上飛馳，各人都襯這一段時間小睡片刻，我亦都爭取時間唞吓先ZZZZ.......等陣見！

 

時間係晚上20：30，旅遊車就剛好抵達我們今晚入住嘅溫泉酒店，這酒店名為「美人湯」溫泉會館，位處新北市烏來區的半山之上，環境較為優靜，係agent 極力推介，都上過佢哋個網 : http://www.beautyspa.com.tw/

 

睇過吓，係距離烏來老街遠咗小小，但其他觀感都算OK吖...

 

起初仲擔心咁熱嘅天氣浸溫泉有無搞錯，但係在落車呢一刻這擔心就完全消失了，可能係酒店位於半山關係，氣溫較山下低，仲不時有陣陣涼風吹致，感覺非常舒服，「美人湯」溫泉會館非大型旅館，樓高四層，大概有二十間客房及十四間湯房，但牆上告示話我知一個都幾壞嘅消息，就係接駁至老街的專車即日停止服務，不過......如果要落老街遊玩，可洽櫃檯代call計程車服務，不便之處敬請原諒！...........睇完冇哂嘢講 ( 頂你個肺 )........

咁就快手快腳喺櫃檯搞掂埋啲Check in 手續先，都係佢兩個醒目，不知何時已經坐咗喺大堂梳化度吹陶笛，睇佢咃幾咁優遊自在，我哋全團Book咗四間附設私人風呂嘅套房，櫃檯位大姐話所有房間都設於四樓頂層，咁咪問佢電梯在那兒呢，她只簡單地回答了一個字.......無！唔係化！咁即係話要自己搬行李上房，乜咁大整古呀！！！

幾經辛苦先爬到上四樓，這裡房間唔多，我哋全層包哂，好心急呀入房睇吓先，我哋呢間係歐風庭園雙人客房，夏天淡季都要成HK$900 一晚，房內一般設備有齊，15坪King Size大床一張，這些都係其次，重點係房間對出露台這兩個開放式私人湯池，連沖涼嘅地方都喺埋嚟度，認真夠哂無開放，真係想即刻跳落去浸呀...........

較為大啲嗰個係溫泉熱水池，可同時容納我哋一家人浸浴，細啲長方形嗰個係凍水池，可自行調節溫泉水溫度，咁梗係即刻開大個熱水放滿一池先，清潔消吓毒先啦，等我哋食完飯翻呢，就立即可以有得浸囉，係咪好醒呢...

話得係歐陸庭園，喺露台處又點能夠唔擺番套歐洲式檯凳呢，係露台望出去有燈光嗰處就係烏來老街嘞，唔知行落去有幾遠呢！

原來係得頂層呢幾間房至有露天風呂咋，我哋間房就喺「美人湯」個招牌下面，牆後面就係何老闆間和風庭園四人套房，大過我哋間好多架，要HK$1200 先有交易，咁就梗係要過去八吓啦，不過唔記得拍照....sorry 冇相畀他哋睇添.........

 

各人約定21:00喺大堂集合，本來諗住call 車落老街食飯，但係何老闆話大家都非常攰不如唔好落去，況且老街啲食店又唔知收咗檔未，不如問吓阿姐附近有冇嘢食，這位阿姐非常爽快，即刻帶我哋行去這間食山地菜嘅舖頭，餐廳主打係食泰雅族山溪產食品，係泰雅原住民開設嘅店舖，好明顯這位阿姐都係泰雅族人啦！

 

餐廳佈置得好有民族特色，但係只得我哋一檯客，所以今晚我哋又係包場，餐廳仲有自家製小米酒發售，每瓶NT$200！

可能係整日舟車勞動嘅關係，各人一面倦容般在此間表露無遺，仲好似話有團友感到些少唔舒服添，所以都冇乜特別考究，求其嗌咗幾味地道菜食飽就算咯！呢幾味都係泰雅阿姐推介嘅山地菜式，泰雅放山雞、炒山豬肉、炸溪蝦、山地蔥蛋，同埋炒野菜，碟炒麵係畀小朋友食嘅。

 

講真吖....全餐飯係隻放山雞較為惹味，感覺泰雅菜食落認真麻麻，又或者係呢間餐廳麻麻啦，咁就不得而知喇！

餐飯好快就食完，這處山區冇乜地方好去，見餐廳對面有間便利店，咪走入去買啲嘢做夜消都好吖........ 之後就馬上返回酒店浸溫泉啦喂！

番到房囡囡就最心急，話要即刻浸溫泉，媽咪怕咗佢即刻幫佢換套泳衣先，始終都驚浴池唔係咁乾淨，著番件泳衣穩陣啲好，因為阿囡係第一次浸溫泉，所以覺得非常新奇，我叫佢浸一陣熱水池如果覺得好熱，就轉過去浸吓凍水，之後又再浸番熱水，如此這般使皮膚擴張收縮，效果真係好舒服架，又可以瞬間消除疲勞，阿囡佢就樂此不疲，來來回回不下唔知幾多次，睇佢玩得幾興奮吖........

媽咪話遲啲先落嚟浸喎，咁冇計啦，這刻就輪到親子浸浴時間啦，各位唔好誤會呀，我有著泳褲架！浸浸吓有啲肚餓添，咁就整熱個杯麵，開埋罐啤酒，實行邊浸邊食麵，囡囡都話超滿足呀..........

 

此間涼風陣陣，能泡於熱熱的溫泉中，食住麵享受浸溫泉這種樂趣我都係第一次，真係超正嘅感受，之後食完麵再浸多陣，媽咪就同囡囡沖涼瞓覺先，我呢啲夜鬼又點會咁早瞓呀，攞住罐啤酒，坐喺露台處嘆吓烏來夜色，確係人生一大快事呀...........
待續........................

第三日行程終於順利地完成，緊接嘅第四日亦即係最後一天行程係玩啲乜，梗唔話畀你哋知住啦，賣個關子嗎！不過可以透露多少嘅，就係同瀑布有關嘅，想知係乜咪繼續睇埋落去囉..............

再見.................

 

 這篇文章曾於故居內發表 :  http://blog.yahoo.com/andygundam/articles/page/1