何家三友的生活點滴: 那些年 ~ 我們一起再次到訪的台北 Day-3a 第十回「再訪~悲情城市~九份」上卷

2012年7月10日(TUE)

唔好意思....

個台灣遊記停咗一排，皆因近期比較多嘢搞，現階段應該可以正常番！咁就繼續唔好畀佢停啦....去片....

今日係7月10 號星期二，亦即係進入台北旅遊的第三日，今早一覺醒來，火速彈起身，今次叻仔喇，比太太仲早啲啲，點解咁醒精呢，因為今天行程相當緊密，還須要執拾行妝，皆因今日要離開連宿兩晚的捷絲旅酒店喇，跟手高速梳洗完畢，之後呀囡同媽咪都相繼搞掂，跟住就重複噚日早上所做過嘅嘢，咪係落四樓食早餐，同樣嘅早餐，亦係同樣嘅用餐時間完成，今日約咗私機黃大哥09：00喺酒店大堂接我哋，佢都相當準時，我哋好快手就將啲行李擺哂上車，舉頭望吓個天，佈滿藍天白雲，可想而知氣溫一樣係咁火熱，大概38度左右，雖然係熱咗啲，咁都總好過落雨嘅，因為今天我哋大部份時間都會喺室外活動，咁就一於少理，向我哋今日嘅行程第一站九份出發喇....

話明今日係會好熱架嗎，所以我哋都準備咗大量食水飲料，咪等陣間學人哋中暑就無謂啦..........嘻嘻

路面交通一切順暢，用咗大約50分鐘就到達新北市瑞芳區的九份，九份是位於台灣的東北部，臨山靠海，與基隆山遙遙相望，整個小鎮座落於山坡之上，也因此形成了獨特的山坡階梯式建築景觀。早期的九份是盛產金礦而興盛，及至礦坑挖掘殆盡後從而沒落。直到1990年後因電影《悲情城市》一片於九份取景，使得九份獨特的舊式建築與風情，透過此片而吸引國內外的注目，亦為此地區重新帶來生機，目前已經成為一個極受歡迎的觀光景區喇！

當一落車就見到呢個指示牌，十年前的那般感覺，隨即浮現腦海之中，真的要概嘆一聲，老友記.....我哋又見面喇......

約定私機中午12：00左右回來接番我哋，咁就立即開始遊覽這個有《悲情城市》之美譽的九份黃金舊山城區喇，九份老街的懷舊景區最吸引的主要聚集在基山街、豎崎路及輕便路等街道一帶，咁我哋就由7-11便利店這裡基山街口開始進發！

基山街又有「九份老街」之稱，是九份最熱鬧的街道，由於這裏曾是民眾夜晚常聚之處，所以在過去又稱「暗街」，這裡無論是平日或假日皆有絡繹不絕的擠擁人潮架，不過今天可能是平日及早上嘅關係，人流唔算太多，所以行得好舒服，九份傳統魚丸店「張記」之賣點係 (超巨型魚丸)，而九份魚丸伯仔店就有逾60年歷史的老店，這兩間魚蛋檔都非常馳名，不過最終都冇幫襯喎，因為食咗早餐個肚仲係好飽.....真係失敗......