何家三友的生活點滴: 那些年 ~ 我們一起再次到訪的台北 Day-3d 第十三回基隆 ~ 碧砂漁港(火都嚟埋)海鮮午餐

2012年7月10日(TUE)

基隆市的碧砂漁港是著名的觀光漁市，市場內劃分成兩棟主要長形建築物，分別是「漁市場」和「飲食街」。漁市場內匯集了數十家新鮮海產店，供應各式各樣漁產，從遠洋、近海、沿岸、養殖應有盡有。旁邊的飲食街除可在店內點菜外，也可將選購之海產交給店家代為料理。碧砂漁港為基隆新興的漁港，發展方向以休閒觀光為主，是目前政府極力發展海上觀光業的一處主力港口。

喺金瓜石過去基隆碧砂漁港原來好近，我哋架車沿著北部海濱公路前進，大概只須20分鐘車程，就抵達基隆市中正區北寧路段，亦即係碧砂漁港的所在地嘞。見到上圖咁多指示牌就知到咗啦，心情此刻隔外興奮，食慾大振，差啲口水都流埋出呢，真係有啲失禮...........

我哋冇入到漁市場，皆因當架車駛至漁市場附近，路邊就有幾位大嬸喺度派發傳單，又話有折頭打，又話好抵食，仲有禮物送添，當時個個都鬼死咁肚餓，同埋行程時間又十分緊迫，可能係以上兩個原因影響，頭腦一向精明的我們，思想一時間混亂，咁就出事嘞，點樣出事，等陣間再話畀大家知....

我哋就係入咗呢間(5)號仔阿慧活海鮮店囉，大家記得認住佢個牌頭，唔係第日後悔唔好怪我呀，好嘞.....講翻餐海鮮午飯先，大伙兒坐定之後，何老闆、豬永球兩公婆同埋我出去揀海鮮，睇見啲海鮮都幾生猛嘅，阿慧老闆娘都非常熱情咁介紹我哋有乜嘢好食，經過一輪擾攘終於揀好哂食乜，咁就入翻去坐低歎吓冷氣等嘢食啦............

此處貝殼類海產都幾豐富架，而且仲有超巨大蜆蛤，私機黃話好食喎，咁就信你一次試吓啦，隔離嗰舊疑似竹筍嘅物體唔知係乜嘢呢啦，個樣又幾趣怪喎..........

其他魚、蝦、蟹就同香港西貢啲海鮮冇乜分別！

呀囡可能熱到懵懵地，又或者係肚餓掛，Call 佢影幅相都冇乜笑容！

店內簡簡單單的裝修，平平無奇，最為吸引應該係嗰幅八爪魚油畫喇！

天時暑熱梗係要飲番杯冰凍啤酒，就揀最地道嘅台灣啤酒啦，入鄉隨俗吖嗎，轉頭好快就有嘢食上枱喇，何老闆話驚啲小朋友肚餓，所以嗌咗碟炒麵畀佢咃食，不過睇落碟炒麵賣相認真麻麻，唔夠乾身，味道亦係一般，可能係肚餓關係，啲小朋友又食得津津有味喎.........吹咩

跟住上枱嘅係私機黃極力推薦的巨型蜆蛤，製法係用清湯浸煮，蛤肉完全吸取湯嘅鮮味，但又不會奪去它原有的新鮮味，不過始終較厚身，咬落有多少韌口，但都算係 OK 嘅，另外一碟係海參煮雜菜，配搭奇奇怪怪，又煮到水汪汪咁，同埋個豆腐海鮮湯味道一樣都係普普通通，真係.....no talking

跟手上枱呢幾味就較為有番啲睇頭，首先係椒鹽瀨尿蝦，蝦肉相當新鮮，椒鹽味亦充足，瀨尿蝦都夠哂大隻，幾惹味喎！再嚟白灼中蝦，肉質鮮甜，都幾爽口彈牙，過得去啦，跟住係椒鹽鮮魷，魷魚好鮮味，同配搭椒鹽份量好恰可，又係惹味非常，送酒就最啱嘞，之後係即劏生魚片，好似係立魚，唔記得太清楚喇，味道確實非常鮮甜，入口即溶，口感一流.......幾滿意......

最後一味就係白灼紅花蟹，Size都OK架，有斤幾兩斤重一隻，睇吓囡囡攞住隻蟹鉗幾有份量，佢最鍾意食蟹鉗架啦，因為係啖啖肉吖嗎，食落啲蟹肉又真係好新鮮，鮮甜味亦足夠，唔錯呀......

最後各人都飲飽食醉嘞，咁就嗌埋單囉，先前啲食物只係前戲嚟咋，現在先至係戲肉上演，我哋一共Order 咗八樣菜式，一碟炒麵同兩碟時菜，喺香港畀盡你咪$2000蚊倒，最多都係2500蚊一定有找，但係睇見張單就唔同你講笑喇，老闆娘烚熟狗頭咁話盛惠NT$18XXX 啦，咁咪對番港幣要成$45XX，今回真係入咗謀人寺嘞，當場畀佢劏到一頸血，真係有口難言，咁都冇計啦，人哋地頭，乖乖畀錢囉，跟住最氣頂嘅事就發生嘞，就係之前嗰位大嬸派畀我哋張傳單，咪話有紀念禮物送，見畀佢賺咗咁多錢，想話問佢攞多份得唔得，點知這位阿慧大嬸即刻變面，變面速度仲快過劉天皇，頭先四萬咁嘅笑容完全消失得無影無蹤，結果我諗大家都想像得到，就係好決絕咁同我哋講.... ..冇呀，仲叫我哋快啲離開，使唔使咁呀，過咗海就係神仙，你話係咪火都嚟埋吖，好....我哋大人有大量算數，跟住咪行過幾間舖位去攞所謂嘅小禮物囉，睇吓係乜嘢咁架勢，頂....原來係糖果一少包，仲係得十粒唔夠，這時就更加火滾，咁嘅嘢莫講話送多包，送多幾包都冇問題啦！

講真這店啲食物水準唔算太差，但係食物與價格唔成正比，最離譜就係嗰種變面售後服務，認真唔要得，今時今日咁嘅態度唔應該再畀佢存在.......

所以現在決定同佢賣行廣告，希望以後將受害者可以盡量減到最少......