那些年 ~ 我們一起再次到訪的台北 Day-3g 第十六回「青桐車站」台灣最幸福的車站

   2012年7月10日(TUE)

 

菁桐車站是平溪線的最終點站，這車站保留了日治時代的風格，自1929年通車至今83年間，車站一直以來都保留著原有風貌，菁銅車站主體全是木建築，多年來都沒有作過任何改動，目的是致力保存着原始面貌，時至今天，它亦是台灣鐵路局僅存的四座木造車站之一，也是縣定的台灣國家三級古蹟。

真係話都冇咁快，幾分鐘時間就到咗平溪線嘅尾站菁銅車站嘞，旅遊巴就隨便停喺菁銅坑對出空地，我們全體團員便立即落車就緒，那時太陽伯伯開始手下留情，熱力稍為下降，真係要同你「太陽伯伯」講聲.......唔該哂......

 

在菁銅坑路口處有個金魚池，在這裡亦有台灣名物「檳榔」售賣，想當年都嘗試食過檳榔，不過佢嗰種味道，真係好難頂，仲要食到好似滿口鮮血咁，怕怕喇.........咪搞！

跟住再行前啲就見到呢檔好嘢，係乜嘢咁正，就係賣梅子嘅檔攤囉，老闆好識做生意，點解咁認為呢，大家都知到七月天氣溫相當酷熱，老闆就將啲梅子浸於冰水中，遞給我們試飲，天口咁熱有杯冰水到肚認真消暑解渴，冰水中仲散發陣陣梅子清香，真係正到冇朋友呀！原來這些梅子唔係普通貨色，係有名堂架，叫做酵素梅，老闆話酵素梅味道雖然略為帶酸，但卻是鹼性食物，皆因現代人多為酸性體質，酵素梅亦可中和人體內的酸性物質，功效能消除疲勞、解酒、預防暈車浪等等。老闆亦都歡迎我哋試食酵素梅，咁食落又唔覺酸喎，味道仲幾甘甜添，一包賣NT100，買多幾包仲可以打折添，所以我哋都幫襯咗唔少架，您好我好吖嗎...

 

擾攘完一輪之後就繼續往菁銅坑方向前進，我哋本家三友終於能夠腳踏在菁銅老街之上，咁有紀念性嘅時刻又點能夠唔影低( 三隻腳 ) 佢呢............

 

再行前啲終於到達菁銅車站嘞，車站屬於開放形式，沒有入閘設施，可隨便進出參觀，站內見唔倒有工作人員，唔知走咗去邊，可能係較少清理嘅關係，站裡存出一陣怪味，因此只係望咗兩眼，影低幾幅相，就即刻出番月台唞氣，繼續欣賞其他景觀.........

 

月台對面右方有座名為菁銅黑金園區，聽聞「黑金」二字就聯想起梁家輝與劉德華N 年前合演的那部電影，戲中台灣嘅黑金都幾得人驚架，不過呢個黑金園區又唔同喎，佢原來係餐廳嚟架，係菁桐區內少數能居高望遠的地方，這裡設有半露天式觀景台，餐廳更提供小食及咖啡飲品，閒坐其中居高臨下，放眼整個菁桐古村區域，景觀無限優美廣闊，另外，由於觀景台緊鄰是菁桐車站，遊客更可觀看著平溪支線小火車來來去去，一邊品嚐香濃咖啡嘅同時，又能欣賞小火車進出與鐵道之風光，確實係一流享受喔........

平溪沿線車站如十分、平溪及菁銅都有著一個共同之處，就係遊人可以隨意在鐵路上放天燈，話口未完，遠處又有遊客正在放天燈，係黃色嘅天燈，大家仲記唔記得佢嘅燈語係乜，係意喻「黃金發財」，可想而知金錢嘅魔力幾咁巨大，更可令人終日勞碌一生呢！

 

真係唔好意思呀，又喺度亂發嗡風添，車站四周圍鐵道都有民眾爭相拍照留念，係喎，點解我哋冇做呢個動作架，諗翻起真係後悔莫及，大家發唔發覺遠處的大樹上掛滿好多竹筒，究竟呢啲係乜嘢玩意呢架，等陣就話你知，不過直覺話我知就感到唔係幾順眼，佢會唔會好似大埔顆許願樹咁，終有一天塌下架，認真替佢擔心........

 

冇落路軌影相唔緊要，喺月台影咪一樣咁正，存檔名稱係「愉快的菁銅三友」

 

原來唔止樹上掛滿竹筒，菁銅車站各處都滿是這些竹筒，究竟呢啲一串串好似爆竹咁嘅嘢係乜東東嚟呢？答案就係用來許願嘅竹筒，係菁銅車站獨有之名物，每個售價NT$30，咁抵玩梗係要整番個啦，寫啲乜就唔話你知喇，因為怕通咗天冇咁靈驗吖嗎.........

菁銅車站又被喻為台灣最幸福嘅車站，為何有這個稱號呢？皆因這裡有個歷史悠久的幸福郵筒，首先你可在這裡店舖買張明信片，再寫上祝福句語，最後把明信片投入這幸福郵筒，寄給你最想祝福的人，咁收件人就能夠感受到你給他的完美幸福喇，係咪超正呢...........

 

 

這裡的菁銅鐵道故事館是此處必然景點，故不少鐵道迷慕名前來體驗一下那古樸的火車站之餘，亦順道參觀埋這故事館，怪不得菁桐車站是懷舊鐵路迷的必然選擇啦。故事館門前亦放有紀念印章設置，方便遊客蓋印留念。

 

這個鐵道員是故事館的必然標記，館內亦有相當多的懷舊玩具展示，各式各樣嘅紀念咭發售，無離頭咁又會有日本名勝紙模型燈賣嘅，真係估佢唔倒？

館內更有多款極具收藏價值的懷舊火車模型展示，鐵道迷係咪流哂口水呢，囡囡都唔執輸買咗架火車仔玩吓，之後仲買埋鋅合金製嘅馬車型削鉛筆機，佢就梗係大滿足啦..........

呀囡見到呢位哥哥仔咁醒目，手上面仲揸住梳蕉添，擺哂pose咁，咪過去同佢打個招呼囉........hello........你好嗎........... 

 

 

真係快活不知時日過，喺菁銅車站玩咗接近一粒鐘，又係時候要同佢講拜拜喇，望吓手錶都差唔多19：00，又要上番車趕行程喇，我哋架旅遊巴會直接駛去烏來，今次去烏來之主要目的係浸溫泉，嘩....成38度高溫走去浸溫泉會唔會冇咁過引呀，起初都以為係架，及後致知呢個擔心係多餘嘅，點解呢？邊有咁容易就講畀你知呀，梗係要吊吓你哋引先......留待下回分曉啦....
待續.....................
下回預告：帶你探索烏來的「美人湯」溫泉會館，初嚐泰雅族原住民之山地菜美食！...............敬請萬勿錯過...............see you late...........

 

這篇文章曾於故居內發表 :  http://blog.yahoo.com/andygundam/articles/page/1