銅鑼灣「信記」避風塘海鮮美食

2012年10月26日(FRI)

 

這天星期五是公司的每月例會日，之後通常都會一齊食中午飯，不過今次有多少唔同，可以係老闆想搞搞新意思掛，唔喺陸上開餐，改喺水上食飯，應該係話喺艇上先啱，今期訂咗位於銅鑼灣對出避風塘的信記海鮮美食吃晚飯，咁就一於唔執輸，有嘢食喎，咁又點會少得我嗰份呢！

  

 
開完會之後就約定同事下午17：30喺銅鑼灣世貿中心門口等，我份人有個特點，就係逢約必到，逢到必早，所以都早咗十幾二十分鐘到達，心諗喺艇上面去厠所可能較為麻煩，不如就喺世貿解決咗先，我係咪好聰明呢.......

搞掂咗之後途經世貿中心中庭，咁啱見到有個小型嘅007 占士邦鐵金剛50週年電影展，見仲有啲時間，咪停低望吓囉！

會場內展出了歷代占士邦一系列嘅有型武器、同埋環繞 James Bond 週邊的多種產品，007嘅收音機、梳洗用品、Poker等等珍藏品，有啲產品你可能從未見過？這次「BOND 50 展覽」可謂同你一次過曬冷！ 

「BOND 50 展覽」仲可以一次過重溫22集嘅占士邦電影海報同經典場境添！更可以登入佢哋 facebook 專篇玩遊戲，只要入去集齊所需武器，就有機會贏走最新最潮嘅【Samsung Galaxy Note II 】&【占士邦五十週年金禧紀念藍光影碟套裝(限量珍藏版) 】等獎品啦！http://www.facebook.com/wtcmore.page/app_236772246452428

咁時間無多，睇咗陣就走頭，大概17：45所有同事到齊，咁就立即步行過去避風塘碼頭，路程唔太遠，都需要行5分鐘左右，不過這段路你一定唔會覺得攰，皆因沿途都可以欣賞吓避風塘的日落黃昏美景.....睇吓幾靚......

我哋book咗用餐時間係18：00 至19：45，所以一到碼頭就即Call 店家，好快就有位嬸嬸撐住架艇黎接我哋，喺碼頭望埋去就睇到信記，地方唔算大，一隻主艇應該係廚房，跟住拖著7至8隻小艇，那些小艇就係我哋今晚用餐嘅地方嘞！

我哋嘅餐枱埋嚟喇，睇真其實一艇一張枱，最適中係6至8人一艇，因為如果2至4個客人佢都係一樣佔用一艇，價錢方面會收得比較貴啲，我係網上睇過大概每位埋單要畀$500左右，但好似我哋今晚9 個一艇的話，最後結帳每人都唔使$300，你話差幾遠呢！

艇上都有少許簡單佈置，燈光亦算足夠，我哋預先book咗八人餐，每人飲品一罐，汽水、啤酒、檸檬茶任擇，可自備紅酒唔收開瓶費，廚房也和我們近在咫尺，啲食具都幾乾淨，觀感OK..........

等咗5 分鐘左右就有嘢食上枱，先來白灼海蝦，有成隻手指咁大，咬落蝦肉爽口彈牙，肉質清甜，認真新鮮的素質，好味......跟住係白灼小花螺，就咁齋食肉質鮮甜，不過我就喜歡點芥末甜醬一齊食，真係極品的草根美食，再嚟係三款惹味小食，首先係水灼豬粉腸及豬肚拚豬脷，看似平凡的菜式，其實要煮得好味一啲都唔簡單，淨係豬粉腸的腸管要處理乾淨也要落一番功夫，豬肚與豬脷一些豬腥味都冇，食起嚟一啲都唔韌，個人特別喜歡豬粉腸那種獨有的粉嫩口感，再加埋他們的秘製香辣油一齊食.........好好味呀！

第三款小食係水灼土魷魚，做足汆水工序，所以冇哂鹼水味，再點埋香辣油食，正到痺呀，接著輪到主菜登場，菜式名字係避風塘豉椒炒蜆，用得呢個名，可想而知係會帶點辣味，這道菜非常惹味，不過美中不足之處係蜆肉帶點泥沙，少許失敗，之後係豉汁蒸泥鯭，也可選擇椒鹽泥鯭，用上大約兩隻手指般Size嘅細泥鯭，肉質嫩滑鮮甜，再嚟係蒜蓉蒸蟶子皇，較大的蟶子通常是加蒜蓉開邊蒸，我也是最愛這種烹調方法，他們會好慷慨地加上大量蒜蓉、粉絲、青蔥，蒸的火候亦恰到好處，淨係睇個賣相啲口水都流哂出呢，其實仲有韮菜花同菜芯兩碟郊外油菜架，不過掛住食冇影相囉，但係都要講吓碟韮菜花，皆因真係相當脆嫩清甜，新鮮爽口，非常健康的一道菜喎！

睇吓我真係忍唔住要同隻蟶子皇大合照，而隻蟶子同啲蒜蓉所分泌出來的汁被粉絲完全吸收，齋吃粉絲已是可口無比之美食啦！雖然蟶子皇咁大隻，但食落一啲都唔韌，仲好爽口添，果然係王牌菜式........好嘢........

跟住就到星級招牌菜出場喇，就係曾經風靡全城的正宗避風塘炒蟹，他們普遍會用大約斤半重的肉蟹，配以大量的蒜蓉、辣椒、豆豉、蔥爆香炒勻，炒蟹時再用自家秘制的調味料加以調製，使得蟹肉油紅色艷，上枱時香味四溢，陣陣豉香蒜香隨風飄揚，真讓人食指為之大動，一啖咬落蟹肉盡是濃惹香氣，但又食得出蟹肉嘅鮮甜味，蒜香味、辣味與豉味亦平𧗾了口感，可口致極，食完保證你回味無窮！超惹味的一道美食呀.....


最後嬸嬸會問你選擇艇仔粥或燒鴨湯河粉，我就揀咗燒鴨义燒湯河粉，因為是這裡的特色湯河，鮮甜的湯底係以鴨骨和大地魚乾熬製，配以自家手切的河粉，幼身得嚟又夠滑，食下每一口河粉都能掛滿湯汁，义燒與燒鴨肉質肥美又有咬勁，但又不覺膩，這碗鴨粉簡直係冇得輸，我只怕會食上癮咋！

差不多兩個鐘頭的用餐時間好快就過去喇，當我哋飲飽食醉埋單之後，嬸嬸就二話不說火速送我們返回岸上，因為這裡啲 booking 都好緊張架，時常都座無虛席，所以話食物質素高的食店真係唔憂做架，況且他們又咁有特色呢，嬸嬸拜拜啦...我一定會再嚟架！喺回程途上見到個避風塘夜景咁靚又
點會忍得住手喎，仲有中區夜景都唔錯架，你哋話係唔係！

食後感想：一家好的食店食物質素固然重要，如能配合優美獨特的用餐環境，更能使之相得益彰，這方面信記做得到有餘！

試想想坐於一艘在水中搖曳蕩漾的小艇上，一邊眺望避風塘週圍五光十色的霓紅燈影，一邊品嚐可口美食，緬懷一下昔日的美好時光，雖然以往這裡的紙醉金迷、夜夜笙歌的情景已不再復見，但身處避風塘水中央這一刻，昔日的避風塘風貌浮現腦海中，回憶總是永恆而且是最令人回味的事情呀.......

下次再見啦.......Bye Bye