那些年 ~ 我們一起再次到訪的台北 Day-3e 第十四回「十分瀑布 ( 台灣尼加拉瀑布 )」

2012年7月10日(TUE)

 

離開基隆碧砂漁港之後，就繼續向我哋嘅行程進發，跟住我哋會沿著平溪線遊玩，首先遊覽嘅係有台灣尼加拉瀑布之稱的十分瀑布，從基隆到十分瀑布風景區都要用上60分鐘左右，咁呀囡又有時間可以喺車上小睡片刻，而我哋亦都能唞足精神，等陣間再度衝刺吖嗎.........

 

下午15:30旅遊巴就到達十分旅遊服務中心外的停車場，租車就有這個好處，如果搭火車嚟參觀，係唔能夠直接到此，要喺十分火車站步行過來，要行成20分鐘架，天時暑熱你都咪話唔辛苦！

天氣仍然係好Q熱，私機黃話已升到39度高溫喇，所以各人落車後馬上走入服務中心唞暑，順便去埋洗手間，再準備埋條濕毛巾備用，旅遊服務中心內有這間十分幸福花園Coffee & snack 餐廳，行得攰可以入去嘆個下午茶都唔錯，不過我哋就冇時間做呢一個動作喇！

 

一切準備就緒，我哋再要步行10分鐘過去瀑布區，囡囡行得嗰幾步又話要抱抱喎，認真攞命，正當我想動手之際，媽咪就先下手為強，真係估妳唔到，睇吓媽咪幾咁威猛，母愛幾咁偉大........今天要向妳致敬........好嘢......

 

過咗冇耐就行到旅遊區入口處，囡囡都算幾聽話，肯落地自己行，我哋經過一段紅木橋，再穿過這扇無憂門，目的地終於出現在我們眼前..........

 

 

呀.....原來仲未見到瀑布架，只係瀑布風景區嘅入口「十分山水遊樂園」咋，咁即係話要收「舵地費」入場費啦，點解會咁講呢？皆因十分瀑布雖為公共資產，唯必須經過私人產業土地才能觀賞，目前該處土地由「十分大瀑布育樂股份有限公司」長期竊佔、搭蓋違建、亦未取得觀光遊樂業執照，即非法營業收取門票，仲要係新台幣180 元每位，卻年久而來都沒有任何負責人員受罰！但唔知點解，後來縣府決定讓業者就地合法，故現今仍須收費參觀，而門票則降至全票80元、半票50元，70歲以上老人及身高110公分以下兒童、十分寮地區居民免費。

咁依家各位明白我點解要叫佢做「舵地費」啦.......

 

咁要參觀都冇計啦，乖乖地畀錢買票入場囉，十分瀑布園區內的設施都幾多架，有野營區、烤肉區、別墅區、河邊釣魚遊樂區、動物園區、石林遊樂區、大家山觀景區、吊橋、原野體能訓練場、兒童戲水池及120 尊石雕觀音林區…等等 ，我哋邊有時間行咁多個區吖，只能鎖定一個目標物，唔使問阿貴，咁就梗係園區裡面嘅主角十分瀑布啦...............

 

登....登....登....傳說中的十分瀑布終於出現在我哋面前，果真相當澎湃，十分瀑布落差約為20公尺，寬度約40公尺，外層岩頃向和水流方向相反，屬逆斜層瀑布，此情況與北美的尼加拉瀑布非常相似，故使其贏得「台灣尼加拉瀑布」的美譽。它那壯麗的水瀑、磅礡的氣勢，更成為台灣最大的簾幕式瀑布。

從側面望過去條瀑布真係非常壯觀，咁梗係要同佢影多幾張沙龍啦.....

 

又到何家三友出場嘅時候嘞，靚人配絕景，認真冇得頂......yeah......

 

 

原來仲有路行落瀑布下方水潭處觀賞架，呀囡同媽咪話好熱好攰唔想郁喎，所以我就獨自去偷歡，謝絕妳監管.....哈哈.....唔好意思又唱歌添，其實潭底嚟度仲靚，可以一眼睇哂整條十分瀑布嘅全景，由於瀑布下方潭底極深，以致水氣長年瀰漫不散，一經陽光折射，就會不時出現彩虹，故此處又有「彩虹淵」的美譽稱號。相中雖然睇得唔清楚，但確實有一道清麗的彩虹出現，佢哋唔落嚟真係嘥料咯........

喺瀑布區hea 玩咗大約30分鐘，終於影飽相嘞，各位團友都話咁熱不如走咯，OK....咁咪回程囉！睇吓樂園門口嗰個公共電話亭幾別具一格！

因為平溪支線啲火車班次比較疏落，所以火車軌時常都冇火車經過，眼見好多遊人都會走落去遊玩，仲影相影得好開心添........

執輸行頭慘過敗家，呢啲事又點會發生喺我身上吖，即刻同阿囡媽咪衝落去瘋狂拍照啦，放心喎，應該會好安全架，因為如果有火車駛到，佢哋會預先响定號同埋慢駛架.......

 

呢張係何老闆部單返相機幫我哋何家三友影嘅，唔使講嘢，靚人、靚景、靚機、影出嚟啲相又點會差呢........你哋話係咪..........嘻嘻..........

 

不經不覺喺十分瀑布停留咗差不多一個鐘頭嘞，時間係下午16:30分，我哋又要離開喇，諗起又要沿路行番出去服務中心，真係有啲想喊嘅感覺！幾難行嘅路始終都有盡頭嘅，幾經艱辛終於爬番上旅遊巴，攤喺坐位度過吓冷河先，咁又開始往下一個焦點行程進發嘞，就係平溪站天燈之鄉囉，我哋仲打算
放天燈添呀.........好期待呀........

想了解放天燈嘅情況就繼續......追啦......下次再見......拜拜......

最後有多少關於十分瀑布嘅事宜要為大家補充翻，就係新北市城鄉發展局表示，2010 年6月經都市計劃變更，將十分瀑布變更為公園用地，也經內政部都委會通過決議，但業者不肯服從地方法院判決，上訴到高等法院亦都敗訴，此案已在最高法院審理。台灣觀光旅遊局表說，十分瀑布已公告縣定公園，未來將免費開放欣賞，此案需待法院程序結束，未來將依公告地價徵收土地，待徵收完成後拆除園區大門並闢建人行步道，即可供各方民眾免費觀賞那這瀑布。

一個非常好嘅消息，邪終於不能勝正，咁以後去十分瀑布就唔使畀「舵地費」喇...........yeah............

 

 這篇文章曾於故居內發表 :  http://blog.yahoo.com/andygundam/articles/page/1