長隆歡樂世界~聖誕兩天遊 Day-1 ( 長隆國際大馬戲 ) Part-2

2011年12月17日(SAT)

 

上文講到，趁未夠鐘睇馬戲，就係露天廣場四周圍hea 吓先...

 

個露天廣場好大，中間仲放咗一株巨大的聖誕樹，咁嘅景況就梗係最啱影大合照啦，這張就係今個Trip 的首幅九男女大合照喇，真係要唔該哂當時路過嘅同包哥哥仔.......Thanks

做乜喺度搓包剪(揼)咁無撩.....玩吓啫，時間都差唔多 6 點喇，大家都話早啲過去馬戲會場嗰度望望先，因為今天係星期六嘅關係驚人多，早啲去到霸番個靚位先都好吖!!!!!

售票處就在大門入口左手邊，可能係時間上早人影都冇隻買票，冇人咪仲好，我哋第一時間立即入場，跟住各自四周圍 Look Look，我哋一家人喺馬戲廣場前留影，之後囡囡就畀啲精品吸引住，話樣樣都好想買，我唔講大家都知最後結果係乜喇，就係眼睛Shopping........

馬戲廣場的巨型動物擺設及各式各樣白老虎毛毛帽子!!!!!

我哋hea 到6：45 就入咗表演場霸位，其實會場有特設酒店住客區，不過坐位都係先到先得，工作人員帶我們到住客D區第一段，不過我哋冇選擇坐到最前，點解睇馬戲唔係坐到最前好啲咩，想知點解？.......等陣間先話你知.....會場內有啲工作人員打扮成小丑模樣，囡囡話要同小丑姐姐影相喎.......ok.......no problem

 

安排好坐位之後再出番外面行吓，咁啱見到有隊 Band 喺度玩音樂，咁當然要停低欣賞吓啦，當隊 Band 表演完之後話歡迎埋嚟同佢哋合照，咁就唔客氣喇，等我打吓鼓先.....
跟住帶囡囡入咗 Circusky Shop「馬戲星月商店」睇吓，店內大多數都係賣圍繞卡卡虎週邊的產品，卡卡虎毛公仔就最多，囡囡都買咗個小丑卡卡虎做紀念品呀........

Light Up 咗嘅馬戲廣場睇落特別靚，此時此刻， 美景當前，不得不學呀「峰哥」黎番個Chok 樣助吓慶先，我哋Chok 呀，好喇...Chok 多兩吓夠喇，因為時間差唔多馬戲要開場喇，快啲返埋位坐定定先.......

好喇......各位觀眾.....精彩嘅長隆國際大馬戲現在開始，首先出場同大家見面嘅係聖誕老人，睇吓佢個綠色袋裡面裝滿哂禮物，原來係卡卡虎毛公仔嚟o架，佢會不時做出鬼馬動作引起滿場笑聲，亦會隨時將毛公仔拋擲送給觀眾..唉...我哋雖然人多，但係就始終收唔到聖誕禮物囉......

 

 

跟住嘅表演係「環球飛車」6位來自美洲的勇士，駕駛著他們的摩托車開始了一場風馳電掣的追逐，他們不是在地平線上飛馳，而是在懸空的大鐵球裡展開他們的生死時速。

6位身穿不同顏色的摩托勇士，就像6道彩虹不斷在蹤橫交締般變換呈現眼前，猶如有六色驚雷響徹在夜空之中。

這是一項非常精彩而又帶高難度的表演，齋講冇用，睇埋影片咁就Very good....... 

 

 

突然間滿天白雪落下，三位健兒在空中圓形鋼架上表演優美體操，她們仿佛就像白色天使在雪花中起舞，視覺效果一流.....

 咁精彩嘅表演，真係睇到有啲唞不過氣來，不如大家就休息一陣，下篇再繼續欣賞啦！

 

 

 此篇文章乃經過修定版本，加入了一些精彩影片！


而舊版本可於故居內觀看 : http://blog.yahoo.com/andygundam/articles/page/1