牛角日本燒肉專門店 Gyu-Kaku (九龍灣德福廣場1號店)

 2012年5月1日(TUE)
等我同大家講吓「牛角」創業歷史先，「牛角」前身名為「焼肉市場七輪」，是西山知義社長於1996年1月在日本一個離「三軒茶屋」車站頗遠的地方創立的一所燒肉店，當時店舖面積僅600平方呎。自開業以來生意一直不如理想，西山社長致力找出方法改善店舖營運方案，於是大膽地推出了一個名為【300日元返還推廣計劃】，於每位客人用餐後，只要提出店舖需要改善的方法，就可以獲得300 日元的退款。從此西山社長就按著客人的意見逐點改善店舖的不足，過了不久於店舖外已出現人龍，生意額亦逐漸提升。1997年10月「焼肉市場七輪」正式改名為炭火焼肉食店「 牛角」，因何稱之為「牛角」呢，意思是取其牛頭上的一雙角就如天線一樣，不斷的接收客人寶貴的意見，不斷的進步改善來適應了顧客對燒肉的需求，大大開拓了日本的燒肉市場，至今能廣受顧

客的青睞與喜愛！

日本燒肉專門店「牛角」在日本擁有逾6百幾 間分店 ( 2010年10月止 )，除了日本以外，「牛角」在美國、新加坡、台灣、印尼等地均設有分店，「牛角」以合理的價格提供美味優質的傳統日本燒肉，以「感動創造」為服務宗旨，及真誠的服務令品牌的歡迎度趨向國際化。為進軍中國市場，其第一間華南地區的分店正式選址於香港九龍灣德福廣場，地址係九龍灣徳福廣場2期429 號舗，香港「牛角」為了承傳日本正宗口味，店內多款醬汁不惜工本由日本直接進口，是為了令客人可以100%品嚐到日本的正宗口味。

趁五一勞動節這天公眾假期，一家人就去咗九龍灣 Mega Box 嘅( IKEA ) 行吓，不過睇唔啱乜野都冇買到，囡囡就覺得樣樣嘢都非常之新奇，所以乜都搞一餐，之後就去「牛角」日本燒肉專門店食晚飯，因為都有一段時間冇食過鐵板燒肉哪，所以都十分期待，聽聞「牛角」6點鐘後會好多人，因此5點45分就到達，這時見到門口都冇乜人等候，就快步同囡囡影番幅相先，囡囡不知為何好興奮話要跳番Part舞先喎..真係畀佢吹漲！

影完相之後好快就火速入坐，服務生安排咗好闊落嘅卡位畀我哋，所以坐得好舒服呀，坐得舒適係一間好食店嘅最機本條件，這是本人的一向睇法，啲餐具都好乾淨清潔.....再加分！

啲調味醬料都擺得好整齊，高嗰樽係日本直送燒肉醬油，白色瓶係蒜塩醬，黑色瓶係味噌醬，仲有個牌提醒你要將啲生熟食物用夾同筷子分開處理，真係好細心呀.......讚！

三種調味醬料的真面目，最上方日本生產醬油帶有輕微柚子味，中間係白芝麻蒜塩醬略為過咸，下方深紅色係味噌醬冇乜特別，其實後面嗰兩類醬用途都不大，因為每碟肉類都可選擇以上三種做醃料架!!!!!!!


睇吓個燒爐係用銅製造，傳熱比較快同平均，圓形爐身週邊上設有很多細孔，唔好睇小這些細孔呀，全靠它吸走燒烤時的所有油煙味，所以食完成個身一啲味都冇........幾好架！

講咗咁耐....好開始落Order，先黎一番人氣嘅豬頸肉(味噌醃汁)$39，豬頸肉醃得好入味，燒出來嘅時間較易掌握，肉質亦非常爽口......好味........

再黎佢話係超值之選上級牛肋肉(塩醬醃汁)$59，份量大約五件，都幾有牛味，唔係最好，已經幾好....過得去啦......

跟住係厚切牛舌(塩醬醃汁)$49，份量都係五件，咁就梗係同仙台啲炭燒牛舌冇得比啦，不過都算可以啦，一食無妨!!!!!

最初第一輪用高火燒烤，較難掌握有啲過咗火位，肉質也較為乾身，失敗之作，係自己嘅問題唔關人事，及後就醒目咗哪，本人建議先用高火燒一分鐘左右所住肉汁，再轉用中火慢慢燒成，幾多成熟就要因人而已喇，這回咬落去啲肉質又軟腍好Juice ，好好味呀！

 

本人習慣食燒肉例要跟飯一齊食o架，因為啲飯沾上肉汁係好好食喎，咁就立即Order 咗牛角飯$19 及香蔥溫泉玉子飯$25 各一碗，牛角飯用日本真珠米煮成，上面蓋滿紫菜，飯裡仲加入小許味素.......好味！

至於香蔥溫泉玉子飯就仲正，隨咗大量紫菜之外，還附有香蔥及一隻溫泉蛋同上，將隻溫泉蛋同啲飯搞勻一齊食，這碗飯的確係人間美食，『碗飯好好味呀，以後食唔番點算呀，以上係家燕姐喺電影「食神」裡面嘅對白』，引用來形容嚟碗飯就最貼切喇.......

 

囡囡好鍾意食紫菜，因此好喜歡這碟紫菜撈飯，再加埋啲爽口豬頸肉一齊食，真係食到唔停得手，睇吓佢隻手指公就知啦！

 

整多個V字手勢添.....問你服未，囡囡仲邊食邊打機非常之快活......其實咁嘅飲食習慣唔係好啱，咁就玩一陣好喇，快啲食飯哪!!!!!

 

正所謂佳餚美酒，何況係食燒肉，冇番杯啤酒點得o架，唔該....Asahi大啤一杯(500ml)$35，咁先至似樣o架嘛，大杯酒大塊肉....真係痛快！


好繼續...唔好畀佢停，再黎王樣！腹胸肉(塩味牛油)$69，附牛油兩件，腹胸肉(肚腩位置)又係兩件，Size 就較為大番小小....ok啦!!!!

怎樣泡製同之前燒法一樣，先高火後中火慢慢燒，完成後再沾小許牛油加添油香，再蘸醬油放入口食，肉質非常爽滑鬆軟，口感亦相當豐富....好食到冇得頂呀.......

好食到唔停得手，追加咗一份網燒一口牛(燒肉醃汁)$49，將牛肉切成牛粒，大約8-9粒咁上下，老實講真係細碟咗小小，牛粒嘅好處就係燒烤時間較短，較容易控制，我就喜歡燒至半生熟，食落外乾內軟，超正嘅口感.......大滿足！

好嘞....都差唔多喇，埋單$378 連加一小費，個價錢都可以接受唔算太貴，啲食物質素都好OK，不過食物份量就真係細碟咗小小，如果每碟可以多番1/3就perfect 嘞，咁我食後就提出咗改善意見喇，希望西山社長聽到啦...哈哈！！囡囡都話講吓笑啫.....唔好發皮四呀......

下次再見......拜拜.......