意式餐廳「薩莉亞」Saizeriya

  2012年5月13日(Sun)

今日係五月嘅第二個星期天，唔使我講大家都知係乜嘢日子啦，就係偉大嘅母親節，咁就一家人出去食飯高興吓啦，我咃選擇喺將軍澳行吓街先，最初都冇諗過搵啲乜嘢食，之後有想過食日本壽司與拉麵，但又覺得冇乜特別，亦有諗過試吓Kitchen J日式料理店( 炸物為主)，但這店舖於網上口碑唔係咁

好，而又價錢都幾貴吓，都係不作考慮，咁點算好呢？

就在這時途經南豐廣場，喺一個唔起眼嘅地方發現咗佢，佢就係 Saizeriya -「薩莉亞」意式餐廳，淨係聽個名咪以為係番鬼佬開o架，佢係日本意式家庭菜連鎖店呢喎，喺日本仲好有江湖地位添，就等我同大家講吓佢係乜嘢來頭咁犀利......

Saizeriya Italian Restaurant Group於1967年在日本成立，旨為供應健康、質優味美及價錢大眾化的意大利菜餚。集團在日本擁有逾780 間分店、22 間上海分店、兩間廣州分店，並同時在北京、深圳、台灣、香港及新加坡設有餐廳！2009年4月10日源自日本千葉縣的意大利家庭式連鎖餐飲集團Saizeriya落實開

設第二間香港分店。早前Saizeriya 已於2008 年11月在香港首次開業，並計劃於未來五年再增設五十間分店.....

嘩.....好有大志喎.....咁就要睇吓您有幾利害至得......

門外擺放咗塊大餐牌，睇落啲菜式都非常之吸引，好啦....就叫囡囡問哥哥仔攞位先，哥哥仔話要等幾張檯先到我哋，等咗10分鐘倒就入得場喇，感覺佢哋顧客流量都幾快，因為門外等候嘅人都唔少架！

餐廳裝飾非常簡約，但啲餐檯擺放位置設計得好理想，令到全店超過80% 客人有卡位坐，我哋當然備安排坐卡位啦，舒適嘅飲食環境對我呢講係相當重要架，所以初步感覺良好，凍水及熱茶係自助式嘅，都好方便架，又可以畀小朋友學吓自理......幾有心思喎.......

餐牌已經放咗喺檯面，我倆埋頭苦幹咗一陣，再望吓隔離檯啲食物，每樣份量都唔係幾多，咁細細碟嘅好處係可以試多啲款式囉，終於決定Order 五款菜式同一支啤酒，睇清楚張單您無眼花呀，係HK$138 喎，非常低食，講真吖....低食唔代表一定好食喎，咁就要食過先知喇！

 

每張檯都有個鐘仔，如要落Order，扲吓鐘仔就有服務生幫助您o架喇，囡囡好多手，成日都話要扲鐘仔.....真係畀佢吹漲！

前菜係「蒜蓉焗田螺」$20，田螺係會用香濃嘅蒜蓉牛油汁一起烤焗，佢話口感可與鮑魚媲美的人氣美食，食落真係蒜香味濃，話佢係鮑魚就誇張咗啲，不過又真係好美味喎 ......

黑黝黝呢碟係「墨魚汁意大利粉」$28，墨魚圈意大利粉混入墨魚汁一齊煮，個賣相就認真麻麻，但係就非常好食，啲意粉煮得啱啱好，唔太腍，有咬口，墨魚都好鮮味....好正，不過就會食到成個嘴都係黑色，食完呢碟嘢之後，即刻要抹嘴先呀，唔係就變咗烏嘴狗架哪！


跟住上嘅係「鐵板羊鞍焗爐燒」$34，食成晚最貴就係呢個鐵板餐，新鮮嘅羊鞍，大約燒至八成熟，配以秘製醬汁，入口略帶一點兒羶味，這便是羊肉獨特好味之處，餐跟栗米粒同薯仔，啲薯仔連埋皮食特別好味。

囡囡話好想食Pizza，所以嗌咗個「吞拿魚栗米比薩」$29，迷你批咁嘅Size，味道就一般啦，不過勝在夠健康，營養夠豐富！


終於輪到囡囡嘅致愛，「蒜香法包」$8 是也，您冇聽錯，我冇講錯，係$8 咋，好多街邊麵包舖都買唔到啦， 一碟有兩大舊麵包，上面放滿蒜蓉香料，烤焗得外皮鬆化，上檯時香氣撲鼻，囡囡差唔多成碟食哂....真犀利......

咁嘅環境啤番一啤就在所難免o架嘞，朝日啤酒640ml大樽裝$19，個多小時嘅努力，各人終於飲飽食醉，埋單都只係HK$138 認真超值，本人覺得此店食物質素有番咁上下，價錢又相當便宜，Saizeriya提供價錢大眾化的意大利健康菜餚，作為餐廳的目標同定位，真正可以做到價廉物美效應，我就非常之欣賞嘞，叫它做香港的「平民食堂」絕不為過......超讚.....

網址：http://www.saizeriya.co.jp/

 

又話食完點解下面仲有食物o架，唔洗咁緊張，事關母親節之後幾日，就係囡囡跳舞學校的家長開放日，位置又係喺將軍澳，咁咪順便執多佢一濟囉，當晚8：00去到，又係等咗10分鐘倒，又係安排坐喺卡位，睇過餐牌，落埋Order，Saizeriya我要深入再了解您多一次喇.......

開波飲碟餐湯先，「周打海鮮湯」$9，是Saizeriya 的店自慢(最熱賣)湯品，飲落果然名不虛傳，湯身厚滑濃郁，內有多種海鮮肉粒，飲落口感十足，店自慢的稱呼他當之無愧，我哋都非常同意......

「香辣腸配燒薯塊」$19，薯塊又係連皮上....好味，腸仔略帶微辣，連囡囡都好鍾意食，食到唔停得手，最後仲要霸住自己食哂，有冇搞.....錯......


冇得食腸仔，為有食呢個醒胃菜先哪，「蒜蓉焗青口配薩爾薩酸菜」$20，採用意大利特色嘅薩爾薩酸菜調味，他能完全帶出青口的鮮味，相當好食...Yummy！

接著輪到兩款主菜出場，其一係「邦哥尼蜆肉意大利粉」$26，啖啖新鮮蜆肉配以酸度適中嘅蕃茄醬汁，再混和於意大利粉當中，相當美味，蜆肉同意大利粉果然係人間絕配.......正呀！

另一主菜是「地中海海鮮焗飯」$28，又一超值食品，這個飯裡面有蝦仁、青口、蜆蛤及烏賊，您哋睇吓啲料嘅份量都落到足o架，仲要係炒飯底添，炒飯吸哂啲海鮮汁，係一款頂級嘅美食，絕對值得推介......

其實都有Order「蒜香法包」$8 同朝日啤酒640ml大樽裝$19 o架，不過就冇影相，埋單計HK$129 咁便宜有冇搞錯，順帶一提此店唔收加一服務費o架，我對這間「平民食堂」各方面都好滿意，因為一間價廉物美而又真才實料的食店確實難求，我以後都打算會多啲幫襯，給與它們大力支持，有興趣您都去試吓吖，睇吓我有冇吹水都好呀....

好....講住咁多先......拜拜.......