吃吃浸浸台北礁溪聖誕行 ~ Day 4c「夜遊礁溪溫泉街 ~ 樂山溫泉拉麵 ~ 品嚐地道美食篇」

2014年12月22日(Mon)冬至

本篇內容承接Day4的最終章，講述是晚何家三友暢遊礁溪最熱鬧的溫泉街，輕掃宜蘭地道小食，晚餐品嚐樂山日式拉麵，這家店特別在於可邊吃拉麵邊浸腳！餐後漫步遊湯圍溝公園，再參觀礁溪葉家香-世界辣椒文化館，最後回酒店再泡浸風呂....滿足哂！
 

火車站旁的礁溪溫泉區實用地圖，咁就想去邊都一目了然啦，原來現在是2014東山宜蘭溫泉季，咁即係話奉旨狂浸溫泉囉！

 

途經這處礁溪溫泉公園，見佢啲聖誕燈飾幾靚，咪走去同佢玩陣囉！速拍存檔！

之後繼續向溫泉街進發，這間「奕順軒」係宜蘭糕餅知名店，怪不得店內逼滿強國大媽，立時殺聲震天，十分熱鬧！我們試吃了一款黃金桔蛋糕口感相當唔錯，可惜嚐味期限只有數天，作伴手禮太忟水，所以食完就閃冇幫襯！

 

礁溪原來5點鐘天就黑齊，天氣亦開始轉凍，一凍人就會容易肚餓，咁一於搵啲嘢咬吓先，就試吓礁溪蔥油餅啦，加蛋都係NT30就有交易，比台北便宜，自來台灣後漫妹妹對蔥油餅情有獨鍾，非常之喜歡吃架！

跟住就食正餐了，樂山溫泉拉麵係我哋今晚嘅選擇，聽聞這店價廉物美，麵又大大碗，選擇樂山其實仲有一個原因，就係門外的坐位可以一邊食麵一邊浸腳，係咪好新奇呢！不過今夜天氣稍涼，兩名女生又話怕凍，所以最終都係冇法體驗.......有啲失落感！！！

店內佈置簡約，給我樸素舒服感覺，坐下連忙點餐，這碗兒童拉麵NT80 = $20港幣，係漫妹妹自己揀嘅，因為紫菜同玉米都是她的致愛！

 

 

壽司同丼飯我們不作考慮，今晚主打拉麵，媽咪叫的特濃豚骨拉麵NT160 = $40港幣，賣相及份量都足夠，係味道普通咗啲啦，不過就認真抵食囉！

 

 

我呢碗係Menu寫著店長推介，豬排叉燒拉麵NT180 = $45港幣，三大塊叉燒，麵條軟硬適中，肉湯的味道都過得去，確顯大碗夾抵食之賣點！ 

湯麵仲附有大大件炸豬排，亦炸得幾香口，但肉質就差咗啲鮮味，不過就相當飽肚！我們追加了一份溫泉蛋NT20 = $5銀嘢，夠水準而又超抵！日式冷豆腐NT40 = $10蚊雞，口感也相當滑....正喎！ 



樂山的賣點是拉麵夠哂大碗，而價位相較公道，但味道確實只是一般，結合性價比來講都算可以接受！而超愛吃拉麵的漫妹妹就相當享受這一頓晚餐呢！

 

樂山溫泉拉麵FB連結：https://www.facebook.com/pages/%E6%A8%82%E5%B1%B1%E6%BA%AB%E6%B3%89%E6%8B%89%E9%BA%B5/135492939847577

 

 食飽飽後就行過對面的湯圍溝溫泉公園行吓！

  

會變色的玻璃鞋浴缸，現在是粉紅色！轉眼間就變成粉藍色！

這個會變色的浴缸擺設非常美麗，而我亦極鍾意嚟一幅相片，完全能表達出現場之氛圍！

湯圍溝溫泉公園內還設有使用檜木興建充滿禪意的湯屋，好讓遊人可邊泡溫泉邊欣賞日式建築風景，享受不被打擾的清幽氣氛環境！

這是公園門前的古怪電話亭，一共有三款特定佈置，這個是真的可以撥打電話！另一個就可以給坐下看書！

 最為特別的要算是這個紅色電話亭，內裡放置了一台大鋼琴！漫妹妹話要一顯身手喎！

位於溫泉公園隔離的是這間「葉家香」世界辣椒文化館，辣椒都有博物館咁奇特，仲有分七個等級辣度雪糕出售，咁得意，一於要入去開吓眼界先！店面前的辣椒姐姐同埋火辣哥哥幾得意吖！

 

 店面介紹常食辣椒有加速新陳代謝效用，有助調整情緒、強健肌肉、血液循環，是相當有益的食品，有膽量就試吓七級辣啦，佢話食完會有爆熱感覺！一細樽鬼辣椒粉就要賣NT300，都幾貴架，不過我鍾意佢個名稱，所以買了一瓶自己享用！嚟支酒名叫吻爆魔王，應該是非常勁辣嘅酒！卡羅萊納死神，2014世界最辣，等級是第七！想知多啲「葉家香」世界辣椒文化館資訊嗎？

可上嚟個網址：http://www.chilihunter.com.tw/#top

 

 原來宜蘭有三寶，就係蔗燻鴨賞、金棗蜜餞、櫻桃鴨滷味，三寶之中我對鴨賞特別感興趣，因為未吃過，所以決定於這間「鴨賞之家」買啲試吓啦！

 

 

越夜越美麗的溫泉公園，完全黑透的夜空更顯得燈飾特別亮麗，又再同佢玩多轉囉！

  

原來徒步返酒店都係好近，只需8分鐘左右腳程，上房換番件靚靚浴衣先！

原先1F薑餅小屋這裡是有活動舉行，但我們來到時卻甚麼也沒見，是搞錯時間嗎？最終沒有答案，咁就只好四周圍拍吓照啦！

薑餅小屋內的聖誕佈置，好溫馨呢！

漫妹妹有禮物收好開心 ，仲要學人家賣萌添！

酒店各處都擺放了廚師工匠用薑餅搭建的小模型，倫敦大橋及台北101大樓都是其中作品！

 

晚上8時於酒店大堂會有聖誕特別節目欣賞，最後仲有抽獎添，可惜我哋抽唔中囉！漫妹妹同聖誕哥哥姐姐合照！跟住當然係去浸溫泉啦，不過掛住玩唔記得影相添，唔緊要明天再補影番啦！

浸完大池之後返房間又浸吓個私家浴池，享受無比舒適的私人風呂呢！

囡囡話浸到有啲肚餓添，唔哂怕，我即刻準備今晚嘅宵夜美點，蔗燻鴨賞，當然仲有滷水鴨舌，鴨賞食落有啲似豬頭肉，但邊皮比較韌，較難咀嚼，本人就唔係好識欣賞！

邊浸溫泉邊飲啤酒確係幾爽架，整多個熱騰騰杯麵作夜宵就更加完美，漫妹妹亦非常期待這刻時光！浸飽食醉就要火速休息哪，因為明天仲有好多精彩嘅節目等住我哋架......咁早抖啦各位......明天見！

 

明天預定的節目將會更加精彩，想知精彩成點.....就要繼續睇住啦！