2014年12月21日(SUN)
這篇會繼續講述老爺大酒店的冬Fun各項特定活動，仲會同大家遊走野天風呂的各種溫泉池參觀，黃昏後便會品嚐到一頓豐富的環球美食自助晚餐添，當然更要夜訪(光豬)洞天風呂啦，不如就立即去睇片囉！
難得有人幫手揸機，就請服務生姐姐給我們何家三友拍下那合照一張.......Smile！
之後何家三友換上浴衣，就立即趕去B1景觀走廊參加冬Fun特定活動「生活創意小物」，今天21號是單日剛好是製作香氛試管DIY！ 『即係做泥膠公仔後加入香氛於試管的小擺設』
每房免費製作一份，咁就派媽咪同囡囡出馬啦，睇吓佢兩個幾咁落力同投入，轉眼間就把任務完成了....yeah....
另一項活動係「出乎意料小吃」，又係要親自落手DIY架，今天單日是吐司大反串，此活動只限房客參加！顧名思義就是採用傳統的食材，配搭意想不到之組合方式，樣平淡的吐司變成不平凡，而且完成品更可以親自品嚐！您話幾咁有趣呢.......
跟住移步到洞天風呂休憩區，玩呢款名為「拖」付終生的趣味遊戲，玩法是要把拖鞋用腳飛踢入竹籮內，在限時1分鐘內攻入三隻拖鞋便能挑戰成功！咁今次就等父女落場啦，最初係漫妹妹背竹籮，我就踢拖鞋，但最終都挑戰失敗，But奇怪事件就在此時發生，咪係改由漫妹妹主踢拖鞋就立馬成功，真的百思不得其解！原來仲有小禮物(糖果包)送添，囡囡認真開心！最後大家有冇留意到我這極濃密希斯髮型扮相，係咪好搞嘢呢，咁就要多得那位主持姐姐的款待囉！
玩完眾多遊戲之後，便走出去戶外野天風呂溫泉區行吓，首先是這個「觀景泳池」，冬季開放時間：08:00 - 22:00 (11月~3月)是溫池水！
如在這裡暢泳確能收視野廣闊，一望無際之效，不過記得要戴番頂泳帽先可以落水架！
再行落啲就來到這個「兒童親水」親水瀑布池、噴泉戲水池，很適合一家大小浸浴戲水架！
這野天溫泉區還有「草本溫泉」「能量水療」「溫泉魚」等多個池區，不過此刻時間唔容許再逗留，因我們約了吃首輪自助餐，咁等食完Buffet再參觀啦！
回房間洗個面小休一會，跟住就去食我們超期待的豐富環球美食自助餐喔！
這裡便是我們今晚的用餐地方，工作人員正在忙碌準備中！
服務生安排好坐席後，我們便分頭出動睇吓有甚麼好嘢吃呢！首先攞幾杯飲品先，右邊黑色的飲料是宜蘭阿蘭城桑椹醋，本人覺得非常非常之好飲，所以整晚都只係攻擊佢.......
囡囡的小型漢堡包加薯條，漫妹妹食Buffet一定蝕將，所以我哋兩人就要努力啲啦！先來今日的二次生魚片頭盤，而這份羊排相當美味，肉香軟腍汁多....勁好吃，唔講您唔知，其實我都是一位羊痴呢架，跟住凍蟹、東風螺、象拔蚌各樣冷盤都幾鮮味！煙三文魚、德國鹹豬腳、法式鵝肝、芝士焗青蠔、款款都各有特色，而味道仲好有水準添！
呢款法式焗田螺勁出位，與那醬汁是絕配！我的肚皮即時收下了五、六隻！
當來到自助煮麵區，即係話又到食麵嘅時間啦，配搭甚麼材料由您自己決定，但千萬別要錯過這鍋蘭陽古典肉燥，講明絕冇添加防腐劑，請儘快食用，片刻間一碗蘭陽古典肉燥湯麵就完成了，我很聽話地儘速把它食完(兩碗).........
據聞台灣的素食文化非常普遍，此間的素食菜式也相當齊備，喜歡素食嘅朋友又可大飽口福啦！
媽咪的餐後果是鳳梨和西瓜，而我同囡囡就勁掃雪糕櫃，兩球、三球來回多轉......今餐認真大滿足呢.........
食飽飽之後回到房間原來服務生已幫我們準備好被鋪，確實服務周到！出得嚟玩又點會咁早瞓呢，咁就來個夜浸溫泉啦！
立馬換上泳裝，速到野天溫泉「能量水療」區間，初嚐這個陶甕靜泡池，每人獨立泡浸，水溫任由調節，確係棧鬼非常！
這個是甦活按摩池，啲馬力都好強勁，睇吓媽咪按摩得幾咁享受！
我就試吓「溫泉魚」體驗，這裡的眾多「醫生魚」會助您足浴SPA，啲魚仔醫生好幫得手架，幫您食哂腳上啲死皮，
浸咗兩粒鐘夠哂皮囉，媽咪同囡囡先行返回房間休息，我就獨個兒去體驗洞天溫泉，洞天是分男女湯浴場，是全台灣首座貫穿室內與露天空間的浴場！咁又無拘無束的浸了半粒鐘！因為沒有拍照，所以請到以下連結望吓：http://www.hotelroyal.com.tw/chiaohsi/facility.aspx?NO=961
房間內有免費wifi可供上網，囡囡餓咗成日機梗係要打番夠本先瞓啦！
我就一於睇電視，掃埋冰箱裡面啲食物同飲品作夜宵，最後當然是睡覺啦！
明天要早啲起床，皆因還有其他溫泉仲未浸過，咁就明天見啦.....早唞......
沒有留言:
張貼留言