那些年 ~ 我們一起再次到訪的台北 Day-2c 第八回「Hello Kitty Sweets 主題餐廳」

2012年7月9日(MON)

 

上文講到，囡囡喺BabyBoss玩得非常開心，不過天下無不散之宴席，時間接近下午3：00，又係時候講拜拜嘞，囡囡都有啲唔捨得，佢又話下次再嚟台灣一定要再玩多次，好一於咁話，由於時間緊迫嘅關係，我哋又係做伸手牌，即係再次打的囉！

 

只須10分鐘左右就到達Hello Kitty Sweets主題餐廳，這時全部團員都準時到齊，我哋係早一日做咗 Booking，所以服務生好快確認就帶我們上二樓坐低，它們準備咗張大長檯俾我哋，三面都係超舒服嘅沙發坐椅....正呀....原來一樓同二樓嘅空間設計係獨立分開處理，二樓名為「Hello Kitty 夢幻風」是以「You are so sweet」的理念來打造的夢幻空間，薄紗、蝴蝶結裝飾還有醉人的淺粉紅色，定能帶妳沈醉在浪漫氣氛當中！

 

而一樓則稱作「Hello Kitty 華麗風」，設置24位寬敞舒適的沙發座席，每位來訪的客人們，都可以盡情享受專業師傅用愛心製作的美味餐點，也可以和好友們一起在圓形吧台前，輕鬆體驗有KITTY相伴的美好時光........

 

另外一樓還設有一個「餐點外賣區」，眾多精緻的Hello Kitty 糕點呈現眼前，如真的不能坐下細味，也可隨心挑選喜愛的甜點外帶回家品嚐！

 

現在帶番大家上二樓欣賞四周的精美設置，無論係紙巾套、卦畫、卦飾、吊燈都印有Kitty個Logo，真係可以話係Kitty無處不在，如果人數唔多或是情侶嘅話，可選擇這款卡位坐椅，每張都能獨立自成一角，佈置與氣氛亦相當浪漫，不過這款卡位二樓只得三張，有買就真係要襯手喇！

 

 

兩位小朋友見到咁多Kitty都顯得異常興奮，尤其是囡囡呢個跳皮的人，就喺這張U字形沙發兩邊走來跳去，叫極都唔聽，真係冇佢乎！

 

 

無時停嘅囡囡又走過嚟同豬永球兩公婆玩吓，如果您們有細心留意嘅話，就會發覺連個檯墊都係Kitty樣架，仲有個Sweets Manu 都好靚，事後諗起真係有啲失敗，忙記攞番套留念添！

 

 

拿拿聲落咗Order就同呀囡四周圍影吓相，話哂都係日本Sanrio 授權的首間亞洲Hello Kitty主題餐廳喎，唔影多幾張靚相又點對得住自己呀.......

 

 

媽咪同囡囡又影！

 

 

跟住到爸爸同囡囡都影，真係影到不亦樂乎，其實唔單止淨係我哋滿場飛，其他客人都不時影來影去，眾人都影得過引非常！

 

我哋今次到訪 Hello Kitty Sweets 只是以High Tea 性質，換句話說可當作為景點遊覽，所以經過一番研究之後，決定只嗌幾款下午茶套餐過吓口引就算嘞，就係上圖呢六款套餐喇，計有左下方嘅「KITTY烤布蕾」，右上方嘅「菓物千層」，右中間嘅「幸福巧克捲」及右下方嘅「提拉密斯」幾款較為美味，這些套餐每款收NT$300，大約港幣$80左右，其實都唔算貴架啦，價錢相對恰可，事關他們強調係聘請五星級飯店專業師傅擔任餐廳主廚，嚴選精緻食材，融入了日、法、義式製作手法，再巧思地加上 Hello Kitty 可愛時尚元素，使得每件蛋糕食品都能從心感受專屬於Hello Kitty的獨創絕妙口味！

各款套餐都會跟飲料一杯，而每杯飲品都會發現有Hello Kitty 嘅影蹤，小女孩們話個Kitty咁Q真係有啲唔捨得飲喎，真係唔知好嬲定好笑咯......不過囡囡就一於唔理，大大啖飲落去，佢話真係好好味呀......呀

 

 

臨走前小朋友通常都要上一上厠所，各位觀眾睇吓，就連個厠所都佈置得咁靚，可以話喺呢間餐廳Kitty到處都會伴隨著您，所以囡囡話要喺度Her 多一陣，咁不如等媽咪幫囡囡影低佢啦，咁有氣氛嘅洗手間話哂都係第一次見識到，真係又要俾個讚佢至得喇......

 

 

最後更係例牌菜喺門外影相留念啦，總括嚟講「Hello Kitty Sweets 主題餐廳」啲嘢食都OK嘅，佢哋最殺食嗰招就係個賣相，超可愛的Hello Kitty Logo，真係啖啖都咁好味，如果您係Kitty迷嘅話，就千萬唔好錯過啦...........

最後埋單食咗幾銀又係唔知到，皆因又係何老闆出頭頂數，咁就又做番嗰個動作，拍吓個囉柚就行人...............

 

餐廳網址：http://www.hellokittysweets.com/

 

 

其實「Hello Kitty Sweets 主題餐廳」距離捷運忠孝復興站只須幾分鐘腳程，今次唔再做伸手牌喇，大家都話想嚐試搭吓捷運「即係台灣地鐵」，咁話時話上次嚟台灣都未搭過捷運喎，咁一於搭捷運去101參觀吓囉！

 

 

從捷運忠孝復興站到捷運市政府站落車，再轉乘接駁巴士即可達台灣101大樓，其實我對這棟大樓冇乜特別期望，不過何老闆話要去，咁咪跟大隊囉，睇吓佢兩個靚妹喺車上玩得幾開心..........

 

大約5：30到達101大樓，講真吖，101大樓唔算好特別只係一個商場， 但如果要上去觀景台參觀嘅話， 大小同價一律收費NT350一位，貴到有啲離譜，基於我哋係知慳識儉之背，更係唔會做老襯啦，不過就見到好多國內同包旅行團一群群咁衝上去，真的強國即係強國，心口永遠都係掛住個勇字嘅，果然利害...........

 

 既然唔上觀景台遊覽，咁咪四圍Hea吓影吓相囉，即時仲搵倒位台灣帥哥仔幫我哋揸機，一幅被名為台北101大樓仲夏火辣辣之旅大合照就此誕生喇，之後就相良晚飯搵啲乜嘢食好，我就提議不如食麻辣火鍋吖，嚟到台灣唔食麻辣火鍋又點得呀，好....沒有任何異議，咁就即刻至電做個.Booking，我哋揀選咗「瘋麻辣 (頂級鴛鴦麻辣火鍋)西門町店」，預約咗夜晚7：00 十二位，咁咪拿臨打的過去囉，因何台灣咁多火鍋店唔揀，唯獨揀選呢間啦，喺度賣個關子先，下一篇再同大家介紹這店好食與否.......

 

 

 

 多謝收看.......下回再續.......

 

 

 

 這篇文章曾於故居內發表:  http://blog.yahoo.com/andygundam/articles/page/1