那些年 ~ 我們一起再次到訪的台北 Day-1e 第五回「重遊 - 士林夜市」

2012年7月8日(SUN)

 

經過半個月的狂熱奧運洗禮之後，本人身心都覺得有啲疲倦，皆因每日睇直播都睇到通宵達旦，真係少啲內丹都頂唔住，不過大家放心，我又返來囉！

上文講到：由淡水回程時在車上發生咗一件火事，請各位放心，當然唔係自己友吵架啦，主角係那位黃大哥，咪就係司機叔叔囉，真係容許我再叫你一聲大哥呀！事原在回程台北時這位大哥叫我哋不如順路去埋夜市先啦，我第一個反應就係天都未黑整，同埋正餐( 晚飯 )都未食就去行夜市掃街感覺上有啲怪雞，所以經眾人相良之後都係照原定計劃，先回酒店稍作休息，再去鼎泰豐「永康街店」食晚飯，那時這位黃大哥聽到已經開始黑面，又再話去永康街唔順路喎，我聽到佢咁講個心就立即起火你真係檔我哋係新嚟o架，咁嘅說話都講得出，西門同永康街距離幾遠我唔知，我哋租咗你車就係我哋話事，只要未夠鐘我話去邊道都得，你嘅責任係送我哋到目的地就得嘞，當時真係想罵义佢，不過何老闆話俾次機會佢，理由係仲要用車幾日，但其實我有啲唔同意，覺得如果佢服務咁唔好，大不了咪同佢公司講換人囉，不過我份人就好公道嘅，大家話睇吓點先，好...就俾次機會你.......

 

 

出得呢玩係咩嘢呀？最緊要就係玩得開心，就唔同你計較，大約一個鐘頭車程就到達酒店，一連兩晚入住嘅台北「捷絲旅」西門店座落於中正區中華路一段41號，

酒店網址：http://www.justsleep.com.tw/

 

Just Steep 酒店係位於一棟商業大廈內的其中幾層，係現時西門町裡數一數二嘅精品酒店，主打著重乾淨整潔，地下簡約嘅接待處一眼就睇哂，餐廳喺四樓，唔講咁多嘞，周身大汗，拿拿聲搞掂Check in手續就衝上房休息先嘞...
 

當接到房門匙就發覺有好事發生，原先我哋booking 係 3 間雙人房，1 間三人房，現在服務生話得番兩間雙人房，換句話講有一間會Upgrade為三人房，聰明嘅您都應該估到，受惠者就係我們本家三友嘞，最初以為三人房啫無乜大不了吖，但當開門一望，嘩.......間房真係大到冇朋友呀，三張10.5坪大床，40" LCD 大電視，連書枱都有兩張，全房間都油上純白色，再配以淺啡色木器傢俱，令人望落去有種非常整潔舒服的感覺，囡囡都覺得非常之興奮喎，見佢喺三張床之間跳來跳去，真係樂此不疲，後來先知這間係豪華三人房，旺季時要成NT4000一晚o架，仲好似係每層只得一間，呢次真係執嬴，連何老闆都話大過佢嗰間三人房喎，咁冇辦法啦，鬼叫我哋係靚仔靚女咩，係着數啲o架啦.......哈哈，認識我嘅人都知我係「蒙古大汗」一名，所以立即沖番個凍水涼先，真係爽呀，之後約咗7：30 落大堂集合，咁大家都好準時，好嘞.....即刻出發去鼎泰豐食晚飯咯........

 

架車都算準時嚟到，遲咗五分鐘啫，因為個個都開始肚餓，咁就叫私機速速出發，當旅遊車途經凱達格籣大道時又俾我影到幅總統府夜景，十年前只見識過它的日間面貌，原來晚上景色仲靚，點解選擇去永康街嗰間「鼎泰豐」信義店開餐呢，皆因可以順道走訪埋有110 年歷史嘅度小月擔仔麵，仲有永康牛肉麵「川式香辣牛肉麵」等有名店鋪，不須10分鐘車程就到步嘞，仲只係等咗五分鐘就有位添，服務生帶我哋上三樓貴賓房，一入到去有個似曾相識嘅感覺，想當年都係坐獨立一間貴賓房，現場環境亦都很相似，不同之處係我和何老闆都有了小朋友親子同行....唉...真係時光轉眼飛逝，十年人事幾翻新！....感觸.....感觸！

 

仲感觸乜嘢吖，睇吓各人都肚餓非常喇，拿臨落單快啲有得食咪仲划算，咁嘅盛大場面，梗係要服務生幫我哋影番張團體相啦......yeah

99號枱非常好意頭，祝各位友誼長長久久，嚟到台灣點能夠唔試吓佢哋嘅啤酒呢，金牌台灣生啤係我哋今晚嘅選擇，可能係水質嘅關係，味道都感覺好清新可口，一啲都唔差喎過得去吖，其實講乜都係假嘅，我同豬永球呢啲酒鬼，有酒飲就 happy o架啦...

 

佢哋上菜都好有效率，話咁快就有得食喇，招牌菜小籠包就一定要嗌，今次仲試埋佢個蟹粉小籠包添，兩種都非常之有水準，乾撈麵類就叫咗擔擔麵、酢醬麵、麻醬麵、台灣啲乾撈麵真的特別好食，我哋差啲連個碗都食埋呀陰公，湯麵就有菜肉餛飩麵，這個就比較普通無乜特別，其他食品有燻蹄白肉、餛飩乾拌蝦肉、蝦肉煎餃等等，各樣佳餚都食到津津有味，就係因為太過好食，咁咪食大咗囉，最後飽到無辦法再去探訪度小月同永康牛肉麵兩位朋友添，咁冇計啦，我哋下次有緣再見啦..........

呢餐飯又係唔知食咗幾多銀，皆因又係何老闆俾住先，咁就拍吓個籮抽就走人，落到樓下仲見到啲師傅好努力製造小籠包，招牌美食吖嘛，係要做到冇停手o架啦！我哋約定私機大佬 9：00 喺門口接應，跟住下一個節目就係去士林夜市行街街........咁就繼續跳舞......唔好俾佢停呀.......

 

在車上各人都很期待行夜街這個壓軸好戲碼，但就在那刻，呢個私機大帝又開始發作，佢就話帶我哋去一個較為地道嘅夜市，又講嗰度比較有特色，路程又啱啲「後來先知原來係啱佢順路收工就真」，又七又八咁，聽佢講到眉飛色舞咁，大家咪話信個地胆一次咁多囉，大概15分鐘車程，就到達這個名叫雙城美食街的所謂夜市嘞，咁嗰條粉腸大帝就立即收錢走人，因為我哋係同租車公司講要續天計數，呢個做法好處係對編排行程更加有彈性，皆因天氣嘅嘢，好難預計架嘛.......

好嘞.......講番呢處夜市先，從落車開始已經覺得唔係好對路，這裡環境就好似香港油麻地老廟咁，只係得啲食物掛檔，最弊就係細到得兩條街咁大把，轉個圈就行完，我就唔覺得佢有乜嘢特色嘞，特別細就有佢份，又俾條大帝老點咗一次添，其實我有提議換人架！不過大家都話用多一兩日啫，算數啦，我都好聽大家意見嘅，好....再忍多你一次，唔通咁掃興就返歸咩，梗係唔得啦，最後眾人決定打的去士林夜市繼續行街街喇.........

 

我哋分別四人坐一部的士，話咁快就到咗士林夜市，話時話台灣啲的士又確係幾抵搭喎，計起嚟每人都唔使HK$10，因為今日一早起身就玩到依家，所以囡囡上咗車冇耐就瞓着咗喇，咁辛苦啲都冇所謂啦，一場嚟到唔通咁快走咩，呢邊士林夜市真係熱鬧好多，人聲處處，仲有個新市美食百貨廣場添，換言之即係衣、食、住、行樣樣齊全，咁先似樣架嘛，同各團友約好集合時間之後，即時火速作鳥獸散，各自尋找心頭好嘞.......

 

此行我都有啲砍獲，我同韋爵爺都買咗對唔知乜嘢皮嘅涼鞋，NT400 認真抵玩，行行吓阿囡終於都瞓醒喇，好攞.....一天都光哂喇，快啲自己落地行，跟住梗係搵啲嘢咬吓啦，天氣咁熱整杯凍飲先，就呢檔啦...金桔檸檬加蔓越苺，大杯700cc NT40超抵飲，酸酸甜甜好過引，最緊要係冰冰凍嘛，囡囡好喜歡食魚旦蛋架，咁啱撞倒豬永球又喺度買魚蛋食，咁就搭單要串綜合魚蛋啦，不過原來大部份魚蛋都係辣既，所以囡囡食咗兩啖話好辣就唔食咯，Carrie大人都食咗一粒，剩餘嘅梗係我呢條大白鯊掃哂，辣得嚟又幾好味喎...........直到10：30 集合時間，所有團員都到齊，但係豬永球佢哋話好似唔係咁夠皮，話要過埋士林市場嗰邊掃街，其實我都好想去架，知不過大人話有啲攰，阿囡又話腳仔軟，既然兩條女都話走咯，咁咪只有懷着依依不捨嘅心情打的返酒店囉，士林再見喇......

以下就同大家分享士林的兩個市集，士林夜市是台北市最具規模的夜市之一，士林夜市可分兩大部分，一是捷運站對面的臨時集中市場，在2005年11月24 號日正式啟用至今，二是以陽明戲院為中心，擴及文林路、基河路，以至大東路與大南路都算是士林夜市的範圍內，這處商家林立，週邊範圍非常之廣泛，再加上各式各樣的百貨商品及經濟實惠的惹味小食，不時都能吸引各地遊客及當地民眾為此慕名而來架，我哋咪就係行咗呢個範圍囉！

又係話都冇咁快就返到酒店，喺 Just Steep 酒店隔離就係間7仔便利店，咁就認真方便嘞，買夜宵唔哂周圍搵嘛，呢個就係台灣7仔嘅Logo人物，雖然唔知佢叫乜水，但都同佢影相留念啦，見阿囡今晚冇乜食過嘢，就買個來一客杯麵俾佢食囉，買完就即刻上番房休息喇！

 

囡囡好快就搞掂個杯麵，跟住佢就同媽咪一齊沖涼，然後火速上床瞓覺，皆因明天有個重點旅程要去，所以要養精蓄銳！不過我呢個夜鬼就唔同，通常我都係最後一個瞓嘅，今日小小砍獲，淡水名物阿婆鐵蛋兩包，第一天行程完滿結束........多謝收看........good night.........

 

 

 預告：Day 2 重點行程 Baby Boss 職業體驗任意城.....敬請收看.........

 

 

 

 這篇文章曾於故居內發表: http://blog.yahoo.com/andygundam/articles/page/1