2012年7月9日(MON)
一宿無話，好快就天亮喇，又係大人最早起身床，跟住就到我，梳洗完畢之後，就諗住叫醒阿囡，點知都未 call 佢，囡囡就自動彈起身，連隨非常之合作，三兩吓手腳就搞掂哂，同平日懶洋洋的她判若兩人，我哋諗可能係阿囡知道今日會去Baby Boss 玩，所以心情既輕鬆有興奮，因此效率都特別高，今日我哋會同大隊分開行動，我們就去 Baby Boss，佢哋就會喺西門町行街街，之後約定下午喺Hello Kitty Sweets 餐廳會合，Tea 番個下午茶，好喇仲講，都8：30喇，仲唔快啲落去食早餐....知到啦大人.....
餐廳就喺四樓，地方唔算大，不過都坐得好舒服，係Buffet 型式，比起其他酒店就稍為小型咗啲，但通常有嘅麵包、腸仔、炒蛋、煙肉、多士、橙汁等等都有整，仲有多款乳酪飲品可供選擇，質量都算OK 嘅，原來大家不約而同都到整食早餐，我哋用咗大半個鐘時間就搞掂食完，同佢哋Say Goodbye後，就立即起行搭的士去今日嘅重頭景點，兒童的可愛天地Baby Boss 職業體驗任意城......
當坐緊的士嘅時候囡囡問點解喬喬姐姐唔嚟喎，呢個問題我都有問過何老闆，佢嘅答覆話當喬喬聽到Baby呢個字就已經無興趣去囉喎！又會咁嘅！其實喬喬都係大囡囡一年啫，真估佢唔到.......
當坐緊的士嘅時候囡囡問點解喬喬姐姐唔嚟喎，呢個問題我都有問過何老闆，佢嘅答覆話當喬喬聽到Baby呢個字就已經無興趣去囉喎！又會咁嘅！其實喬喬都係大囡囡一年啫，真估佢唔到.......
20分鐘倒車程，車資NT200就到達松山區八德路四段138號京華城嘞，BabyBoss就喺京華城七樓全層，我哋到達時剛好開場時間10：00，咁就即刻買票啦，大人NT$500，小童NT$900，記住帶Passport 去呀，遊客可以打個八折俾您，小姐咁就唔該兩大一細吖，搞掂就爭取時間快啲入場喇，當入場時工作人員會幫各位帶上一隻電子膠帶，咁樣就能配對成為同一個家庭組群，也方便佢哋管制出入，因為小朋友在場內至少要有一名大人陪同。每位小朋友都會得到一張印有身分證字號及條碼的「市民証」，每位小市民必須要努力工作賺錢，咁就事不而遲，囡囡立即去搵工做喇......yeah..
好嘞....囡囡開工喇，佢嘅第一份工就喺光泉牧場裡面當牧場主人，牧場工作主要係幫牛牛清潔同埋擠牛奶，體驗時間大約30分鐘，話咁快就收工咯，之後『任意姐姐』就出糧俾囡囡，係BabyBucks 薪金呢架......yeah，阿囡咁就賺到佢人生裡面嘅第一桶金.........嘻嘻
跟住睇吓個時間表，仲有五分鐘消防局就開始請人，咁咪立即跑過去應徵啦，好彩趕得切，因為做消防員好熱門架，而每場只限10個小朋友入伍，同樣體驗時間大約30分鐘左右，當『任意哥哥』點好名之後，媽咪即刻幫囡囡換上醒目消防裝束，OK哂啦準備入局嘞！
一個個小消防員坐低聽哥哥講解消防工作，就喺呢個時候，火警鐘响起，所有小消防員要立即出動，囡囡最細粒所以行到最尾，仲要局長幫手滑消防柱落去，連戴消防帽都要人幫手，真係唔該哂局長哥哥囉，跟住好快上哂消防車準備出發去救火.........
，
要知到呢位小消防員有幾論盡，放條片過您睇吓咪一清三楚囉！
，
嗚咽嗚咽...消防車高速到達火場，起初囡囡幫手圍住火場範圍，但係火勢非常之猛烈，及後囡囡都要加入幫手救火，睇吓佢開喉救火個樣幾認真，條滅火喉真係有水噴出呢架，囡囡話好好玩呀，得到呢班小消防員咁努力嘅一番搶救下，火勢好快就受到控制，火警亦都很快完結，咁就即時收隊回局，今次這群小消防員又一次成為人民英雄喇........
咁英勇嘅小消防員，媽咪梗係爭住同佢影相啦，之後又係領取薪俸嘅時間咯，囡囡話好嘢又賺到BabyBucks 喇.......
咁啱消防局隔離就係警察局，時間又啱啱好，咁囡囡的第三份工作就係做警
察囉，警察局每場人數最高可達20人，體驗時間30~40分鐘，每位小朋友都換上醒神嘅巡警服，在『任意哥哥』的帶領下，勇敢的小警察開始喺 Baby Boss City 內巡邏，維持治安，佢哋分成兩個人一組，手拖手前進及一路嗌着1、2 ，甚為威風，阿囡仲係帶頭嗰個添，佢哋途中仲會學習攻擊，睇吓囡囡個牶頭仔出得幾直，哥哥又會教導怎樣埋伏追擊敵人，行動當中非常之有娛樂性，囡囡都話好鐘意呢個職業喎.......
這就小學警出更的英勇片段哪！
當巡邏一圈之後知道冇乜特別事發生後，就返回警察局落班囉，醒目女又完成一項工作喇，又係出糧時刻，哥哥唔該哂...............yeah
這篇文章為新修定版本，當中加入了一些有趣的影片！
而舊版本文章曾於這裡發表: http://blog.yahoo.com/andygundam/articles/page/1
沒有留言:
張貼留言