那些年 ~ 我們一起再次到訪的台北 Day-2b 第七回「Baby Boss 職業體驗任意城」下篇

2012年7月9日(MON)

 

好休息了一會，又要出去搵工做哪，囡囡努力呀........

 

做完威風凜凜的小警察之後，時間最夾嘅係去醫院打工，咁就立即趕過去睇睇，弊嘞，見到好多小朋友喺度排隊，咁咪分分鐘冇得玩，即刻上前了解清楚，問過工作姐姐先知道原來醫院係分開3 part 嘅，計有急診室、育嬰室及手術室三種，現在三個室都有位，我哋心目中估計囡囡會選擇育嬰室，因為女仔多數都喜歡同BB玩，最終囡囡亦都揀咗喺育嬰室當護士，知女莫若父母吖嘛！

 

咁就拿拿聲霸番個靚位先，皆因育嬰室前面係有好大塊玻璃窗俾你哋幫小朋友影相架，囡囡入到麗嬰房第一時間抱住個BB走埋位，藍色毯包住係男仔，粉紅色毯包住係女仔，大家準備好就跟住姐姐開始照顧BB 喇，首先同BB換咗尿布先，跟住同佢按摩肚仔，之後再喂BB飲奶，最重要梗係幫佢掃背啦，最後放番BB上嬰兒床就可以收工架喇.......

 

除咗要照顧BB之餘，囡囡重要親手喂奶添喎，睇吓佢幾認真同投入！

 

 

終於都係時候收工哪，臨走前要同BB包番好張毛毯，咁就走得啦！

 

囡囡好滿足地接過護士姐姐發放的薪俸，佢好叻呀咁怏就打咗四份工，仲賺咗好多BabyBucks添喎，本應夠哂BabyBucks去pizza屋學阿茂整餅，點知時間唔啱，但又想帶囡囡去玩全場最熱門嘅職業，就係航空公司裡當飛機師或者空中服務員嘞，因為之前媽咪嘗試幫囡囡排住隊先都唔得呀！

我哋諗咗一諗，就決定玩咗航空公司先，之後先至去做 pizza 師傅，如果一切順利嘅話，太空穿梭機會係最後一份職業選擇，我哋火速到達復興航空公司，囡囡都諗咗一陣，最後決定做飛機師，皆因每場只有六個飛機師席位，物以稀為貴吖嗎，喺航空公司坐低排咗一陣，見都唔係咁多人啫，咁啱隔離
係加油站有車車坐，咁就俾阿囡過去走番轉先囉，不過要收10元BabyBucks架，無所謂啦，還定啲BabyBucks都用唔哂嘅，咪算豪俾佢囉......

架車載住囡囡繞場一週之後，復興航空公司的航班又就準備起飛喇，請駕駛那班飛機的機組人員到工作室集合，有勞機長哥哥幫囡囡穿著整齊的飛機師制服，睇吓阿囡即時醒目萬分！

 

跟手攞埋個機師皮包就步向登機閘門，就在機長哥哥的帶領下，此刻.......一幕精彩的衝上雲霄馬上上影.......

 

一個個威風凜凜的小機長首先登機，跟住就輪到一班空中服務員小妹妹，那時先知原來當空中服務員的家長可以上埋機扮乘客架，咁樣又真係幾過引喎，不過做機長都唔錯吖，始終佢都係全架飛機最重要的人物，我哋雖然冇得上飛機，但地面都設置了兩部電視機，可清楚睇到囡囡喺駕駛室裡面的一舉一動，仲會有攝影師哥哥幫阿囡影番張機長威水相添，時間過得真係快，航機即將降落喇，小機長們一馬當先落機，睇吓囡囡係最細粒嘅機長行得好慢，跟住佢哋所有機組人員排成一線，家長們...又係拍照時段，阿囡話要整番個Chok樣先夠型嗎，最後梗係又到出糧時刻，睇吓囡囡身後面嗰位哥哥仔笑到牙都差啲飛埋出呢，出BabyBucks啫，又唔係真錢，使唔使咁誇呀！！

yeah.....搞掂咗第五份工喇，咁就唔好俾佢停囉，接住向第六份職業進發....

 

時間真係好趕急呀，本家三友一齊飛奔去披薩屋，去到都見已經排滿人潮，可幸是披薩屋每節可容納16名小師傅，囡囡啱啱就係第16名，真係好彩嘞，喺披薩屋當pizza 師傅係要俾35元BabyBucks做材料費架，所以通常都要先打幾份工，當賺夠BabyBucks 就可以參與製pizza 這個職業喇，咁媽咪首先幫囡囡著上圍裙，之後戴埋廚師帽及口罩，因為要保持衛生潔淨，皆因最終製成嘅pizza 係可以自己品嚐番架喎！

 

好嘞.......咁多位pizza小師傅開始親手DIY自己的獨有pizza，首先見囡囡用碌圓形木棍壓扁塊麵粉，再用义仔喺上面拮孔，用意應該係防止漲起，跟手放入玉粟米粒及肉醬等材料，最後就要「任意姐姐」幫手烤焗，須時5分鐘倒就完成喇，囡囡親手製作嘅愛心pizza就出爐喇，仲會有個紙袋仔裝住，相當精緻.........

 

yeah...得咗，有糧出，又有得食有得玩，真心誠意推介這份職業，時間緊迫望吓個錶先，仲有5分鐘太空穿梭機就要開場囉，又係要用跑嘅方式走過去，

今次終於冇咁好彩喇，去到剛好係第10 個，因為每場太空人訓練只得9 個名額，頂.....真係有啲唔順氣呀，不過都冇法旨啦，咪檔留番下次再玩過囉，此時其他職業都進入休息時刻咯，「通常下午2：15 - 3：15是休息時段」，咁見囡囡今日都打咗六份工啦，不如算數啦，搵個地方坐低慢慢品嚐吓阿囡呢
個愛心pizza 咪仲好，仲熱辣辣嘅pizza 就分成四份，囡囡胃口好好食咗兩件，我同媽咪各分得一件，但個pizza味道又真係幾唔錯喎，阿囡妳確係有料到，之後仲喺紀念品店買咗多少物品留念......

 

 

見離開3：00仲有多少時間，不如就四圍影吓相啦，事關之前掛住衝鋒陷陣都未有影過甚麼相，其實Baby Boss 隨咗全天場之外，仲設有白天場10:00- 15:00及傍晚場15：00 - 20：00 兩種，我哋今天就係玩白天場！

 

臨走時見到全體「任意哥哥姐姐」喺入口處載歌載舞，係Baby Boss嘅主題曲嚟架，佢哋好歡迎小朋友們加入一齊玩架，囡囡講到跳舞又點會同您客氣呢，咁咪一齊玩盡佢囉.....yeah.....

 

帶著依依不捨的心情離開Baby Boss「我指係囡囡嘅心情」，發現京華城外面啲景色都幾靚喎，一場嚟到失手勢就唔好啦，其實京華城個外觀都幾趣怪架，深啡色大圓形好似個大蜂巢咁，喺度發覺台灣政府有時都幾細心喎，皆因睇見四處都設有噴水霧裝置，時夕夏季天口咁慶，確係做到給市民一種消暑涼快嘅感覺.........抵讚........

 

 

睇吓佢哋兩母女玩得幾開心，真係可以講話玩到飛起，有細心留意嘅朋友是否發現囡囡件衫已經唔同咗，其實係之前臨走時換嘅，係粉紅色Kitty T恤嚟喎，為咗配合下個行程而特定安排架，因為我哋Book 咗 Hello Kitty Sweets主題餐廳嘆下午茶吖嗎，真係高潮一浪接一浪，咁就馬上飛的士過去喇，要其他團友等就唔好啦.........

 

下回預告：小朋友心中的致愛卡通人物 ~  Hello Kitty Sweets 主題餐廳

 

..........即將不日上影！

 

 這篇文章為新修定版本，當中加入了一些有趣的影片！ 

 

 

 而舊版本文章曾於這裡發表:  http://blog.yahoo.com/andygundam/articles/page/1