那些年 ~ 我們一起再次到訪的台北 Day-1c 第三回「淡水紅樓 ~ 午宴」

2012年7月8日(SUN)

 

上文講到，當我哋前往紅樓之際，突然發現有位團友太太行緊之字步，仲見佢腳步浮浮添，咁梗係立即叫佢坐低唞吓先，跟手俾支水佢飲，睇佢應該係缺水，有少少中暑症後群，等佢休息咗一陣好快就回復番哂冇事喇，聽番佢講可能係低估咗啲天氣溫度，所以暑期去台灣真係要特別小心，因為真係實在太熱好易中招o架.......

 

可能係發生呢件事嘅關係，我哋竟然錯過咗正門入口，行行吓覺得有啲唔對路，好在仲識問吓路人甲，佢就指咗我哋嚟呢個入口，原來紅樓係在兩邊都可入得，見到呢個牌就包冇搵錯啦.......

 

紅樓是建於山坡上，都要行上二、三十級石梯先可到達，眼前的古舊建築物就是紅樓，紅樓是富商李怡和建於清末的宅第，建築用料亦都非常講究，於建造上運用北投出產的唭哩岸石做為一樓內牆，二樓內牆及外觀牆面則運用不同形狀的清水紅磚做變化，是同時期洋樓建築所少見，然而由他所經營的兩艘貨船發生意外，經濟出現困難而將此樓在1913年轉賣給當時的淡水街長洪以南。洪以南在成為這棟紅樓的主人後，為它取了「達觀樓」的雅號。洪以南逝世後，其家人移居台北，紅樓因而閒置。之後該建築在2000年整修完成，之後就成為了現時的紅樓餐廳是也。好嘞.......講古完畢.......繼續去片.......

紅樓一樓係中式餐廳，三樓係Red 3 Cafe西餐廳，咁我哋當然唔會考慮中餐廳喇，因為一入到去發覺冇乜景觀，但就唔使等位，最後大家決定上三樓睇睇先，咁就即刻衝上三樓問吓有冇位啦，個侍應妹話 Full Booking，即時真係有啲失望，皆因見到三樓個景觀比起一樓靚得多，當下立即發揮香港人嘅精神，就係死纏爛打，可能就係咁個侍應妹怕咗我哋，亦都咁啱有檯客剛好埋單，咁就好喇....我哋終於等到位食紅樓午宴嘞....

一樓中餐廳啲佈置都好靚o架，如果唔介意冇景睇都可以嚐試吓嘅！三樓Red 3 Cafe 門邊牆上的美麗掛畫，咁鬼靚影低佢先.....

 

人字型樓底亦有相當高度，屋頂掛上水晶吊燈，甚為美觀！

其實我哋面前就有張長嘅吉檯，但係佢話有人訂咗，唔俾得我哋坐喎，咁坐係度等妳執好我哋張檯都得啩！歎番吓冷氣先.

兩位小朋友開始等到有啲悶，不如打遊戲機解吓悶啦......都好喎...

 

唔知點解嗰檯客話走都擾攘咗成半粒鐘先肯走，搞到我哋成三點先有飯閞..

 

 

千辛萬苦終於埋到位喇，嗱嗱聲落Order因為小朋友已經好肚餓！睇吓個杯墊上都印有紅樓個網址喎：http://www.rc1899.com.tw/

嘩......正呀.......冰水呀，即刻隊番幾杯補充番啲水份先.....

首先送到係冰凍飲品，鮮果凍紅茶及青檸特飲都好正，應該係話咁熱嘅天氣飲乜都覺得好飲o架啦，何況係凍飲添.......

因為之前已經掃咗一陣街，又唔覺特別肚餓，所以只係Order 幾款下午餐食吓，咁好快就有嘢食嘞，呢碟係卡夫餅配朱古力忌廉，中間嗰杯係糖漿，先將朱古力忌廉加在卡夫餅上，再倒入少量糖漿進食，非常美味.... 呢客好似係叫紅樓三文治啩，睇個樣同公司三文治差唔多，但係佢啲火腿就
特別好味，份量十足相當抵食.......意式蘑菇雞肉焗飯，比一般意大利飯煮得較為軟身，材料同啲飯都好配合..Yummy

蛤蜊意式鮮茄意大利麵，蕃茄同蛤蜊都非常新鮮，意大利麵軟硬度亦煮得啱啱好，醬汁都好入味，非常好食......囡囡好鍾意食意粉o架，睇佢好食到唔停得手，食到成個大口妹咁，真係失禮哂.........

 

 

何家三友對紅樓啲食品都好滿意，咁確實又真係幾唔錯喎，如果嚟開淡水玩可以過去試試o架！

 

紅樓除咗嘢食靠得住之外，佢哋個室外露台景觀確係一流，在此可俯瞰淡水老街一帶風貌。如果坐喺這裡一邊食嘢一邊欣賞景況，都咪話唔正抖，不過今日天氣咁熱，梗係人影都冇隻啦！

 

咁靚嘅景觀我哋又點會放過呀，臨走前一齊出去露台影相留念囉，靚景.....靚位.......靚人.......靚絕........真係絕到冇得再絕呀......

最後再係紅樓前來一張總動員全體照，咁就攞足100分啦！

 

 

 

 待續...................下一站個景仲靚呀
就係情人橋睇日落............敬請留意

 

 

這篇文章曾於故居內發表: http://blog.yahoo.com/andygundam/articles/page/1