觀塘「雲南啊老表黑山羊湯米綫」

2012年7月21日(FRI)

 

一講起食，真係人都特別精神，近期喺觀塘開咗間幾有特色嘅米綫專門店，買米綫咪米綫囉，點解要稱它為專門店呢，皆因佢哋只得兩款米綫可供選擇，主要買的是黑山羊湯鍋米綫，其次是豬骨湯豬手米綫，亦沒有甚麼大路小食供應，這麼奇特的店，就等我嚟試吓佢嘅味道啦......

 

 

都話咗係奇特嘅食店啦，當我哋一坐低就發現有個老外喺度騰出騰入，有時就幫手執碗碟，一有人客埋單佢就走去收錢，究竟呢位老外係乜水，無錯嘞..佢就係士頭公來自澳洲嘅Richard，問題就嚟嘞，點解一間咁中國化，名叫雲南啊老表黑山羊湯米綫店會有位老外做主持呢，其實我諗連佢自己都唔知

點解，因為答案就喺廚房入面？

睇吓廚房入面正在有位靚姐喺度忙緊，聰明的你都會估到啦，佢就係老闆娘Wendy，Wendy係雲南苗族人，來港生活已經20多年，4年前係澳洲認識咗Richard，仲一年後結埋婚添，但始終唔適應彼邦生活，咁就決定回流香港，Wendy老家以前係經營米綫生意嘅，所以順理成章就開米綫店啦，但香港買米綫的店多如星數，要突出自己，就要做得專注啲，不如就買家鄉的正宗羊肉米綫啦，就係咁樣開咗呢間舖喇.......

 

全店命脈就在於Wendy落足料熬製嘅羊湯，聽講話會用上兩三隻羊熬喎，佢哋選用羊肉都好講究架，係原隻由蒙古運來，正宗蒙古黑山羊嚟架！

牆上面就係只得呢個簡單嘅餐牌，一眼睇哂，米綫只分大小碗，羊肉就有帶皮或净瘦，都有四款丸子可供添加，如果冇記錯時菜每碟8元。

好嘞....終於入正題喇，雲南口水雞$20 碟，唔太大碟，剛好兩人份量，食落幾有雞味，不過都真係幾辣，可以講話係越食越辣，我就食得好過引，但係大人就頂唔順太辣，所以佢净係食雞冇點汁就好啲.....


我嘅帶皮羊肉米綫$29 小碗，老闆娘會於每碗米綫都加入少量羊油，用意係提升香味，咁就事不宜遲立即開動喇，一啖咬落去羊肉相當軟腍，一啲羶味都冇，但又充滿羊肉香味，湯面浮現了一層薄薄的羊油，飲落特別鮮甜，羊肉其實都係我嘅致愛，所以呢碗米綫我的評價非常之高o架........

小碗真係有啲唔夠皮，下次一定要食大碗先得！

太太一向怕羶唔食羊肉嘅，所以佢就叫咗碗秘製家鄉豬骨湯豬手米綫$29 小碗，豬骨湯底都幾香甜，唔太油亦不覺膩，豬手係先炸後燜，外皮帶點爽脆，啲米綫軟硬度都適中，大人都話好食.....咁就畀個叻佢啦.....值得推介！

 

臨走時仲同Richard影番張合照添，佢態度都好rice，咁好嘅店，價錢又咁大眾化，唔畀隻手指公過佢，仲可以畀啲乜嘢佢喎........

本人誠意推介此店..............

店舖地址：觀塘廣場G26-27號舖

營業時間：11：30am-21：00pm