那些年 ~ 我們一起再次到訪的台北 Day-1b 第二回「台北到著~初會淡水老街」

 

2012年7月8日(SUN)

 

經過一個半小時機程，航機好快就降落台北桃園機場，話時話CX啲機又真係幾定o架，完全感覺唔到佢飛緊.....

 

航機即將拍好位，我哋要準備落機哪，從窗邊看到台北一樣是天朗氣清...Good Day

 

真係世界真細小..小..小，小得真奇妙..妙..妙，喺機上都撞到同學仔，咁有緣就拍個照先啦.....yeah 嗚.....嗚.....小火車嚟喇，佢哋三個由落機玩到去Counter，不知玩得幾開心..

過關當然亦是非常順利，因為入台證一早已經喺網上搞咗，只要喺台灣內政部網篇裡填寫簡單資料，佢哋會即時審批，之後入台證就可列印出來，非常方便.....網址：https://nas.immigration.gov.tw/

 

 

過咗關後記住睇清楚呢個牌喎，咪一陣間唔知去邊度攞番啲行李呀，我哋啲行李就喺2號行李帶處，快啲去攞行李先！等緊攞行李時無聊一影.....全體攞哂行李後就快步步往接機大堂，小朋友當然又有專車坐啦......

 

已約好租車公司12點正喺出口舉牌迎接，冇錯嘞Andy ho就是本人...

 

接機嗰位阿姨帶我哋去到觀光服務中心隔離處等，仲問我哋是否要買電話咭同換錢，換錢就不須喇，電話咭就買咗四張，每張NT$500無限上網四天，相當低玩！

等待嘅時候最好就係同兩位小女孩影多幾張靚相啦...笑吓....

 

 

終於搞掂哂，阿姨就帶我哋出去停車場處上車！

各位觀眾 ~ 呢架就係我哋租嘅戰車，全白色日產原裝20坐位中巴，仲要係新車嚟添，今年初先剛剛落地，所以冷氣非常充足，第一個感覺良好.....

 

 

女士小孩先上車，男士就要處理好行李之後第一時間衝埋上車，因為這時已經感受到台北酷熱氣溫的利害，同我哋服務嘅私機大哥係黃先生，不過覺得黃大哥比較少嘢講，靜咗多少，唔好理佢咁多，好....各位....台北四天好玩豪華團要立即展開，首先行程的第一站就係台北近郊淡水.......出發......

 

 

當架車行咗無耐，突然間諗起，就係我哋唔記得買番啲飲品同大量嘅水，之後喺途中見到間7-11便利店，立即落車衝入去掃貨！買住12支水救吓命先，嗰兩罐啤酒係我同豬永球嘅，嚟到台灣梗係要試吓人家啲啤酒吖嗎，我哋仲買咗好多薯片之類嘅小食上車食，小朋友喜歡食嗎！韋爵爺仲買咗幾隻茶葉蛋食吓，味道都唔錯喎，啲茶葉味好濃郁，完全入哂蛋裡面，再加上本人喜愛食蛋，所以非常之Like佢......除咗一般便利店食品外，還有日式關東煮食物供應，有辣有唔辣，真係都幾
特別...

 

用咗大半個鐘頭時間我哋就嚟到淡水，首先梗係行吓條老街先啦，不過天氣真係好熱，行得嗰幾步阿豬永球又話要買嘢飲，咁就要杯蜂蜜苦瓜汁試吓啦，味道怪怪的，麻麻地好飲，不過就認真夠凍，解吓喝都無妨嘅....

仲有其他即榨蔬果汁都幾低飲喎，仲買四送一添，計起嚟大約港幣$15一杯！點解會揀苦瓜汁飲呢，就係見到呢張紙推介囉......頂.......睇吓豬永球個身形就知佢每日都要進食大量食物，所以轉個頭佢又買烤魷魚食，真係正一掃街王......

高家勁好味烤魷魚又確係燒得幾香喎，啲香味幾里外都聞得到，味道就同普通烤魷魚差不多，冇乜驚喜，用嚟咬吓口都OK嘅！

 

好嘞.......大人掃咗一輪街之後，到兩個小朋友開始有啲肚餓，要搵地方食午餐喇，因為正直中午烈日當空，睇吓我哋三個熱到滿頭大汗，其實應該係話全身

都出哂汗至啱，真係要搵間有冷氣嘅食店匿埋回吓氣先，其實餐廳早就揀咗喇，就係「紅樓」懷舊風景餐廳... 咁就立即行動啦...go....go...go.....不過就喺去緊「紅樓」呢一段路途上，發生咗一件唔係幾好嘅事，係乜嘢事，要買個關子先.............留待下回分解........

待續.........敬請繼續留意事情發展.......

 

 

這篇文章曾於故居內發表: http://blog.yahoo.com/andygundam/articles/page/1