長隆歡樂世界~聖誕兩天遊 Day-1 ( 長隆國際大馬戲 ) Part-1

 

 

2011年12月17日(SAT)

 

話說舊年12月初聖誕節前夕約同幾位好友聚會，在閒聊間發現，原來大夥兒都好耐冇一齊出去玩哪，而又發覺大家有著一個共同點，係從未到過廣州長隆歡樂世界玩，咁就唔使講嘢，立即由本人策劃，不需三天就完成哂所有旅遊套票Booking，最後選擇咗麻麻地旅遊，出發日期12月17日，每套套票hk $2xxx ( 兩位計) ，好喇....各位團友準備出發玩餐勁呀......

 

 

繼2002年十一人眾台北四天自由行後，再嚟2011年九男女開心歡樂番禺遊，出發地點：尖沙咀中港碼頭，啟航時間10：50分，所有團員都非常準時及有效率，早上10點已經齊集碼頭離境大堂，人唔太多過關手續都非常順利，這是囡囡首次翻大陸旅行，心情相當之興奮，好...繼續前進....

話咁快上到船哪，囡囡今次帶咗麥記嘅Kitty版滑嘟嘟公仔一齊去，話說囡囡今個行程非常著數，有乜嘢咁著數呢？就係酒店及所有樂園都可以免費入場，原因係佢身高未超過100cm 囉，只係要幫佢買小童來回船飛即可，好喇坐定定...開船哪....

航行時間大概都需要接近2個小時，都幾長途o架，唔緊要啦，見佢哋喺度食吓嘢講吓笑，轉眼間就到達蓮花港碼頭，到著時間中午1點正，咁咪嗱嗱聲落船辦理過關手續，用咗10分鐘左右就搞掂哂，未到o架.....仲要搭多轉Shuttle Bus 先去得到，車程都要40分鐘喎，嘩...咁咪船+車+過關時間差不多要3小時

，走轉韓國都得啦....真係!!

 

都係唔好發咁多嗡風住，講翻個Trip先，時近聖誕節嘅關係，酒店到處都佈置得好有聖誕氣氛，你哋唔好掛住睇呀，快啲排隊Check in 先啦，10 分鐘倒就輪到我哋哪，唔該四間雙人房吖，等咗一陣櫃台服務員帶給我們一個好消息，就係全部都Upgrade為高級雙人房.......嘩........正呀..

 

跟住就過隔離票務處換番嚟緊兩天啲樂園門劵先，點知個櫃台姐姐仔話冇人手出票嗰喎，要自己去嗰部自動售票機處辦理o架，我「頂」唔係呀化，睇見部售票機需要咁多步驟都覺得好Q 煩呀，真係想「頂」你個掣之時，見有個服務員哥哥仔行過，佢話有乜嘢可以幫忙，咁就梗係幫我哋出哂啲飛先啦......唔該，見佢兩三吓手腳就搞掂咯........真係唔該哂呀靚仔....

好....終於搞掂哂，睇吓個錶都成兩點幾鐘喇，突然間聽到個肚喺度打緊豉，先至發覺原來仲未食午餐，於是大家決定唔上房住去食咗嘢先，咁啱又俾我哋喺大堂撞到佢......女仔卡卡虎 & 小丑女，咪走呀...影番張相先....唔該哂

 

 

四周圍睇過好多食店都開始午休，最後搵倒嚟間「彩蝶谷」餐廳，主打亞洲特色美食，之前都聽過朋友話「彩蝶谷」幾低食o架，咁就唔諗咁多喇.....就嚟間啦.......

 

「彩蝶谷」餐廳好大，仲好多位冇人坐添，咪住先......唔通啲嘢食麻麻地，此言非也，都成3 點幾鐘梗係冇乜人啦......懵丙

水滾茶靚，即刻Order 翻十碟八碟精美點心醫吓個肚先，睇住上圖同你哋介紹吓叫咗啲乜東東，有煎蘿蔔糕、排骨蒸鳳爪、义燒餐包、藥善鳳爪(好味)、酥炸軟殼蟹、大蒜炒菜芯(非常爽口)、蛋塔仔、蟹子燒賣、蝦春捲、蝦餃皇、泰式串燒、極品醬炒飯(好似金字塔咁幾有趣)，當中有幾款食物要「起雙飛」先至夠皮，食飽飯就梗係吹吓水啦，話說啲食物又真係整得幾有水準喎，埋單計每人都係幾草嘢，認真低食......囡囡都話大滿足呀.......

 

睇吓時間都將近5 點咯，唔通真係吹大咗，時間非常之緊迫，各人嗱嗱聲上番房休息一陣，約定5 點半喺大堂等，囡囡見到間房話好大呀，睇見佢好似鄉下妹出城咁，喺間房四周圍跳來跳去、跳上跳下，非常興奮，真係冇佢修

由得佢啦，反正叫極佢都唔會停o架啦，咁我就帶大家參觀吓間房先，米黃色牆身配深啡色傢俱，再加上少許淺墨綠色配搭，光線唔太暗睇落非常之舒服，睇吓啲杯幾咁Cute ，每隻都印有不同種類嘅動物圖案，好想據為己有，一念之想啫，最後梗係冇咁做啦........

浴室都好鬼大間o架，分開有玻璃房企浴，另外仲有傳統浸浴缸，洗頭水護理用品都相當齊全，用唔哂可以攞翻屋企慢慢用添，留嚟做個紀念都好呀，唔好浪費吖嗎!!!!!!

每所房間裡面都有一個小露台，我哋間房就望見泳池景，如果想住好啲可選擇新翼嘅白虎高級房，房間可透過落地玻璃窗24小時觀看白色雪虎的生活情況，帶給你居高臨下的震撼性感覺，不過房價就貴好多喇.....

大家休息咗一陣，5 點半鐘就喺大堂集合，今晚7點半會欣賞全個Trip嘅重頭戲「長隆國際大馬戲」表演，趁現在仲有啲時間，就四周圍 Her 吓，大堂處擺放咗幾隻聖誕卡卡虎，囡囡話要埋去同佢哋Say Hello 喎，另一邊就有隻白虎標本，之後出去露天廣場再 Her 吓，廣場中心擺設咗一架好靚嘅聖誕小火車，咁當然要拍個照留念啦，嚟幾位廣州OR見到囡囡咁可愛，即刻捉住囡囡同佢哋合照......好吖...冇問題

今集講住咁多先........下一集就會講今個Trip 嘅重頭戲「長隆國際大馬戲」

敬請繼續收看........... 

 

 

 

 這篇文章曾於故居中發表 : http://blog.yahoo.com/andygundam/articles/page/1