突如其來的「赤柱」聖誕遊 2012

 2012年12月25日(TUE) 聖誕節

 

突如其來的忽發奇想之旅「赤柱」聖誕遊，事原於早前食完「豚王拉麵」之後，途經登龍街旁看見有個專線小巴站，係通往赤柱市集的40號路線，心想既然咁方便，不如就入去行吓都好吖，基於想做就去做嘅原因，咁何家三友又再次踏上征途，向赤柱出發啦.........go go.........

 

這條專線非常之快速，由銅鑼灣轉上香港仔隧道，再經香島道，沿途經過深、淺水灣，最後在赤柱市場道落車，全程只需20分鐘左右，到達時間剛好四點正，下車處就係赤柱廣場，我哋沿著扶手電梯往下走，首先到達三樓的觀景層，這裡有一個凸出的景觀台及露天休憩處，各位可於此處休閒地盡情享受大自然的美景，咁我哋都喺度休息吓啦！阿囡仲攞埋先前LEGO 姐姐送畀佢的聖誕禮物出嚟玩，原來係一個吊魚翁LEGO 人偶嚟架，喺度hea 咗一陣，就繼續往下進發，剛落到去廣場地面處，就見有位白頭叔叔喺度擺地攤，售賣一些奇特小玩意，囡囡即刻畀那些小玩意吸引住，係都唔肯走，話一定要買喎，最後我哋都係不敵佢嘅頑固，再次戰敗給她，咁就乖乖畀錢啦！

囡囡得意忘形地邊行邊把玩著她的戰利品，個樣相當得戚，真係吹佢唔脹...好嘞.......跟住我哋就開始遊覽，很奇怪的，這處今天竟然人潮不多，所以感覺認真舒服，諗番起都超過10年冇嚟過赤柱喇，咁就首先參觀這楝從中環「搬」到這裡來的美利樓先啦！

美利樓原本是坐落在中環的花園道，於1982年拆卸時，香港政府就計劃另覓一處地點將它重建，所以把美利樓的三千多件花崗岩石全編上了號碼，然後在1998年於赤柱現址重建，將它的容貌原整地「堆砌」回復。要如何參觀美利樓呢？大可以從建築開始欣賞，美利樓揉合了東西方的建築文化特色，仿希臘復古式的圓形石柱，中式瓦面的房頂，這是香港殖民地時期早期最常見的建築設計，而美利樓則為現存此類建築物中歷史最悠久的一座。當您站在這座樓高三層的花崗岩建築物前，定能感到它透出淡淡的一種古典氣息，確實莊嚴宏偉！所以阿囡都話開心到跳起........

而美利樓內設有兩間異國料理餐廳，分別是西班牙菜及德國菜，如在這裡用餐的話，更能讓您於一望無際的海景之下品嚐美食佳餚，舒暢十足。怪不得連Spider Man都話正啦.....

詳情請看：http://www.hk-stanley-market.com/

睇見咁靚嘅仿古建築物，心情異常興奮的囡囡終於按耐不住，話要勁跑樓梯級喎！睇吓佢玩跑得幾忙我、幾開心........

而美利樓對出仲有個卜公碼頭，係龍友必影之景點，我哋等陣間先行，依家行吓佢隔離嘅赤柱馬坑公園先，公園設有多個不同主題的小區，園內設計配合天然環境，依山而建，環境休靜，風光如畫，更可以欣賞到180 度的赤柱灣美景，園區亦會介紹出現的留鳥類，例如大山雀、鵲鴝等，又有蝴蝶及各類植物品種，供遊人認識當地自然的生態呢！

從公園途經有一所北帝古廟，這北帝古廟是建於山崖邊，面向赤柱灣，已有兩百多年的歷史，是早期赤柱的漁民所興建的，古廟旁有一個千年古井及西環仔石灘，每年的農曆三月初三為北帝誕辰，是赤柱的一大盛事，而以往北帝誕當天，赤柱的坊眾都會於海灘搭棚上演木偶戲及神功戲，使之人神共樂！
 

拜訪完北帝古廟之後，就過番卜公碼頭這邊，真係要落足眼力睇吓，點解佢咁受龍友歡迎呢！睇落又唔係碼頭一個，冇乜特別吖。咦.......唔係喎，睇真啲個上蓋都幾古色古香架，屋頂仲吊咗幾棧古舊吊燈，原來這個碼頭上蓋係經過多番轉折，又曾經於2006年運往廣東省的工廠，進行翻新及清除鐵鏽工程，最後再重置於現在的赤柱公眾碼頭之上，此碼頭的取名是來自香港第12任總督卜力先生喎！

卜公碼頭位於赤柱灣之北岸，由2007年7月27日起可供船隻乘客上落，現時該碼頭更有街渡服務前往蒲台島，而提供定期船班服務的是「翠華船務」香港有限公司。詳情及有關資料請到：http://www.traway.com.hk/ticketing-home.html

快活不知時日過，好快就到咗將近黃昏五點半倒，此間太陽開始落山喇，只因今日陽光唔係咁猛烈，所以影唔倒較為理想的日落景色，定其實係我嘅攝影技術仲未到家呢！......

跟住我哋就行去赤柱大街hea吓，這裡餐廳食店林立，三五知己在此共聚擵吓酒杯底吹吓水，你話幾happy呢！我哋順便搵吓邊間餐廳抵食，鎖定埋今晚開餐的地方，之後再過去大街購物區行吓囉...........


赤柱大街購物區同旺角女人街分別不大，販賣的貨品主要對象都係遊客，對於我哋香港人嚟講就冇乜吸引力喇，所以行咗10分鐘就回程........


之後我們何家三友就慢步於赤柱海濱長廊當中，此刻昏暗的氣氛，街燈的微光，照射到我們身上，感覺十分浪漫，能夠和自己身邊最重要的親人一起共度此刻，確實令人陶醉萬分.....

時間快要到達7 點鐘喇，不如早啲開餐啦，冇咁多人吖嘛，我哋就揀咗這間喺赤柱大街92-A1的SEAFRONT食西餐，點解揀呢間，咪就係畀佢哋個招牌菜吸引咗囉，是甚麼....等陣間至話你知，皆因時間上早，所以立即有位，呢間餐廳嘅氣氛都唔錯，環境都幾舒適.........感覺OK........

經過太太的精打細算之後才選了這間SEAFRONT餐廳，因為它們比較划算，餐前湯、主菜連飲品一杯都係$140左右，飲品仲有紅酒或啤酒可供選擇，咁我咪要咗杯 Hoegaarden 啤酒飲吓先，媽咪話就吓阿囡叫咗杯熱奶茶，因為近期囡囡畀姐姐感染咗，話要學人飲奶茶喎.......真的又被佢吹脹了......

頭盤唔一定要選擇餐湯嘅，或者沙拉都可以架，是晚Dinner set 係冬蟲草雞湯或煙鴨胸沙拉，我哋就每樣要一份，個餐湯好夠味，而沙拉啲菜都非常新鮮爽口，鴨胸就普通咗啲啦，好嘞.......到主菜出場喇，佢哋嘅招牌菜就係燒豬仔排喇，睇落仲份量十足添，咁味道都幾好嘅，不過就唔係超好味嗰隻囉，真係有啲失望，另外一味係蒜汁燒羊仔骨，這個仲差，羊仔骨淡淡的，一啲都唔入味，可以係話無呢聞味，最後要依賴黃芥末的介入先能夠食哂，真係失敗中嘅失敗..........

睇吓就連幪面超人都食到定哂格，而且main course 只跟薯菜，想轉跟飯或意粉都唔得，要額外加$20就可，想話要杯清水，都係要收錢，咁嘅食物同服務質數，仲要收10%加一服務費添！我係唔會再有下次幫襯架，各位朋友睇路啦.........

須然話好又一餐、唔好又一餐啫，但今天係聖誕節嚟嗎，搞單咁嘅嘢，真係有啲唔開心呀，不過本人的回復能力比較強及快速，同埋見到咁靚嘅赤柱夜景，何家三友瞬間開心番哂啦....

臨離開前遇見小雲同小吉，咁即刻幫囡囡拍照囉，仲有靚靚聖誕樹添，今日真係玩得好開心呀，真的達致普天同慶的感覺，時間都唔早喇，要快啲搭車返屋企啦，因為明天又有好去處，係短線兩日一夜旅遊，去邊就要遲啲再話你知喇！...........咁同各位講聲拜拜先.............遲啲再見...........