何家三友的生活點滴: 高達模型展 GUNPLA EXPO (HK) 2012 (前篇)

2012年12月6日(THU)

近幾年都時常舉辦的GUNPLA EXPO高達模型發佈展覽會，今年要轉一轉地頭，移師到鑽石山荷里活廣場Star Atrium 舉行，展出日期由2012年12月6日至12月11日，小弟對於這些模型展覽一向都非常支持，亦都唔會執輸過人，所以在展出的第一天就即刻報到，現在就同大家分享吓會埸情況先！

大約中午12:00到達鑽石山會場，皆因是平日關係，人流唔算多，展場亦都唔算大，但始終都係商業推廣活動多於展覽，所以也設有「笨大」的模型展銷攤位，亦有幾款專為是次GUNPLA EXPO 展覽的會場限定模型發售！

展場內亦有多位親善的工作人員助你解答疑難，仲提供簡易網絡小遊戲環節可於試玩，另外於攤位填寫簡單問卷，就能獲得精緻紀念品一份！

咁多款會場限定模型當中，我就揀選了這盒RG1/144 嫣紅突擊高達入手，於會場消費滿$200就可以參加抽獎一次，獎品都幾豐富架，不過我只係抽得BB三國貼紙乙張咋.......失敗！

跟住就帶大家睇吓啲限定模型嘅展示品，RG 1/144 RX-78-2 高達Mechanical Clear Ver，原用RG 1/144 精細骨架，外部採用全透明白件，可動性高，原全展現模型的精密內部結構，另外就係我喜愛的RG 1/144 嫣紅突擊高達，在眾多高達模型裡可算是較為特別的配色，於RG版中展現尤為特出！

1/48 RX-78-2高達 Extra Finish Ver，現時官方最大Size的高達模型，電鍍配色亦相當精美，超巨大的身形確實震懾非常，對電鍍版模型有興趣嘅朋友唔好錯過喇！

餘下幾款分別有HG 高達Age-1 普通型 Full Color Coating Ver，又係電鍍配色，不過嚟隻感覺較為光身，有啲失真，接住就係HG 粉紅．熊霸，深淺粉紅嘅顏色配搭，望落十分醒神，真係估佢唔到，開賣兩個鐘頭倒就全部售罄，最後係BB龍裝劉備 + 白銀流星馬 Clear Ver，全組件透明的特裝限定模型，本人亦曾經喜歡過BB高達這個系列，但現在已經興趣大減，另外極具紀念價值的多色成形機比例模型，亦以超低價$30 發售！睇咗咁多有冇一款啱你呢？

睇完限定版模型之後，就帶各位參觀一啲過去幾屆電擊高達模型王大賽的冠軍作品，首先係2008年的高級組冠軍作品，創作者 Ambrose Cheng，作品名稱「GN 爐最大火力測試場」一座認真超複雜而又非常精細之情景模型，巧奪天工嘅超凡手藝，令細部表達得淋漓盡致，配色方面亦相當均勻，真係絕對無敵嘅得獎作品，我認為佢應該係冠軍中嘅冠軍添呀..........

2007年的公開組冠軍作品「 HILDDLER POWERED」創作者何康興先生，好有壓迫力的一座超級大炮戰車，手工亦非常精湛，最利害一環莫過於色彩嘅表達，配色絕佳，又係神級作品一件 ........超讚.........

2010年高級組冠軍作品「Winner」，製作人Stephen Ho，作者採用當時大熱之機體，UC 獨角獸高達的兩大形態，加以添置細部，著色亦相當亮麗，這樣仲未係此作之殺着，重點係再追加一部運送車，全車是以膠板搭建，技術之高真的非筆墨可以形容，一件集各方面高超技巧嘅頂級模型作品！

2003年電擊決定戰總冠軍作品，作品名稱與作者都不詳，一眼望埋去頭細身大嘅比例模型怪怪的，但睇落又幾順眼喎，配色及型態都是無械可擊！

又係2003嘅專業組冠軍作品，可能係年份久遠，所以連作者同作品名稱都違忘了，不過這點唔重要，重點係可以再次欣賞到此作品，作者把Z 高達的引弓雄姿完全表達，無論是改造製作及各部上色都是一絕，一件超高水平的冠軍作品..............

2005年專業組冠軍作品「高達D Hell」創作者李健信先生，又係一件非常用心製作嘅情景模型，精心嘅改造組件同精密的細部追加，再配以超絕嘅上色技巧，構成這座極帶魔幻佈局的模型冠軍作品，神級之作當之無愧..........

2011年的專業組冠軍作品，唔好意思，又係唔記得啲資料，但這台模型亦都係頂級之作，作者使用 HG 殺帝拿套件，再追加複雜的內部精密組件，配合改裝的地台，使作品非常有重量感，最後在主體噴上顯眼的深淺紫配色，製作之認真，冠軍地位誰與爭鋒！

MG新安州‧石原，由UC-MSV裡誕生嘅新安州原型機體，現在決定MG化，除了部份位置原用MG 舊有配件，其餘外裝幾乎均為全新零件，此產品將會在明年二月發售。場內仲首次介紹多款高達模型正規改造部件「BUILDERS部件HD系列」，BUILDERS 部件HD是一此可令細微之處也得到重視的正規改裝部件，更加深入高達模型的互換性結構，官方考慮到色彩使用的分割，特別採用PS為原材料，使切削、接合、上色等工序都簡單直接得多！非常令人期待的產品！