何家三友的生活點滴: 高達模型展 GUNPLA EXPO (HK) 2012 (後篇)

2012年12月6日(THU)

上文講到本年最震撼的MG 新作 MG v 高達Ver.Ka 版模型，打從設定到造型都是一流，絕對係今年必入的珍品！但其實笨大呢幾年仲有一個非常成功嘅系列要同大家講講，咪就係RG版超可動精密模型系列囉...........

RG版模型除咗內部骨架超精細外，仲能把各方面細部模件作分件處理，使之在上色時更能得心應手，RG 模型可說是縮細了比例的PG 模型版本，而售價又很大眾化，所以極受模型迷所喜愛架...........

會場內仲有個專櫃展區介紹由NO.1 - .9 的RG模型範例，NO.1為歷久不衰的原祖RX-78-2 高達，NO.2 ZAKU II MS-06S 紅渣古，NO.4 ZAKU II MS-06F產量型綠渣古，這幾款都是原始高達的表表者，歷來也是最受歡迎架啦！

接著是NO.3 嘅突擊高達及它的補充武器套件，使之能重現其他兩種形態！

跟住係NO.5 的自由高達及NO.9 的正義高達套裝，正義高達套件真係正到冇朋友呀，所以我都入咗。不過就仲未得閒砌..........期待...........

之後就係NO.7&.8 嘅高達Mk-II 及泰坦斯形態，咁NO.10 就係近期新作Z高達( ZETA Gundam )套件，Z高達一向給人們的印象就是高達機體裡面嘅大佬，而且身形彪悍，仲可以變成戰機形態，確實是觸目的機種..........

咁重要的全新設定機體模型，梗係要落力宣傳啦，所以特定展區裡面仲展示了Z高達由機械人形態變身到戰機形態的連環經過，這是1/144比例套件中首次備有完成跟從設定的變形結構，不論在腳尖、股關節、後方裝甲、胸部變形特色及劍型天線的變型等等，都依足原比例的設定，此產品實屬非常精彩
之作，值得留意跟進！

另外一個展櫃係展出大量HG 1/144 比例的多款示範模型，唔使講又係UC系列出盡風頭喔！淨係獨角獸高達同新安州兩款都長出長有啦.........

另一觸目新品MG RX-O 報喪女妖、獨角獸高達2號機Titanium Finish Ver.版，亦即將在12月份登場，今回將會採用大量電鍍的豪華規格套件，亦同時附送水轉寫實貼紙，這更是銀箔規格的特別版貼紙，初步定價為12600 日圓，價格係就昂貴咗啲，但係當你現場見過實體完成範例之後，定必都話物有所值架，絕對有霸氣的電鍍藍色，再配以透明黃發光件及電鍍金的細部組件，得出了視覺相當配合的效果，此作確係靚得交關，真係搞到我心郁郁........頂！

今次大會為GUNPLA EXPO (HK) 2012 特別隆重其事，在會場特設兩座以香港為背景的高達情景模型，喂.....喂.....控制室.....請問收唔收到？香港中環上空發現巨型飛行物體，好似係飛機.....呀.....又好似係機械人！睇真啲.....原來係嚟自日本的機動戰士Z高達呀！請各方面加強誡備.....歡迎佢嘅光臨.........哈哈！

另外尖沙咀文化中心一帶亦出現不明來歷嘅機械人，原來又係近期極大人氣嘅V 高達全新設定機體，請大家不要驚慌，這位好朋友係非常友善架，此機體為1998年公映的電影版「機動戰士高達、馬沙之反擊」裡，阿寶‧尼爾所駕乘的特定機體，它承襲了高達的流線形骨架設計，三色同軸的主色調，仲有其最大特徵浮游飛翔炮等等，當其時絕對係高達迷喜愛的機體喎....

另一處還設置了無障礙全接觸GUNPLA 高達MG 1/100 展區，換言之即係無任何膠箱防阻，可隨意多角度攝影，也不會引起反光效果，絕對受歡迎的開放式全新高達展區...........

RX-78-2 原祖高達的震撼性決戰場面，最後一擊，至今仍然深入每一位高達迷的腦海中，歷久不忘！

仲有其他多款範例展品，當中尤以WING 高達的一雙天使飛翼較為搶眼！

此外會場仲設有兩個PREMIUM BANDAI「HOBBY ONLINE SHOP」嘅獨家展示櫃，專門介紹BANDAI嘅官方網上預定商品，專為MG V 高達 Ver.Ka 追加的浮游飛翔炮及台座套件，使得V 高達更能展現出最為完美的一面！

除咗V高達之補完套裝件外，另外仲有明年1月發售的RG 嫣紅突擊高達+ I.W.S.P 特裝模型套件，此預訂品將為變更成型色及標記貼紙，而 I.W.S.P.方面，部份為全新設定零件，預訂價為3150日圓，現正接受訂購中，呢套又係好嘢，我又要入坑哪！

其他ONLINE 商品有同樣1月發送嘅HGUC RGZ-95 里歇爾「保衛者b 組件」，今次變更成以藍綠色為基調的配色，再貼上附屬專用貼紙狀態介紹，預訂價為2730日圓！跟住係HGUC 老虎及格魯古古( 域殊專用機 ) 套件，作例亦會變更成型色及附送域殊專用個人標誌標記貼紙，售價每套2520日圓！最後係HGUC吉姆及鐳射大炮( 白色獵犬隊規格 )套件，模件以變更成型色，而鐳射大炮頭部監視器會作透明零件化，亦附送全新標記貼紙，更追加100mm機關炮、小型盾牌、180mm加農炮亦作為剩餘零件附設，兩款同樣售價2520日圓！以上四款限定模型均於明年2月發送......敬請留意..........