何家三友的生活點滴: 那些年 ~ 我們一起再次到訪的台北 Day-4b 第十九回「品嚐烏來老街美食」

2012年7月11日(WED)
又係用咗幾分鐘咁上下嘅時間，好人私機就車我哋回到老街，烏來老街係條比較窄小的街道，私機大哥話唔方便駛入去，所以只停在街口的停車場，咁就唔理三七二十一爭取時間，立即落車探索吓呢條傳說中的烏來老街喇！

烏來老街兩旁都是商舖林立，還可各處都欣賞到這條湖水碧綠的碧潭景色，確實係一條景色怡人的名勝古街！

穿過呢條烏來橋就正式踏足烏來老街喇，呀囡掛住同喬喬姐姐玩，所以冇跟住我哋，咁就落得清閒，兩公婆可以拍吓拖，咁就同大人影番張靚相先...

在烏來街與啦卡路交界，就見到我們有考慮過入住嘅明月溫泉，睇佢門面雖然係舊咗啲，但覺得佢靠近老街會方便好多，隨時落去行街都超近囉，不過Agent 話佢又舊又乜咁，最終都冇揀到佢，現在覺得有啲後悔，人就係咁得意架啦，成日都係話隔離飯菜特別香啲架..........

再行前幾步就見到這所「烏來泰雅民族博物館」，展館樓高三層，座落於烏來商業圈的入口處，以泰雅原住民族的歷史淵源、傳統人文風貌、生活習俗、宗教信仰及祭典節慶等內容，將烏來泰雅族的歷史、自然生態、文化風華一一展現眼前。還可同時體驗泰雅原住民特有的小米播種祭、祖靈文化祭、部落生態等等，確能令你感受到泰雅原住民的另類文化氣息。不過館內完全禁止拍照，咁唯有係門外影相就算囉............

睇完博物館之後就四周圍望吓有乜嘢地道小食先，呢間名為「烏來小吃店」，都有好多款小食賣架，炸溪蝦同炸溪魚都係皇牌小食，啲溪蝦比起我哋尋晚食嗰啲重要大隻，價錢仲相當便宜添，但最欣賞都係嗰味名叫「青木瓜大奶煲」嘅食品，本人認為佢個名確係夠絕.........但係我鍾意喎..........

跟住就係旅遊書時常提到嘅烏來名食店「泰雅婆婆美食店」，主打嘅係正宗泰雅傳統山地美食，仲有山地小米酒添，有幾出名，睇吓門口啲banner就知啦，本來尋晚都想落嚟試吓架，不過最後結果大家都知到啦，咁早又唔係開大餐嘅時候，咁唯有留番下次再嚐試囉..............冇計............

另一間又係售賣泰雅山地美食的店舖，連個招牌都係叫做「山地美食屋」，此店除咗有炸溪蝦之外，仲有一味比較特別的鹹酥溪蝦，試食過的確惹味，仲擺放原隻放山雞作招徠，搞到我流哂口水添..........

接著又係一間烏來老街名食店，「鄭記一碗小羊肉」是也，不過羊肉就唔係人人都啱食，我就絕對喜歡嘞，但係幾喜歡都冇用，皆因仲未開檔......頂

咁冇辦法啦，唯有又係留待下次有緣再見啦！

懷著多少失望嘅心情再繼續向前行，終於嚟到老街必吃小食名店「高家冰溫泉蛋」創始店，睇見門前掛起啲banner就知到佢幾巴閉喇，原味冰溫泉蛋每隻NT10，非常廉宜嘅小食，見到位阿姐坐喺度玩手指，唔係咁黑仔係咪呀，又未開檔，好彩唔係，只不過咁早阿姐有啲反應遲鈍啫，咁就掃番十隻八隻攞翻上車食先...........yeah.............

高家除咗招牌冰溫泉蛋外，還有其他口味如溫泉茶葉皮蛋，松花QQ溫泉皮蛋，兩款都係NT100八隻，尤其是這款松花QQ皮蛋個賣相認真過癮，包到好似粒糖咁，仲話係國民皮蛋呢添，不過對皮蛋冇乜興趣，所以冇買到，最後梗係指定動作同佢合照啦，到此一遊嘛..............

行行吓差唔多去到街尾，發現了呢檔純手工原住民口味山豬肉香腸店，山豬肉香腸又係烏來必試美食，他們的製法非常獨特，佢哋係會加入烏來獨有天然香料「馬告、達那、高梁」等等作調味，香腸本來就係我嘅致愛，現在幾種咁獨特嘅口味擺在眼前，真係未食口水都流到落腳指尾，使唔使咁誇呀？唔咁誇張又點有得笑喎...........哈哈

，二話不說就掃番幾串先，又係攞番上車慢慢分享，其實仲有淨香料售賣，好此道的人可以考慮吓架！