澳門聖誕親子歡樂遊 DAY-2 第四節「大龍鳳酒樓」嘆茶、遊覽議事亭前地及民政總署聖誕裝飾、官也街「莫義記」品嚐木糠布丁

 

2012年12月27日(THU)

 

自由自在嘅旅行有一個好處，就係早上可以瞓到自然醒囉，但一覺醒來就見唔到外母蹤影，佢唔係激到玩通頂呀，唔理得咁多，跟住我們逐一起床梳洗，心諗搞掂哂先落去賭場搵佢，但就在此時，房門應聲彈開，一身殺氣嘅外母慢慢地走進來，仲同我哋講玩成晚總算執倒多少啦，咁都好終於鬆一口氣，外母話因為兩個人瞓一張床太迫好唔慣，同埋高碌竹表哥瞓覺又郁嚟郁去，搞到佢冇覺好瞓喎！呵.......原來係咁...，這件失蹤疑雲事件終於告一段落，咁大家即時收拾好心情，準備向今日第一個節目出發......嘆早茶是也

 

 

跟住落大堂搞埋Check Out 手續，之後又係飛的由喜來登酒店過去十月初五街，我哋嘆早茶嘅目的地就係這處的「大龍鳳酒樓」，點解揀嚟呢度，因為近年香港人興集體回憶吖嘛！咁我哋又點會落後於人呢，今鋪一於來個澳門老舊茶居集體回憶啦...........哈哈.............係咪好頂引呢...........

 

 

話說這間「大龍鳳酒樓」喺澳門開業已經超過半個世紀，他們一直堅持提供正宗傳統粵式點心及小菜，近十年間更積極推廣粵劇，每日下午三點至五點均請來粵劇表演者即席獻唱粵曲，好此道者大可一邊聽粵曲一邊品嚐即蒸傳統點心，感受吓這裡濃濃的懷舊氣息添！咁當然戲曲時段啲點心及茶芥係要收附加費架啦！

 

 

我哋就對粵曲冇乜興趣嘞，反而係想試吓佢哋嘅正宗傳統點心多啲，由於時間都接近11：00喇，咁就快快手嗌咗幾款招牌點心囉，鹹水角同春卷都係好普通，仲唔係幾夠熱添！碟桂林馬蹄糕就落足料喇，咬落啖啖都有爽脆馬蹄在內，甚有傳統風味，再嚟係招牌「龍鳳雞球大包」，年青嘅一背可能連個名都未聽過，因為現時啲酒樓都好難有得食，講番個雞球大包先吖，又係用料十足，裡頭有雞肉、义燒、臘腸、蛋黃及蝦等等，個包足足有成隻碟咁大，真係睇見都令人胃口大開.....正呀，之後係這碟超好味嘅「排骨蒸腸粉」，以排骨鋪於腸粉之上一起蒸的傳統粵式點心，這個做法能將排骨嘅鮮味完全帶入腸粉裡面，非常之惹味的一度點心呢！跟住整多籠「龍鳳鮮蝦餃」同楊州炒飯，兩樣味道都係冇乜驚喜！食飽飽就埋單算數都係百五蚊咁上下，都幾抵食喎..........

 

 

 

好嘞....終於都品嚐過正宗懷舊粵式點心囉嘞，又係指定動作拍照存檔先，「大龍鳳酒樓」的正確地址是澳門十月初五街127-129 號，有興趣嘅朋友不妨去體驗吓啦，檔係(做番場大龍鳳).....都幾過引架............
 

 

 

 喺「大龍鳳酒樓」步行12分鐘即可到達澳門的中心地區議事亭前地，此處可說是澳門的心臟，所以人流亦都係最旺，亦為民政總署大樓前之廣場，整個議事亭前地都被兩旁的具西方古典主義特色建築物所包圍，於右側有郵政局大樓，建築略帶新古典主義的仁慈堂大樓，而左側是一列三層高帶有行人走廊的古典樓宇，建築色彩多樣化，窗門式樣亦各有不同！

 

 

自1993年起，議事亭前地一帶鋪設了黑白色碎石地面，並砌成波浪形圖案，既美觀又具特色，襯托周圍顏色鮮艷的文物建築，互相輝映，使前地一帶更加顯出濃濃的南歐風情味道。在每年的聖誕節期間，於前地的噴水池就會變裝成聖誕特別燈飾，今年仲有棵高度達三四層樓嘅巨型聖誕樹添......
 

 

 

 睇吓個傻妹玩得幾開心..............

 

 

呢張係咪好似急小便咁嘅狀況..........又幾搞笑喎............

 

我哋冇上去大三巴牌坊呀，因為都去過好幾次喇，反而行過對面嘅「民政總署」hea 吓，究竟「民政總署」又有乜嘢好玩呢？睇吓你咪知囉！這座大樓的牆身外貌於1940年重修後保留至今，而大樓內的牆腳部分嵌有葡萄牙青瓷磚，甚具歷史文化，它已於 2005年7月15日被列入聯合國教科文組織世界文化遺產名錄的澳門歷史城區之歷史建築群之一。當每逢聖誕節這裡都會佈置得充滿節日氣氛，更免費開放給民眾參觀，阿囡話呢個耶穌出生小馬槽模型巧靚呀，要同佢合照喎........... 

 

 

大樓的第三進深是一個富有葡萄牙色彩嘅花園，在大門兩側向花園的牆身有葡萄牙捎瓷磚作裝飾，花園中間有一個渾天儀形狀的花圃，石壁頂部雕刻着葡萄牙盾徽的噴泉外，也有刻着國徽的兩個圓形石球，但此刻已變成聖誕靚靚花園一個，就連阿囡都話要變身成幪面超人高興吓呀..........
 

 

 

 靚景配靚人，實行落力啲影多幾幅相先............

 

 喺「民政總署」喪影完一輪相之後，望吓隻蛋，都下午兩點幾囉喎，我哋有一個重要任務要馬上執行，你哋仲記唔記得呀？就係要過番氹仔官也街買手信囉，不過今次唔搭的士喇，改行遊吓巴士河先，因為喺新馬路呢度有很多合適嘅巴士線路，梗有一架啱你既，我哋話咁快上咗架33號巴士，囡囡就把

握時機差吓電先！瞓到好似豬仔咁..........

 

 遲唔會遲、早唔會早，時間就啱啱好，3 點鐘就嚟到晃記餅家門前，但晃記門口已經大排長龍，好在有預定咗，唔係就大煲喇，等咗15分鐘肉切酥就到手嘞，每包 $12，梗係要即刻試吓啦，味道非常芳香鬆脆，暖暖地食仲好味呀，另外招牌「雞仔餅」都買埋，食落口感認真香濃厚實，唔係誇張，小弟從未食過咁好味嘅「雞仔餅」，真不愧有人龍名店之稱，果真名不虛傳，值得推介畀大家..........

 既然嚟到官也街，梗係要探訪埋另一名店呢，佢就係招牌响噹噹的「莫義記」甜品店喇，話得係老字號就要講吓歷史喇！早期嘅「莫義記」是在街邊擺檔，後來於1954年正式開舖營業，至今已是傳到第三代，莫老闆近年不斷鑽研改良新產品，創製出多款不同新口味的大菜糕，有朱古力、士多啤梨、椰子、蜜瓜味等選擇，而大菜糕不但解暑清熱，還可舒緩喉嚨不適，除此之外，其他好味食品如「榴槤雪糕、楊枝甘露、木糠布丁」都係相當熱賣，我就特別鍾情木糠布丁嘞，貪佢香滑細緻，真係食過包你回味無窮！阿囡都係咁話，睇佢吃得幾滋味，如果您下次路過莫義記時，記得試試他們的特色甜品
呀..........


講到呢度又係時候唞一唞先.........下回再傾.........拜拜..........

 

 

 

此文章曾於舊居中發表:  http://blog.yahoo.com/andygundam/articles/page/1