新春群蛇出洞「台山、惠州」三天純玩美食團 ~ 出發準備之章

 

 2012年2月13日(WED) 大年初四

 

Hello...各位，又係夜深人靜嘅時候，囡囡同媽咪早早已經瞓咗，皆因明天要搭早車出發，我哋揀選在沙田上車，時間係早上07:30，所以最遲06:00就要出門口，換句話講天未光清晨我哋就要起身，所以我現在要作一次行李的最後檢閱，然後立即瞓番幾粒鐘先，因為嚟緊凌晨有場非常之精彩嘅歐聯16強賽事將會上演，係由「皇馬VS曼聯」咁強嘅戲碼唔睇點得，睇完場波時間啱啱好跟住就出發，您話係咪超正呢...............

 

出門旅行最重要嘅就係過關証件，全家人的三張回鄉咭、阿囡嘅回港証及身份証都Check過日期冇問題.........OK...........

因為係跟旅行團嘅關係，應該額外用錢的機會唔多，所以只帶備少量港幣旁身，人民幣就唔記得咗對換，不過唔緊要啦，如果到時有需要再同何老闆換咪得囉，皆因佢哋用人民幣仲多過我哋用港幣，隨身都會帶備三五七千人仔，確係老闆級咁嘅格局..........認真唔講得笑............

 

 

 

 

 旅行最常遇到就係手機好快冇電嘅問題，而阿囡又成日都話要打機，所以前幾日就火速買咗部ProMini充電池，有成8000mAh 架，容量相當強勁，咁以後就唔怕手機冇電啦.............

 

居家旅行必備嘅法國「雙飛人」藥水，貪佢功效顯著同用途廣泛，主治疴嘔肚痛、傷風感冒、消化不良、精神不振、舟車暈浪、頭痛腹痛、蚊咬止痕等等，真係出外旅遊又點少得佢呢！仲有就係危急小電筒一支，如果遇到停電的情況咁佢就大派用場嘞.........

 

國內普遍都適用嘅兩腳扁平插頭，相機及電話差電之用......確認已帶備.......

 

大Kappa 旅行袋同埋adidas 背包今次亦都係由我負責，相信問題不大......

而藍色Burberry 袋係媽咪攞既，所有証件都係由佢負責，咁較為細小嗰個Burberry 袋就畀阿囡攬囉，佢話用嚟袋啲零食喎........

好嘞...終於Check 清楚哂喇，嘩......都夜深喇，要瞓番先.....

回來再同大家分享旅程經過..........係咁先...........早唞.........

順道預祝何家三友今次旅途愉快...........哈哈.............


這文章曾於舊居中發表: http://blog.yahoo.com/andygundam/articles/page/1

新春群蛇出洞「台山、惠州」三天純玩美食團 ~ 序章

 

 

2013年2月13日(WED) 大年初四

 

近期又會有啲搞作，現在就話畀您哋知係乜東東，咪就係農

曆年初五出發嘅新春「台山康橋溫泉度假村」三天純玩美食團囉！話說回來於一月某天接到何老闆急電，佢問有冇興趣新年返大陸玩吓，當我想問佢去大陸邊處玩呢之際！何老闆就講咗一個我無法抗拒嘅理由，就係今次旅程我哋係會有接近30名成員，咁賓墟嘅陣容，又點會少咗咁鍾意熱鬧嘅何家三友份喎，問過老婆大人話OK就即刻扑鎚，咁大個仔從未試過於一粒鐘內就決定一個旅遊行程，仲要係當時都未知去邊度玩添，您話頂唔頂引吖！這意味著  一個比往年七月「台北仲夏親子之旅」還要鼎盛的旅遊項目即將誕生。

 

今次旅遊我們係選擇了「康 X 旅行社」，點解要跟旅行團，理由係有三個，第一係驚新年人多住宿同飲食都比較緊張，二來就係小朋友較多怕佢哋辛苦，最後係新年假期我們大人都想畀人哋服務吓囉，唔使諗咁多一於嘆吓世界！今次嘅搞手唔係小弟，係我們足球隊裡有歌王之稱的「熊天豹」叔叔全權負責，隊長「保羅李」協力，這次他們選擇了康X 嘅純玩美食系列，咁即係話全程不設購物，又唔會晨咁早morning call嘈醒您，仲會包幾餐特式宴添，睇落又真係幾吸引架，好似我哋何家三友嘅旅費合共$57XX，包哂三日嘅服務費及旅遊保險，咁嘅價格新年假期嚟講都算OK 啦，出得嚟玩金錢方面就唔好太過在意，最緊要係盡情玩得開心啲吖嘛.........您說對不對...........

 

今個行程有幾個主要的重點旅遊要預先同大家介紹，首先係我們第一晚將會入住嘅「台山康橋溫泉度假村」顧名思義我哋又可以瘋狂喪浸溫泉嘞！

 

康橋溫泉度假村坐落於廣東省台山市白沙鎮朗南銅鑼地村，這裡分佈著天然的山丘林木和水體濕地生態，全度假村佔地面積達2400畝，康橋溫泉度假村以“健康、悠閒、浪漫”作為主題，引入國際先進的經營管理模式和超前理念，為賓客提供健康親情式服務，致力打造集溫泉泡浴、養生保健、餐飲住宿、會議培訓、商務洽談、生態觀光、旅遊度假為一體的山水田園式休閒養生勝地，康橋溫泉屬於地熱田熱礦泉水，日出水量可達5000噸，水溫高達90.5度 ，水質晶瑩剔透，是一處難得的複合型醫療熱礦泉水療中心，對神經官能症、風濕、關節炎等有明顯療效，對皮膚有抑制分泌、消炎、脫敏作用，還能夠加速新陳代謝之作用、調理腸胃等具有良好的醫療保健功效。

 

查看更多有關資料：http://www.dreamland-resort.com.cn/zh-CN/introduce.html

 

喺行程嘅第二日我哋會暢遊廣東開平「赤坎古鎮」，赤坎古鎮始建於清順治年間，有350 多年的歷史。現存最有特色的建築就是有「騎樓」的二、三層舊樓和街道，大多是19 世紀末、20 世紀初由華僑出資興建。近年由數碼攝影帶起的熱潮令香港坊間多了一些週休短線廣東攝影團，赤坎古鎮更是其中

一處目標理想之地！

 

跟住就繼續遊覽「惠州西湖」，惠州西湖是廣東省第一批省級風景名勝區之一，歷史上曾與杭州西湖，穎州西湖齊名。這三個西湖的出名還有一個重要原因，就是它們都曾經是宋大文學家蘇東坡所到過的地方，而“東坡到處有西湖”，便是蘇東坡給西湖留下的勝跡，而此勝跡更因東坡而倍添風采架。

惠州西湖景區自然布局甚佳，其特色是山川透邃，幽勝曲折，浮洲四起，青山似黛。古色古香的亭台樓閣隱現於樹木叢林之中，景色妙不可言，確能與杭州西湖互相輝影，於1993年12月，惠州西湖風景區更成為全國評選的六個 “環境衛生達標風景名勝區”之一。

 

惠州西湖原是橫槎、天螺、水簾、榜山等山川水入江沖刷出來的窪地，西枝江改道後的河床遂成為湖。其西面和南面群山環抱，北依東江，景區面積達3.2 平方公里，其中水面積則為1.68平方公里，湖水深淺不一，一般在1.5米左右，個別水深達3至4米。西湖由五湖、六橋、七山、十六景組成， 而五湖
是為平湖、豐湖、南湖、菱湖及鱷湖，五個互相貫通的湖組成一個整體。六橋是指拱北橋、西新橋、明勝橋、圓通橋、迎仙橋與煙霞橋。十六景是玉塔微瀾、甦堤玩月、象嶺雲飛、榜嶺春霖、留丹點翠、花洲話雨、紅棉春醉、荔莆風清、西新避暑、孤山甦跡、花港觀魚、飛嶺覽勝、芳華秋艷、豐山浩
氣、南苑綠絮、準堤遠眺，這些景點品題精趣，深得海外人士和國內游客所贊譽。

現在就同各位分享吓三日的行程安排：

Day 1：香港→深圳→番禺→十九通海味街→新會→陳皮博物館→台山康橋溫泉度假村

 

Day 2：度假村自由活動→ 赤坎古鎮→惠州西湖→國際品牌惠州皇冠假日酒店

 

Day 3：酒店自由活動→朝京門→梅菜土產街→深圳→皇崗/羅湖口岸

咁精彩嘅行程，真係未出發先興奮，令人非常期待............

下次再傾................拜拜...................


文章曾經於舊居中發表: http://blog.yahoo.com/andygundam/articles/page/1

澳門聖誕親子歡樂遊 DAY-2 第五節 ~ 暢遊「澳門氹仔銀河酒店」及「澳門威尼斯人度假酒店」、金光船務夜航回歸、

 

2012年12月27日(THU)

上回講到喺官也街買飽食夠之後，都無諗過跟住去邊架，而外母又開始賭引發作，要即刻飛的過去賭場再次博殺，咁我哋點算好呢，突破靈機一觸，記得在官也街口係有免費Shuttle bus去「氹仔銀河酒店」，咁就不如過去行吓

啦！即刻走去排隊，Shuttle bus 嘅班次都好密，等10分鐘倒車就開行喇....

 

 

 

銀河酒店離官也街非常近，真係凳都未坐暖就到咗，一落車就有咁大個聖誕老人迎接我哋，梗係要埋去同人家打個招呼啦，禮貌上亦都要同佢影番張合照添..........yeah

 

 

澳門銀河酒店今年以「巨型聖誕皇殿」為主題，場內的繽紛燈飾可謂抵食夾大件，酒店內更設有多個高達五米的聖誕老人，最搞笑就係每個造型都不一樣，他們的造型亦相當生鬼，唔講咁多，影相先！

 

呢兩幅相係阿囡影架，都影得幾好吖，睇吓連我哋兩個都玩到忘哂形......

 

 

然之後發現了這個幻彩水晶城堡，聽講話水晶會帶給人幸運，咁就要留喺度攝取多啲幸運祝福喇........

 

 

這座水晶城堡上建有三道橋，而每道橋都設置了一個祝福印章，分別為「幸運、健康、愛一萬年」，我哋三樣都按單全收，都唔係好貪心啫.......

 

 

阿囡後面嘅孔雀開屏圖案靚嗎？話你知....原來圖案後方就係賭場嚟囉，真係越美麗就越危險........小心..........

 

 

 

及後先知如果早一日嚟就好喇，因為銀河酒店東翼廣場呢邊是舉辦 「聖誕夢樂園」的最後一日！這個聖誕節特備慶祝活動，會有色彩豐富嘅巨型糖果屋攤位，供應特色節日美點、聖誕特飲、禮品廊，以及一連串童話式表演及聖誕主題巡遊等。小朋 友亦可親手製作聖誕賀卡、扭扭氣球和參加各項遊戲，而聖誕老人更會於東翼廣場及渡假城內大派美味的聖誕朱古力！頂......落過咗添..........

 

 

會變色超越靚嘅噴水池........真係巧拎架嘛.........

 

 

酒店內隨處可見的聖誕小姐，她們很樂意幫遊人拍照，也很願意同您們合照，阿囡話聖誕姐姐好靚呀........yeah

 

 

稱得上「巨型聖誕皇殿」，咁裡面梗係有好多巨型聖誕老人啦，仲係百變聖誕老人添呀，呢個就裝扮成國王，咁就來拍張國王與我啦！

 

 

 

超級無敵巨型聖誕襪，裡面應該有好多聖誕禮物嘞，阿囡話好鍾意喎.......

 

 

呢個就鬼鬼祟祟咁爬緊煙窗，唔知係咪想畀小朋友一個驚喜呢..........

 

 

我哋玩到五點半鐘就打算離開，睇吓幾宏偉嘅酒店停車場大堂，仲見到架好似畀人拉長咗嘅迎賓專用房車添！

 

 

近距離影多幾張銀河酒店外貌先，確實真夠氣派，所以不愧被稱為傲視世界情繫亞洲的「亞洲新皇殿」啦.......

 

之後我哋搭的士過番威尼斯人度假酒店會合外母，順便喺運河廣場一帶 hea吓，此時又畀阿囡發現聖誕姐姐嘅蹤影，咁就冇走雞又嚟個合照囉，點解又嚟番威尼斯人度假酒店呢處，因為金沙會辦事處係設於這裡，只有這處可換取船票，現在明白冇...........

 

換完船票後外母話唔想四圍走，就喺美食廣場食嘢就算，唉.......唔通喜歡賭錢嘅人，大多數對飲食都較為求其！咁冇計啦，四周圍睇吓有乜啱食先，最後我哋揀咗食台灣嘢，皆因佢呢檔真係抵食夾大件，味道仲相當唔錯添喎，我嗰碗台南鹵肉飯 $48，有成三碗大飯咁多，我差啲頂唔住要搵「非凡哥」幫手，另外再買多碟新竹海鮮炒米粉$58太太同阿囡食既，原來係即叫即炒，只見阿嬸嬸喺我面前幾吓散手，左右開弓，咁就大大碟海鮮炒米粉製成，米粉炒得非常乾身，調味適中，仲相當爽口添.............真讚..............

 

 

食飽飯之後就行去停車場等Shuttle bus 出氹仔碼頭，於等車時見到對面銀河酒店個夜景咁正，唔影低點對得住自己呀！

 

過關又係非常順利，晚上八點準時上到船，咁當然又係坐頭等啦，今次仲好好彩攞到卡位添，又係有杯麵及飲品一罐供應，因為阿囡同高碌竹表哥頭先晚飯時冇乜食過嘢，因此非常期待這杯熱辣辣嘅杯麵，真係頂佢兩個唔順！

 

總結今次澳門聖誕遊冇去過甚麼名勝古蹟，只不過四處遊覽各大酒店的聖誕燈飾，加上住房又唔使錢，船票亦差不多半價，但卻又收到唔錯嘅旅遊效果，我想那確實係一次便宜又好玩的短線旅遊呢..........

 

 

 

 跟住嚟又有大搞作......過兩日話您知......係咁........拜拜.........

 

 

 此文章曾於舊居中發表: http://blog.yahoo.com/andygundam/articles/page/1