那些年 ~ 我們一起再次到訪的台北 2012「誕生篇」

2012年6月12日

 

上回提到，7月份會有啲搞作，好嘞....關子賣完喇，聰明嘅您都應該估到啦，冇錯....就係旅行哪，地點選咗台北，就係我10年前去過嘅台北，話說上個星期某天，當時正在家中食緊晚飯，突然收到何老闆嘅WhatsApp短訊，佢話「7月去台灣，有冇興趣」，咁我回覆話「有興趣」，於是經過一輪短訊往來，
再冷靜考慮咗一個晚上，最後終於落實這個台北4天嘅Trip，又得知何老闆為人出親門都要食好嘅住好嘅，就連搭飛機都一定要係CX至啱數，這意味著一個名為「仲夏台北四天自由自在超級好玩豪華團」即將誕生 .........

不過今次訂Packages 唔係我負責，係由「永球嫂」擔當，之後再在這幾天裡多個電郵聯絡，最終出發日期定於7月8日，搭CX來回，兩晚住宿台北西門「捷絲旅精品酒店」，一晚烏來「美人湯溫泉酒店」，咁總算搞掂哂機票住宿問題，接下來就係行程編製，這樣當然係由我擔任，因為大家都知道我係閒人
一個............哈哈.............

 

 

想做就去做，咁就立即去圖書館借咗幾本台北旅遊書睇睇，再上網找找資料，唔少得嘅就梗係睇吓人哋啲遊記，經過幾晚的不眠不休，日以繼夜搜集，四天行程已經有咗初步定案，不過想再做完美啲，所以要等遲啲先發表。

今次台北行程總共有四個家庭參與，咁當然有我們「本家三友」，加埋何老闆一家四口，「豬永球」三個同「韋爵爺」兩個，合共團員多達12人，陣容非常鼎盛................

 

 

以下預告吓幾個今次行程必遊景點：─

1‧淡水漁人碼頭「情人橋」，欣賞日落的最佳位置......

 

 

2‧九份金瓜石景區之金瀧「黃金瀑布」........

 

3‧平溪鄉十分的絕景「十分瀑布」，亦有台灣尼加拉瀑布之稱，是台灣最大的簾幕式瀑布........

今個Trip係囡囡第一次搭飛機出國旅遊，也是我們闊別10年之後再次踏足台北旅行，更是同囡囡第一次的親子旅遊......所以十分期待......

詳細行程不日推出.......敬請多多指教........

這文章曾於故居內發表: http://blog.yahoo.com/andygundam/articles/page/1