2014年12月19日(FAR)
又到年未旅遊時間啦，今次又係選擇在聖誕期間出門，地點選定為寶島台灣，所有機票住宿都在出發前2個月Call Agent搞掂哂，這回旅遊主題係要吃盡台北各樣特色美食，而去礁溪就係瘋浸露天溫泉！閒話少講，立即起行！
今日正好又是在晴朗一天出發啦，早上09：00到達機場，到CX櫃檯寄下行李，辦理埋登機手續，過關當然也很順利，10：20去到48號閘口準備上機，睇囡囡拖住個喼超興奮呀！
航機於10：45準時起飛，阿囡又開始全神貫注做兩件事，咪食飛機餐同睇電影囉！
一粒鐘多啲機程就到達台北桃園機場，火速過關及換埋台幣，再到B1下層乘搭國光客運出台北，即買票即上，非常方便！
我都係第一次搭國光客運，感覺車廂寬敞，坐位舒適，票價廉宜！不一會就到達台北西站B棟，在這裡有免費轉乘服務去西門町的！
轉眼間就來到西門町絲達爾時尚精品旅店，聽佢個名好似幾勁，不過見到個真身我哋就頭揈揈，差成點大家心裡有數啦，最慘就係我哋重要享受兩晚添！本人強烈不建議再有入住這旅店的念頭！
窗前可清楚看見新光三越大廈，要去行街街都非常方便，這也是此旅店的唯一優點喔！放下行李小休一會之後，就馬上展開我們的台北覓食行動啦！
一落到街就畀這傳來的香味吸引著，細心一看，原來是間賣蔥抓餅的小舖，見有啲肚餓，就整塊NT45火腿加蛋試吓！
唔知係咪肚餓嘅關係，覺得件蔥抓餅特別好吃，連阿囡都話勁好味，要一個人獨享喎！
搞掂咗塊餅之後就來到捷運西門町站，首先買三張悠遊卡先，貪佢有折又方便，用到冇錢就去增值，形式就同香港的八達通一樣！
搭了兩個站就來到捷運中山站，再用5分鐘步行至中山北路 一段121巷，前來目的當然係搵食啦，目標就是呢間人氣排隊店「肥前屋」食燒鰻魚飯囉！
時間剛好18：00，店舖午休後開始營業，但等候人數已有三幾十名，不過唔使咁擔心，店舖流量都相當迅速，二十分鐘後就輪到我哋啦！
店內的情況，真的是坐無虛席！
帥哥師傅正在忙著烤燒鰻魚，皆因這是店自慢必食之品！
我們很快便點了餐，先來的是鰻魚飯大盛NT480附味噌湯與醃漬蘿蔔，經過炭火洗禮的鰻魚色香味都十分濃郁，連魚刺也處理得很乾淨，肉質軟腍，醬汁豐富，超好吃！
囡囡唔食鰻魚，所以叫個NT120燒牛肉定食過佢吃，附白飯同味噌湯，味道都唔錯，性價比一流確係抵食......超讚喔.......
綜合炸蝦定食(附味增湯)NT200，炸野菜就相當新鮮青甜，不過隻炸蝦就油麻地咗啲，但整體都算OK啦！
品嚐了一頓飽餐，「肥前屋」果然是名不虛傳的人氣排隊店，多得好友保險棠的強力推介，咁就畀4個Like佢啦(5個最高)！
吃過大滿足的晚飯後，跟住就走去附近寧夏路商圈，行吓夜市街街幫助消化都好喎！
寧夏路夜市只得兩段小街，規模比起士林差很遠，不過都幾旺場，可能是近台北車站掛，街上還有多種小玩意可供玩樂！
行吓睇吓，再飲吓鮮榨果汁，確係人生一大樂事！
這兩杯是新鮮即榨果汁，綠色是酪梨牛奶(牛油果)NT60，紅色
坐了一陣又再起行，不過仲係好飽所以冇乜掃街，只係四周圍望吓hea吓！嘩.....超大個的酪梨(牛油果)！
呢檔「山東鴨頭」老味舖，都非常多人幫襯喎，白玉苦瓜汁，之前已經領教過了，我就唔係咁欣賞囉！
正在行得興高采烈之際，天空突然落起大雨來，立時甚麼興致也畀沖走了，咁就速速打道回府！
途經這裡是西門町最旺地標！雖然下著大雨，但人流依然不絕！
又敗給了囡囡，買下了這娃娃公仔，看她開心非常！
在夜市買的NT100兩尾抵到爛燒秋刀魚返旅店作夜宵，加入大量檸檬汁吃勁好味，有餚冇酒又點得呢，大枝裝台灣啤酒參上，我又要開動了！
第一天的台北覓食事件就係咁完滿地度過了，要立馬爭取時間休息，因為明天將會更加精彩，敬請留意收睇........
沒有留言:
張貼留言