黃色巨鴨現香江「維港相聚一刻」

 2013年6月1日(SAT)

小時候，每當沖涼這一刻，總會在浴缸裡放上數隻黃色小鴨把玩，看著它們於水中載浮載沉，其樂無窮！直到幾年前囡囡的來臨，她也喜歡在沖涼時把玩小鴨仔，這亦印證了黃色小鴨於每個人的童年地位幾咁重要啦，當看著她同小鴨仔玩耍時，一瞬間的童年回憶湧上心頭，想到從小朋友至現今長大的我，歲月神偷確實靜悄悄地偷走了不少光陰呢！

 

今天那小鴨仔也已經長大，仲搖身一變成為16.5米高的黃色巨鴨(Rubber Duck)，這位老朋友即將回來探望大家，相當於6 層樓高的巨型黃鴨仔會於5月2日至6月9日漂浮到維港海港城海運大廈附近，讓我們能重拾童真！這隻巨型吹氣橡皮鴨是著名荷蘭藝術家Florentijn Hofman 的精心傑作，巨鴨已經在多個國家下水暢泳，及到訪過10個國家、12個城市，包括日本大阪、澳洲悉尼、巴西聖保羅、荷蘭阿姆斯特丹等，今次多得海港城與策展機構(AllRightsReserved)合作，始能將巨鴨首次帶到中國地區展出！而設計師Florentijn Hofman 說希望象徵快樂的黃色鴨仔能為香港市民帶來正能量，帶你走出家園，到來戶外感受一吓身邊的人與事物，你定會發現世界就是一個快樂的大家庭！

黃色巨鴨(Rubber Duck)仲有幾日就要走啦，再繼續佢嘅使命環遊世界巡迴各地，咁就要把握時機去同佢見吓面啦，其實唔單只巨鴨駕到，海運大廈露天廣場還將放置24隻大小不同的黃鴨仔，分別在3個3D水池中嬉戲，讓大家可零距離同一眾小鴨來個親密接觸，囡囡都帶埋BB小B Duck嚟探佢哋呀！


今日幫囡囡特定安排一件黃色背心短裙，非常襯色的視覺效果，連米老鼠及美國隊長都嚟趁吓熱鬧！

繼續於平面角度欣賞巨鴨...........


事關今日天氣都十分晴朗，可以講係話烈日當空，影咗唔夠半粒鐘就已經成身大汗，於是立即走入海運大廈室內過吓冷河先，順便去埋洗手間囉！

跟住就四處搵吓靚位再影多啲鴨仔相囉，之後上咗海運大廈天台停車場，呢度都係拍攝黃色巨鴨嘅靚位，居高臨下，仲可以影到巨鴨個大屎忽添喎.....

囡囡呢個必做動作，親親巨鴨兒，喺Facebook上是必然出現的景況！都係嗰句，陽光非常猛烈，速攝幾張就落番商場唞吓.......


途經海運商場時，無意中發現這個 LCX-Yulia Brodskaya 的捲紙藝術展覽，咁咪駐足喺度觀賞吓囉，順便歎吓冷氣唞陣涼都好喎！

Yulia Brodskaya 是自由插畫家、圖形設計師，出生於俄羅斯，2004 年移居英國倫敦，及後考獲視覺傳藝碩士學位，她熱愛紙藝創作，擅長用紙條捲出各種精緻圖案，為不少世界知名品牌的產品設計平面廣告，而獲獎無數，更被評為全球最頂尖的紙藝設計師之一！


睇完展覽之後，返出去露天廣場同啲鴨仔再玩吓添，事關今日一別，不知何時再相見呢！咁少不免再嚟個親暱的攬攬抱抱，阿囡話要嘴多啖巨鴨先，好唔捨得佢呀！希望巨鴨仔快啲環遊完世界，下次有機會再相聚啦...........

天下無不散之宴席，仲使懷著依依不捨的心情，最後亦都要同黃色巨鴨講聲拜拜，一路順風啦！如果想搭上尾班車一睹巨鴨嘅丰采，就記住仲有幾日咋，即是今個週六、日係 Last Chance 啦 ...........

搞咗一大輪戶外活動，天氣雖然係相當炎熱，搞到汗流浹背，不過感覺十分良好，專家話多啲帶小朋友出外遊玩係好架，見識及接觸多啲新事物，總好過時常在家裡打遊戲機囉！身體力行，今時今日做父母嘅係要辛苦啲架啦！

 

見阿囡今日咁叻咁醒目，就獎勵同佢去板前食壽司啦，可能係今日吸咗大量紫外線嘅關係，當坐下來感受冷氣開放的同時，胃口就特別大喎，壽司加烏冬一一同佢清倉，而阿囡就獨孤一味飛魚子壽司，睇吓佢攞住碟飛魚子壽司個樣幾咁滿足，一天快樂行程就此結束，咁吓次再傾過啦............

 

~~~ Bye Bye ~~~