何家三友的生活點滴: 鐵甲奇俠「Iron Man 3」電影宣傳及玩具展覽會2013

2013年5月13日(MON)

近期香港最哄動全城的事件，莫過於前廉政專員「貪湯」的不堪事跡，他任內不守規則多次超資使用公帑，及瘋狂地送禮於內地官員，擦鞋兼托大腳，又將這些開支有計劃地分單上報，意圖被開監察問責，狼子貪心、可見一斑！不過正所謂天網灰灰，疏而不漏，現在終於要立案調查，真係貪人有惡報！依家就仲淨番佢大佬逍遙法外，不過相信唔使幾耐，就會輪到嚟位「貪曾突手」落鑊受靶！因為我哋阿「狼生」係有仇必報嘅君子嚟嘛！

講咗咁耐！請大家放心，今篇嘅主角唔係佢哋倆條友，而係搞到近日滿城風雨熱鬧非常嘅美國英雄電影「Iron Man 3」，香港時間4月25日就會震撼獻映，有見及此，本地玩具生產商Hot Toys 為配合電影宣傳，於銅鑼灣希慎廣場搞咗個 Iron Man 展覽會，同場仲會展出多款1：1 Size 嘅鐵甲奇俠人偶，聽講話每天到訪的群眾都相當擠湧，真係電影來勢洶洶，Hot Toys 嘅玩具人偶又夠號召力，咁唔去趁吓熱鬧又點得呢........

Hysan Place 近啟超道入口，就轟立了今次電影主要角色 Power Pose Mark XLII 的1：1原大比例雕像，仲擺出招牌動作，氣勢磅礡，搶眼非常，就係要埋去同佢合照都要等十幾、二十分鐘先得，係咪好誇張呢！

跟住就搭電動梯上一樓主展館參觀，眼前即瞬間出現壯觀場面，由 Mark I 到 Mark VII 7個原大模型人偶矗立於大堂前，相當震撼，迫力萬分！但就同放在跟前的Cosboby Q 版迷你珍藏公仔則相映成趣，皆因佢哋嘅 Size 又確係有天壤之別的感覺既！

一樓展場最觸目應該是主角Tony Stark 的超高科技工作室，7個1：1原大鐵甲奇俠人偶，非常震懾人心，7個當中我就最喜歡 Mark I 嘅做形，總覺得佢有一份原始魅力，甚為吸引.......

現正開發的全新「鐵甲奇俠 3」1：6比例人偶，Mark XLII 的戰損版本，最獨特之處係頭部面罩可以揭起，可清楚見到Tony Stark 的面相！

其他正接受預訂的1：6 「鐵甲奇俠 3」人偶都有實版展出，Iron Patriot 鐵甲愛國者的配色則較為搶眼，同美國隊長非常相似，這款我比較鍾意！

War Machine Mark II 就冇乜驚喜，同之前嘅War Machine 無大分別！

超級主角當然係 Power Pose Mark XLII，因此環繞佢的商品特別豐富，就連擺個姿勢都特別殺食，觸目非常！

跟住睇吓啲新產品1：4 Size 嘅「鐵甲奇俠 3」半身像，四種款式亦相繼接受預訂，靚就幾靚嘞，始終感覺單調咗啲，興趣不大！

另一邊展出名設計師精心改做的Mark VII 戰損特別版情景，手工非常精湛，絕對係大師級的作品！

跟住到這台縮細了比例的主角Tony Stark 超高科技工作室模型，比例為1：6的Tony Stark (Armor Testing Version) 正好把電影裡的情節完全重現，細節部件亦製作得相當精密，難怪當日接受預訂時就大排長龍啦！

於鐵甲奇俠首部電影裡面的大反派 Iron Monger，這人最初是 Tony Stark 生意上的拍檔，後來設下陷阱將Tony Stark 禁錮，結果梗係邪不能勝正，最終給鐵甲奇俠擊敗！但今次Hot Toys 製作這個 Iron Monger 確係出色，整體造型非常邪惡，賣相亦夠哂兇猛，一件唔錯嘅作品！