2013年5月6日(MON)
上回帶大家睇過一些有關中國各大節慶盛會的微縮模型傑作，係咪叫靚又叫好呢，咁就唔好俾佢停啦，繼續再送上第二節，係講述一啲香港懷舊建築物同獨有嘅店舖，睇吓現今21世紀咁進步嘅社會，竟然仲有這種居住模式存在，您都咪話唔悲哀咯！閒話少說，立即去望望啦.........
睇見這個模型背景您認唔認得是從那裡見過，係咪好熟面口呢，其實佢就係在2010 年柏林影展裡嬴得「新世代」(Generation Kplus) 組別的水晶熊獎電影，由羅啟銳導演的「歲月神偷」電影內的主要場景，係主角一家四口居住及謀生的地方「羅記鞋店」，製作人「陳翠薇、李來有」就合力把這個場景重現於大家眼前，而店內每個細節都一絲不久，細心地佈置下來，確是絕佳的作品！《到底這名神偷偷走了甚麼呢？原來它在不知不覺間把歲月靜悄悄地偷走了》！一部相當寫實及感人的電影............
跟住睇吓一啲要喺舊區先至搵得到嘅老店舖，『老金缸瓦陶瓷舖』作者「李嘉蓮」，好有六七十年代色彩的陶瓷店，手工非常精細的陶瓷餐具用品，作者把它們表達得淋漓盡致，我想定必令各位鈎起不少童年回憶哦！
『大豐香莊』作者「曾潤明、劉麗桃」，中國人傳統上在求神拜佛之時都會焚香燒燭，確保神靈能夠幫助消災解困，或在拜祭先人時可於這裡買到合適的祭祀用品！
昔日的小型金舖，專門做街坊生意，還記得往年一有親戚辦喜事，媽媽就會去這些金舖打番啲金器做禮，但時至今日這般老金舖已經逐漸被淘汰，慢慢地消失於時代裡！今天製作人「陳翠薇」把那間『展豐老金行』活生生地展現出來，此作品細緻度十足，連溶金與打金工序也見得到！
蔴雀係中國嘅國髓，而喺香港都非常普及，所以每個家庭都會放備，咁就可以三五知己隨時攻打四方城啦，有求必有供，專門售賣蔴雀用品嘅舖頭都隨處可見，咁可能作者「Sidekick 王」亦係好此道之人，因此就製作了這「友集蔴雀舖」模型，值此推廣吓這活動嘛！
再嚟就係我最有感覺同流連得最多的玩具舖啦，講到玩具邊個靚仔唔鍾意呀，不過細個時冇錢買，通常都只係齋睇，認真無奈！可能係咁嘅原因，所以現在都會不時買啲玩具俾阿囡同自己既，就當做滿足吓我呢個大細佬，皆因我仲係童心未泯掛！這間「添記玩具」真係貨品齊全，梗有一款啱您既，如果您又係玩具狂熱的話！一定喜歡它，多謝創作者「蔡璧龍、何國添」帶給我咁真實的童年回憶.........謝謝.........
跟住開始講吓香港時下最緊急嘅問題，呢個亦都係現政府最迫切要解決嘅課題，咪就係住屋嚴重不足問題囉，僧多粥少嘅原故，啲樓價有乜辦法唔係咁升吖！現時年青小夫婦想置業真係難上加難，講到底都係前特首「貪曾」之禍，從上任七年以來一直停建公屋，而只有興建少量居屋，施政完全傾向大財團同啲地產商，佢仲喺多次施政報告裡講話唔見到香港有住屋短缺問題，話現政府嘅房屋政策行之有效，真係越聽越扯火！就連電視機都想打爆佢！頂佢個掣！好在今次作者「安泰」製作了這『籠人』模型出來，幫普羅大眾狠狠地打了他一記耳光，沒有住屋問題，咁點解現時有咁多劏房同籠屋吖？睇吓你管轄下嘅社會幾咁悲哀，住喺籠屋裡面嘅人生活得幾慘！安居才能樂
業，咁經濟先至有希望，社會才會進步，這個是全港市民樂於見到的事實！「貪曾」你明白嗎？過得自己過得人呀！
跟住這座微縮模型名稱叫『花籠』，創作者是這三位「蔡璧龍、何國添、趙斯靜」，通常哪些花籠都只會在舊式唐樓處搭建，其實這樣做是違規的，不過在六七十年代就非常普遍，家家戶戶都係咁僭建，用來種吓花養吓魚，擺吓雜物都唔知幾爽！而當時政府又懶得執法，咁咪間接助長了此花籠奇景囉
！現時「梁班子」上場話要立即取締喎，其實都覺得應該既，因為這些僭建花籠始終都有一定危險性既！不過就唔知政府怎樣入手清拆嘞！
之後帶各位欣賞呢座超大型寫實模型，佢就係作者「黎熾明先生」的精心傑作『摩星嶺木屋區』，我相信作者黎生一定花上了很多時間，先至製造出咁真實、咁神似嘅木屋區景況，模型內的每一個人物都好像有生命力，生活在這個微縮木屋區裡，日出而作，日入而息，整個木屋區內的鐵皮屋都有進行舊化，最令我歎為觀止就係作者加上了藍色燈光，當晚上燈光照射到木屋區處，使之現場氣氛更為相似，這座模型絕對是頂級之作！所以連相都要影多啲啦，好想留住此情此景咯！其實想多口問句您哋，有否住過木屋區呢？而小弟就有幸見識過啦，諗番起當時住木屋區都幾好架，最大優點就係風涼水冷嘛.........
這個『天台屋』模型亦都係「黎熾明先生」主理，不過今次加入倆位拍檔「李穗雯、陳慧姬」幫手，天台屋亦係多數建於唐樓頂層，而十居其九都係非法僭建，它們的命運同花籠極為相似，隨時都有被清拆的可能！天台屋普遍都係用鐵皮同木板搭建，最大缺點係夏天特別熱，冬天又好鬼凍，通常居住於此都以新移民為多。此座模型的仿真度相當高，令您有如置身於真實的天台屋裡，如果啲高官夠膽嚟住番一兩晚，感受吓此處嘅居住環境，體會吓人家的生活景況，咁都係一個唔錯的提意喎！
似乎作者「安泰」比較喜歡反映社會低下層民眾的住屋環境，此作品『雞寮( 七層公屋單位 )』是他的另一傑作，見他一絲不久的佈局，屋內每一件家具都做得精巧寫實，確令我感慨良多，雖然我未住過這類公屋，但記起兒時跟爸媽去親戚處拜年，就也曾見識過，這些單位面積通常只得幾十呎地方，就連煮食都要到屋外面，今晚食乜餸係人行過都知到，咁沖涼或洗手間都係設於公眾地方，認真唔方便，冇辦法喎，皆因六十年代貧苦大眾的生活環境就係咁架啦！
跟住為大家介紹嚟個作品名稱是『唐樓』由「黎熾明、吳強、莫展超」三位共同創作，單睇名稱看似普通，但欣賞過你就一定唔會咁諗，我敢講佢係全場咁多款模型裡面最靚最精緻，亦都係最為複雜嘅一座，它的內容亦甚為豐富，計有主題嘅唐樓，唐樓內仲有間名為咕哩工會，相當抵死，但似乎在這繁忙時段發生了火警事故，多輛消防及救護車於現場展出救援！
其他環節包括一架吊雞貨船「明記」正在西環碼頭落貨，而大批咕哩佬也在忙於搬運，把貨物搬上停在路邊的貨車上！而碼頭傍亦有位大叔正在釣魚，非常生動有趣！
另一方面街道上亦有很多車輛熙來攘往，熱鬧繁忙，人車爭路的情況隨處可見，這正好是香港的一小處縮影！作者亦於多處加上燈光效果，整座唐樓的室內、從唐樓伸展出來嘅招牌廣告、街道上的紅綠交通燈光、以致各大小車輛的車頭燈光，通通無一遺漏，使得整座模型看起來更為全神，無可否認那確係神級以上之作，值得鼓掌叫好！
這座由「陳鴻輝先生」製作的70年代香港徙置區模型，作品名為『回憶徙置區』，這作品可算是微縮模型的始祖，因為它早前已於多個展覽會中亮相，你又有否此記憶呢？今次再度欣賞到它，俾到我嘅感覺依然讚嘆不已，尤其是那座七層高的公屋，手工精緻度屬舉世無雙佳作，情景佈局方面還有已經絕跡江湖的熱狗巴、舊款藍色車身嘅警車、同埋接近淘汰邊緣的懷舊冰室，每樣事物都能瞬間鈎起我們嘅集體回憶，懷舊色彩濃烈，把當年徙置區的一景一貌完全展示出來，咁拍案叫好嘅作品梗係要Like爆佢啦..........
另外這個名為『回憶公園一期』的作品亦都是「陳鴻輝先生」製作的，以前係同埋回憶徙置區一併展示，今次就分拆獨立主題展出，但一啲都冇減低它的可觀性！現時公園裡的遊戲設施十分完善，耀眼繽紛的色彩，以及安全的軟毯，使小朋友在遊玩時格外安全！但今天看到此模型，作者令我完全回憶起小時候的公園情況，當時的公園設施非常簡陋，鐵鏈木板韆鞦、搖搖板、擒鋼架、乪乪轉及高高的生銹鐵滑梯！但即使係咁，我哋一樣從放學後便玩到歡天喜地，最終要媽咪嚟捉先至肯番屋企食飯，童年真係快樂！
這篇的微縮模型令我睇得認真投入，回憶良多！您們又有否此同感呢？
今次就講到呢度......仲未完還有一篇架.......Bye Bye.......
