2013 農曆新年記趣一大籮

 2013年2月6日~2月11日

 

農曆新年話咁快就過咗，大家有冇發到新年財呀？我就運氣麻麻，仲破咗小小財添！唔緊要啦，只要過得開心咪得囉，以下幾件是新年期間較為有趣嘅事情，現在就同大家分享.........

2月6日年二十六這天，囡囡最後一年就讀的幼稚園舉行新春聯歡日，所有家長都可以參與，各位同學都要帶備賀年食物一份供大家齊齊分享，同埋亦需穿著中國傳統服飾，睇吓囡囡幾咁醒神，佢仲同大家拜個早年先，祝各位大吉大利，蛇年快樂

所有同學於聯歡日都要負責表演一項節目，囡囡就被編排跳羽扇舞，都跳得幾精彩架，咁有幾得呀，齋講冇用，送條片過您哋睇啦：............
http://www.youtube.com/watch?v=JxHcmRrJzTk&feature=share

當所有表演完之後梗係有獎賞啦，就係大食一餐嘞，咁多賀年食品，睇吓佢哋個個食得幾滋味吖...............

之後再影多幾幅威水相，舞吓獅子頭，猜猜燈謎，咁就開心快樂預先同各位共賀新禧啦............

 

2月8日年二十八唔單只洗邋遢，仲可以行街街同埋食團年飯添，葵芳新都會廣場於新年期間設置了新春靈蛇大觀園，喺食團年飯之前遊覽吓又確係幾爽喎！

這裡除咗一般新春擺設之外，還有一個名為「八星報喜靈蛇展」，展覽館內設有八條身價不菲的七彩靈巧真蛇展示，當中仲有全球稀少罕見的《香蕉球蟒》首度在港矚目展出，預意祝願各位蛇年大富大貴「焦」氣勃勃....

2月9日年二十九，今年亦即是年三十晚，我哋都好耐冇行過花市喇，今年一於帶埋阿囡去襯吓熱鬧，皆因囡囡又係首次人生體驗，一係唔行，一行就要行個最大嘅維園花市.........

我哋中午12點喺天后站入口進場，揀日頭去行花市貪佢冇咁擠迫吖嘛，大家睇吓現場真係好熱鬧架！

最先見到係民主黨支聯會嘅6號攤位，佢哋今年主打嘅係快落台系列，「鬥快落台魚蝦蟹與快落台Tee 套裝」，單買一品都得，鬥快落台魚蝦蟹$38，咁有創意嘅產品唔買又點得，一於支持吓民主，派阿囡做代表畀錢，咁啱係卿姐做Sales，咁咪一齊合照囉............

跟住睇見有條友仔揸住枝咪企到老連咁高，原來係立法會議員張文光，佢喺度呼籲大家捐款資助支聯會起六四紀念館，咁有意義，即時諗起發生過而又真實嘅事件係要永遠記載，要作為日後的歷史見証，因此絕對係要支持！咁捐款呢個動作當然又係派囡囡做代表啦...........

另一方面民主黨前主席何俊仁就幫各位寫揮春，咁當然要捐款啦，啲快落台Tee 款式都幾搞嘢，哨牙仔同夢熊大師個造型都相當嘢笑喎.........

而社民聯攤位就加咗個木偶鼻畀梁先生，皆因木偶每講一次大話，個鼻就會變長一吋，咁希望佢以後講少啲大話，真心為香港人做多啲實事啦！囡囡見到捐錢箱，又話要捐款喎，真係小朋友唔知搵食艱難！之後都經過人民力量攤位，不過就唔見毓民喺度，本人對於佢嘅詞鋒都十分欣賞，尤其是鬧到啲所謂高官頭縮縮時最為過引！而公民黨前議員余若微亦都係於攤位處幫人寫揮春，如果想支持佢哋捐款就可以嘞..........

行完一輪政黨攤位之後，開始要輕鬆吓喇，阿囡就大豐收啦，又有蛇形吹氣

劍，再買埋小公主輕氣球添，呢次認真發達囉..........

跟住去到「麥記」攤檔轉吓個行運滾滾圓柱先，咁2013年一定金錢好運一齊來嘞..............


之後阿囡話好想食魚蛋喎，咁咪走去場內唯一的魚蛋檔買囉，都幾貴架要成$30蚊一碗，大概20粒左右，個咖哩汁都OK既，但啲魚蛋肉質就認真麻麻，完全一啲彈牙嘅感覺都冇，簡直可以話佢係粉蛋呀，淨係得阿囡食到津津有味既啫，因為佢勁鍾意食魚蛋吖嘛！食完魚蛋之後再行多兩轉，感覺人群越來越多，見勢色唔係幾對路喎，而行花市嘅目的已經達到，都係走為上著囉.............拜拜..........

2月10 日大年初一，阿囡一大清早就著得醒醒目目同我兩拜個早年，佢話恭喜發財.......利是過來，咁就利利是是啦，睇吓個傻妹笑到見牙唔見眼咁，所以話過新年啲小朋友就特別開心，有糖食仲有利是收吖嘛........

跟住過去婆婆處食齋，之後就出發去大埔豬永球屋企拜年，我哋係搭巴士往沙田，再轉乘港鐵去架，當途經沙田新城市廣場見到啲裝飾都幾靚喎，係一度粉紅色長長的中國傳統走馬花燈，配合巨大嘅紙蝴蝶飛舞於紅色玫瑰花間，唔順手影番幾張靚相又點得呢..........

靚靚嘅花花坐椅，最啱我哋何家三友合照架啦............

跟住仲有蝴蝶庭園同花花世界，有冇發現今次特別多合照呢！邊個咁幫得手，咪就係姐姐囉！

因為今日帶埋佢去拜年嘛，益吓佢收多幾封利是囉，咁佢又可以幫吓手煮飯，一舉兩得，何樂而不為呢..........


睇吓呢幅三個靚女於花間飛舞嘅照片，真係賣花讚花香，正到冇得頂呀.......

豬永球是住喺大埔村屋的，實用面積足足有700 呎咁闊落，所以近幾年「阿波羅足球隊」都喺呢處拜年聚會，豬兄屋企仲養咗兩隻可愛小動物，狗仔名叫「波波」同埋布偶貓「白雪」，兩個靚妹都好鍾意同佢哋玩，阿囡尤其喜愛「波波」.........

我哋男嘅就飲啤酒同攻打四方城，而啲媽咪就幫手包吓餃子吹吓水，今年都係預備咗盆菜、壽司及三文魚刺身，另外今年有新突破，搞搞新意思，就係星州好流行嘅撈起魚生菜，都好多工夫唔易整架，因為全部材料都要切絲，真係唔該哂豬永球嫂同埋姐姐嘅努力..............thanks...............

好嘞...1 2 3....今年大家一齊要撈起，個個都能夠撈到風生水起.....yeah....


2月11 日大年初二，今日要食兩餐開年飯，首先中午喺婆婆處食盆菜，夜晚就返爺爺度開年！


喺下午襯有多少空檔時間，而行程又會途經旺角朗豪坊商場，知到佢哋四樓平台會有特備賀年裝飾，咁又係嗰招，唔好錯過拍番幾張靚相先囉......


這裡充滿農曆新年節日氣氛，我們何家三友於「杜鵑雙囍亭」影番張全家福先，亭內會有兩個可愛宮女在旁侍你登上「凰」座，當坐過鳳座之後等你整個蛇年都能「旺」氣迫人！認真好意頭喎............


夜晚就返爺爺屋企食合家歡聚開年飯，今晚除咗美心Maxim's 福聚滿盆盆菜之外，仲追加了一客滿堂吉慶東坡元蹄，加埋爺爺親自下廚煮嘅茄汁大蝦碌、白切大肥雞、「發財好市」發菜蠔豉，仲有足料老火雞煲翅一大煲，相當之豐富，以上各款佳餚都非常好味，大家都食得十分開心，咁就順便祝大家食過開年飯之後，各位蛇年都順順利利、萬事如意、一本萬利、身體健康、生意興隆...........恭喜...........恭喜！