悼念311東日本大地震兩週年

2013年3月11日(MON)

 

今天是轟動全球的311東日本大震災兩週年紀念日，在2011年3月11日下午2時46分，就是大地震發生的那一刻，這也是日本地震觀測史上最嚴重，達到黎克特製9.0 的超強地震級別，逾10 公尺高的海嘯巨浪席捲東北、關東的沿海地區，長野縣與新潟縣、靜岡縣東部、福島縣等受到超強地震影響也搖晃
厲害，哪尤其是日本東北部地區受災最為嚴重！

而這場震驚全世界的大災難至今為止，已知奪走了1萬 5881 人的寶貴性命，2668人下落不明，因地震和海嘯而痛失家園，及同時包括福島核電廠事故被迫離鄉背井的人數，估計仍有31萬5196 人過著避難式的生活！
 

作天、今天、明天或以後，這些照片是從受災地之各處拍下，分別是震災當時，及至現今的對比圖片，311 大震災發生已屆滿兩年，許多受災地終於在兩年後將瓦礫化的城鎮剷平，在各方面的大力援助下，慢慢地邁向重建新生的美好景象！

而日本政府更呼籲全國各級學校、公司等，今天下午2時46分進行默哀1分鐘，祈求罹難者得到安息並為災區祈福。

311東日本大震災損失統計：

●死亡人數：1萬5881人
●失蹤人數：2668人
●受傷人數：6142人
●自殺等相關死亡人數：2303人
●災民人數：約47萬人
●目前避難人數：31.5萬人
●全毀或半毀建築物：39.9萬棟，受波及逾82萬棟
●瓦礫殘骸：2670萬噸
●損毀的基礎建設：4200條道路、116座橋樑、29條鐵路、29處堤防潰決
●經濟損失：16.9兆日圓
●重建費用：預計25兆日圓

以上圖片來源：news.nationalpost.com


所以話！當人類面對大自然無情的災害時，立即便顯得相當之脆弱和渺小，幾咁無助與驚慌，因此311 事件亦可以作為警惕世人的借鏡，要怎樣學會珍惜，珍惜寶貴嘅生命，多啲關心您身邊的每一位親人，珍惜同致愛親朋相聚的每一刻，因為幸福唔係必然的！

 

 

最後再祝願東日本民眾繼續振作！Don't give up！

 

 



新春群蛇出洞「台山、惠州」三天純玩美食團 Day-1 第二章「招牌蘆薈雞養顏宴、神秘特備節目 ~ 換車遊戲........頂佢個掣」

 

 2013年2月14日(THU) 年初五情人節

 

我們速遊完南沙十九涌海味街之後，時間差不多去到中午12：00，肚子都開始響號，咁就要醫吓個肚先，導遊華仔話即刻帶我哋去品嚐「招牌蘆薈雞養顏宴」，眾女士們聽到有關「養顏」兩字都十分喜悅，我就覺得任何有特色嘅地道風味宴都值得一試..........

喺車上冇乜嘢好做，不如就食吓零食啦，尤其係小朋友就食得特別開心！

 

 今日係情人節，康X都好識做，領隊Brian哥哥在車上派發情人賀卡一張給我們，仲同我咃玩猜小迷語送贈小禮物添，這個特別節目大家都玩得相當開心，尤其是幾位小朋友玩得特別投入，阿囡就喺張情人卡上寫下「我愛的爸爸、我愛的媽媽」，搞到我哋倆個唔使嗒糖都甜到入心..........

 架旅遊巴大概行咗20分鐘倒，就開始行吓又停吓，跟住就變成龜速前進，只見領隊Brian同私機大哥傾咗一陣，佢就向我們宣佈一個懷消息，話架車發生輕微機件故障，車速要減慢啲，不過冇乜大問題既，原本只需40分鐘車程依家就用咗接近80分鐘時間，架車終於爬到去餐廳喇，我們就係喺呢間「蘆薈大觀園餐廳」食午飯嘞，跟住就有理冇理落車食飯先，而導遊華仔就同我哋講，已經叫公司安排過另一架車趕嚟接我哋嘞，叫我哋放心食飯先！當時仲未知到這只是今天特備節目「換車遊戲」的開始咋..........

 

 

 我哋呢個團就問題天天都多架啦，所以都係食飽飯先最實際，首先飲番碗湯先，係餐廳嘅招牌「葛菜魚頭蘆薈花湯」，睇啲湯顏色咁深就知煲咗好耐，飲落感覺相當潤喉，味道都唔錯吖，之後就試吓隻「秘製特色蘆薈雞」，佢哋話啲蘆薈係有個GAP種植基地，而啲雞就會放養於蘆薈園基地裡面，等佢哋自由地隨處吃草、捉蟲、嬉戲、奔跑、追逐、格鬥，使得雞的肉質纖維特別幼細，脂肪分佈均勻，講到好似天下無敵咁，但食落口感都好一般啫，肉質就幾滑，雞味都幾濃，算OK啦，但係冇佢講得咁誇張囉...........

  

 

 其他餸菜包括「雪蛤養顏黃金蛋」，蛋都蒸得幾滑，睇個賣相以為好夠味，但其實就淡咗些少，「菊花松子西江鯇魚」酸酸甜甜都幾開胃既，「養顏蘆薈小炒」及「上湯時蔬」就普通過普通，冇乜特別！

 

以下幾味菜要嚟送飯確係一流，「家鄉特色炆洋鴨」薯仔相當入味，鴨就炆得好腍，「魚米之鄉」及「碧綠蘆薈炒魚青」屬於兩款青青地嘅餸，又別有一番感覺，「支竹紅燒河上鮮」我就較為喜歡濃口味啲嘅餸，支竹亦都係炆得軟腍，同條河上鮮啲味道好夾，不過同樣都係淡咗少許！

 

 跟住呢碟「茶皇燴海蝦」係送酒佳餚，啲海蝦好新鮮，肉質亦相當彈牙，仲略帶多少茶香味添，就連啲蝦殼都炸到脆卟卟，我就連啲蝦殼都食埋！真係勁好味呀.....，正所謂佳餚配美酒，我哋幾條友就係咁狂風掃落葉KO咗十幾枝啤酒，確係幾得人驚架...........

 

 

 

 另外呢五隻係早前喺車上預訂嘅石岐乳鴿，係阿華仔大力推介，每隻要 $38，記得前幾年去珠海玩都曾經食過，呢個價好似係貴咗啲，不過眾位團員都話好想食，出嚟玩唔好計較咁多啦，有時錢係要畀人賺既！一啖咬落去就感到啲肉汁非常豐富，皮香肉質幼嫩，貴啲都係值得既，另外大部份乳鴿肶差
不多畀倆個靚妹食哂，仲食到津津有味，認真識貨...........

  

 當飲飽食醉之後，導遊華仔就立即出現喺我哋面前，話架車仲未嚟到，要我哋等多陣添，咁都冇計啦，唯有四周圍行吓囉，咁啱餐廳門口有檔售賣菠蘿嘅攤販，睇真啲原來係神灣菠蘿嚟架，咁神灣菠蘿同普通菠蘿有乜嘢分別啦，神灣菠蘿產於中山的神灣鎮，是當地之特產，由於這裡背山面海，雨水充沛，土地肥沃，特別適宜菠蘿的生長，通常每個神灣菠蘿重約一市斤左右，較一般菠蘿細小，而特性色澤金黃，皮薄肉厚，最難得的是肉細爽脆無渣，甜蜜清香而無酸味！咁犀利......老闆妳今日發達喇，我哋風捲殘雲咁就KO咗十幾個喇，果真齒頰留香，味美非常！........好嘢..........

 

 

 

 原來神灣鎮唔只淨係菠蘿出名，其實仲有另外一種名物，就係神灣菠蘿包都係賣到出哂位，聽講話包裡面係藏有一啲神灣菠蘿粒，都係賣$10 一個，諗起都流哂口水，不過最終都係無緣嚐試到，因為在預訂時才得知做包師傅放春運回了鄉.........真係冇癮..........

  

 

其實「蘆薈大觀園餐廳」只係一間路邊食店，除咗用餐之外基本上冇地方好行，稍為有啲睇頭就係我們身後面呢個花圃，見阿領隊 Brian 好得閒冇嘢做喺度兩頭擺，咁就嗌佢幫我哋29 路大軍影番張大合照留底都好喔....yeah.... 

 

 

阿囡今日著到好似利是封咁靚樣，影多幾張相就在所難免架啦..............

 

 跟住足足喺度呆等咗成粒幾鐘，餘下行程都要被迫拖延，這是當時我們自己一雙情願嘅諗法，就在這時一架橙色豪華旅遊巴向我們迎面駛來，領隊Brian話係佢喇，我哋40人就即刻一湧而上，坐好之後導遊華仔同領隊Brian都即時向我哋Say Sorry，咁我哋都明白壞車佢哋都唔想既，閒話少講，馬上開車繼續行程，睇吓豬永球倆公婆依家坐得幾穩如泰山，等陣你就知！.........

 

 

 正當大家歡天喜地以為衰氣已過之際，突然間感覺到車速漸漸又慢下來，仲聽到車頭摩打開始變聲，唔係呀化.......又呢，架車只係行咗一陣咋喎，結果20分鐘後架車都要被迫停喺路邊，私機大佬落車嘗試修理，但見佢左睇右望，都冇乜搞過甚麼，就同我哋講架車係小問題嚟啫，可以上番車繼續行程嘞，當時心諗係咪架，呢鋪係今日第二鍋喇，咁在冇其他辦法之下，只好死死地氣上番車繼續前進囉！............... 

架旅遊巴快吓又停吓咁前行，即係好似啲阿公阿婆行一陣就要停低休息吓，之後導遊華仔再同我哋講一番似曾相識嘅說話，就係架車機件出咗少少問題，我已經聯絡咗公司安排過另一架車趕嚟架喇，各位不便之處，敬請原諒！之後架車就好似隻烏龜嘅速度爬到去一個休息站，所有團友都馬上落車鬆吓，去吓洗手間，跟住入咗呢間「LoYee 樂驛 」24L便利連鎖店逛吓，買番啲飲品同杯麵今晚做宵夜都好吖，因為聽華仔話今晚我哋入住嘅台山康橋溫泉度假酒店係冇便利店既，趁依家等車無無聊聊，咪個個都入番啲貨囉！.... 

  

就喺呢個時候望吓隻錶，差不多接近下午六點鐘喇，個個都等到好似長頸鹿咁嘅款，唉..............我哋仲要等幾耐呀...............

頂佢個掣...#XYZ#....我哋今日認真黑仔，先後已經換過兩架車，依家仲要再換第三架車，而重點係今日Lost咗嗰半天行程點算先？「康X」 你有冇搞錯...... 

遇上啲咁嘅事件我仲邊有心情講預告喎........
不過都要謝謝各位支持........下章再見.......

......Bye Bye...........

此文章曾於舊居中發表:http://blog.yahoo.com/andygundam/articles/page/1

新春群蛇出洞「台山、惠州」三天純玩美食團 Day-1 第一章「在情人節的清晨出發、番禺、南沙十九涌海味街」

 

2013年2月14日(THU) 年初五情人節

 

都好耐冇喺新年期間去旅行喇，皆因於這段時間出發總覺得唔係咁抵，同埋話哂新春假期，食同遊覽都會特別多人，好似要同人哋爭食咁，但今次決定行程是有一個特別理由，唔太善忘嘅您應該都記得，之前喺序章都講過，理由係今趟會有接近30位成員一齊共同遊玩(最後出發人數係29人)，仲差啲可以包起個團添，本人其實唔太喜歡跟旅行團架，因為總覺得走馬看花絕對唔係我鍾意飲嗰杯茶，不過今次有啲唔同，成29人一齊遊玩咁壯觀嘅場面又點少得我嗰份呢，因為熱鬧就係我嘅致愛！

今天係農曆新年的大年初五，亦即是西方情人節，於這天出發確係有多少特別意思，皆因我有大小情人陪伴一起，此刻感覺我的人生確實幸福滿載！

 

我們何家三友於清晨六點鐘就到咗巴士站，睇吓阿囡個款頭幾咁醒神，其實我都唔輸蝕架，剛剛睇完場歐聯大戰「皇馬vs曼聯」就要起程，我都覺得自己係夜鬼之中嘅夜鬼，愈夜就愈精神喎！

 

 

清晨時分成個巴士站都係得嗰小貓三四隻，我哋係趕搭06:15 開往沙田新城市廣場嘅第二班車，全車計埋我哋都只得五丁友，真係差啲包起成架價值過百萬嘅巴士添呀！

由於係清晨冇乜車道路非常暢順，未夠07：00已到達沙田，前晚領隊哥哥亦已經致電確認上車時間及地點，見仲有大概半粒鐘倒，就喺附近餐廳買咗個早餐，於等車期間可以慢慢嘆嗎！咁一會兒喬喬姐姐一家都嚟到，之後仲有隊長保羅李兩公婆同埋外父外母四人到達，於沙田上車的10位團員全部齊集，大家都相當準時..........好嘢.........值得一讚........

 

見兩個靚妹都咁醒目，梗係要影番張出發相留念啦........yeah.........

 

 吹咗一陣水見集合時間已到，就行前去約定的小巴站處等待，呢度都好多旅行團等候出發，之後07：40 旅遊巴到達，領隊Brian哥哥應聲彈出，跟住收集哂所有團友嘅証件核對，點好人數....OK，馬上登車出發..........

旅遊巴大約08：10 左右去到粉嶺港鐵站接埋其他團友，此間19名團員即時歸隊，陣容相當鼎盛的29 路大軍到齊，加埋其餘11位團友，這個新春「台山康橋溫泉度假村」三天純玩美食團正式啟動，接著就係向皇崗口岸進發！

 轉眼間就到達皇崗口岸，於皇崗香港關口出境係唔需要帶埋行李，只要帶備出境証件就可以嘞，阿囡話要自己試吓過關     喎.......睇吓佢個樣幾招積.......

 

 

話咁快就出咗香港關口，跟住旅遊巴載我們再駛前啲，今次落車過大陸關就要攞埋行李嘞，皆因過關後就要轉車，全體團員過關都相當順利，之後出到門口就見到「康X」 嘅大陸導遊華仔已經喺度等候，導遊華仔話畀啲時間我哋去吓洗手間，同埋有需要就換埋錢先，一切搞掂哂就立即登上這輛綠色戰車，出發去行程的第一個景點，就係番禺嘅十九涌海味街............

在車上例牌又係導遊華仔講笑吹水搞搞氣氛，因為車程都要粒幾鐘架，我哋今次嘅目的地名為十九涌海味街，即係話首先要經過18條河涌，華仔話這些河涌有的是天然，有些是人工開挖，從而用於引水灌溉，所以從車窗可目睹這18條河涌是大小不一！我們大約11:00 到達十九涌，華仔話畀45分鐘我哋遊覽此處，咁冇計啦，跟團就是這樣的了，我們下車之處可望見這條十九涌大橋，遠處岸邊亦有人正在垂釣！

番禺十九涌是位於廣州南沙區萬頃沙，是廣州的最南端，十九涌是最後一涌，再出去就是汒汒大海了。只得45分鐘遊覽，所以都要急步前進，從這裡直行前方就係十九涌海味街！

 

這裡風光都相當優美，沿途看見遼闊的海面卻又是水天一色的組合，岸邊更設有多個細小的碼頭，你可以乘船遊覽，也可租船出海釣魚！

十九涌海味街主要是販賣鹹魚等海味醃製乾貨，初步觀感地方唔算得好大，但實際唔知係幾大，因為我哋都冇太多時間去考究，咁只會選擇行一至兩段攤販見識吓就算囉！

 

這處是必影到此一遊熱點，雞乸咁大隻字寫住「南沙十九涌」，見咁多人影相，我哋梗係唔會執輸啦.......

 

另一條街有很多專門販賣蔬果乾貨的舖頭，啲食品真的種類多多，齋睇都覺得眼花撩亂，當我們正想行埋去襯吓熱鬧試食之際，「零食之王」豬永球先生已經神不知鬼不覺地完成了幾包食品的交易，我哋有見及此，咁就唔客氣喇，一湧以上瘋狂搶食，先講吓包白魷魚絲，都好有咬口同埋魷魚味都幾重，紫色嗰包係紫芯蕃薯乾，曬得好乾脆，但係味道就淡咗些少，最後係黃色香蕉乾，口感非常爽脆，甜味適中，所以我們一致通過香蕉乾係最好食既...

 

再嚟就係行吓呢間生果檔嘞，唔知南沙呢度係咪盛產香蕉嘅呢，啲品種又多而香蕉名亦十分趣怪，牛奶蕉大家都或者聽過，咁火龍蕉、貴妃蕉、過山香各位又聽過未呢？這次真係令小弟大開眼界，所以話讀萬卷書不如行萬哩路係啱既，增廣見聞吖嗎！.......

最後我哋都係決定唔買香蕉，因為老闆娘強力推介係$10 八個嘅番石榴，試食過都覺得好清甜爽口，跟住再買埋$10 七個水蜜楊桃，等陣間上車可以同眾位團員分享！

睇吓隻蛋見時間差唔多，唔繼續行喇，不如就搵個地方唞吓先，見呢間名為沙灣牛奶嘅舖頭個門面都幾得吓，佢哋仲標榜話係番禺特產「姜汁撞奶」即叫即做，100% 採用新鮮水牛奶，仲只係賣$7一碗，咁得意！就整碗試吓啦，果真奶味香濃軟滑，姜汁味亦足夠，的確唔錯..............

 

 

話咁快45分鐘就過去了，又係時候要上番車喇，跟住係食午飯嘅時間，我哋係會去品嚐今個Trip 的第一餐風味宴「招牌蘆薈雞養顏宴」，之後就有氣頂事件發生喇，想知係乜嘢事，賣個關子先........記得留意睇落去呀..........


下章再見..............Bye Bye

順便提提大家，今晚凌晨有場超強戲碼好波上演，咪就係歐聯16強淘汰賽次回合「曼聯」主場鬥「皇馬」囉，首回合雙方打成一比一，「曼聯」有個作客入球在手稍佔上風，預計「皇馬」今場會採取主動，但個人認為「皇馬」於90分鐘內未必能擊敗「曼聯」，所以我會支持受讓的「曼聯」下盤，估計
「曼聯」會順利進級8強，大家又同意否.........哈哈..........


這文章曾經於舊居中發表:http://blog.yahoo.com/andygundam/articles/page/1