2012年7月27日(FRI)
每年玩具界的盛事動漫電玩節小弟都一定唔會錯過，為何今年咁遲先出報告 啦，仲要係回顧添，原因係想等埋高達環球盃結果先至動筆，但係今年的有關報導非常有限，直到現在都未清楚戰果如何，所以都係決定唔再等喇，出住一兩篇先，日後如有新消息先再作補充！
一如往年，都攞到VIP證，不過今次唔使咁早到達，因為今屆大會為咗打擊炒風，決定所有參展商都不許售賣會場限定品，所以今天見唔到一大批南亞裔青年及女傭工出現，因此秩序非常良好，睇見排隊入場嘅朋友都相當快捷，但係聽聞啲參展商就鬼殺咁嘈，話旺丁唔旺財喎，咁就真係冇辦法架嘞，順得哥情失嬸意，大家立場唔同嗎！！！
都係嗰句；事不關己、己不勞心，言歸正傳講番個動漫節先，剛剛到達會展時，就逾見步驚雲哥哥喺度擺哂pose 咁歡迎我，近年Cosplay玩意喺香港繼續廣泛流行，更吸引大批年輕人參與，睇吓嗰幾個女仔搞到周身血咁，我真係唔知佢哋想點，唔好理佢咁多嘞，都係入場先...........
您哋仲記得早幾年前動漫節的重要角色是誰嗎？我好肯定話您知就係天下及玉皇朝兩大巨頭，而天下亦較之矚目，事關當時風雲漫畫的兩大主角「步驚雲、聶風」都相當吃香，每逢動漫節都必定推出多款限量Figures，引來大批粉絲捧場，更導致通宵達旦排隊搶購。但在今屆動漫節開始形勢上作出了改變，那就是近年興起得相當迅速的玩具屆新寵兒Hot Toys，還記得上年因排隊問題發生多多事端，最後要勞動到警察介入平息，所以今年唔多唔少都係因為它們以致禁止售賣限定商品。但它們始終都是今屆動漫節的焦點所在，因此Hot Toys 的攤位設計亦是會場之最，不論是綠色巨手或是雷神鐵鎚，都表現得獨特非常，現在就同大家一齊參觀吓啦！
從入口進去就見到即將上影嘅全新作品Robocop 的ED 209 機械人，仲有1/6嘅主角人偶Robocop ，舊作N年前睇過，所以對它都頗有好感.......期待電影！
近期美國英雄電影大行其道，因此Hot Toys 也在其攤位搭建兩個電影場景，其中當然是今年最受歡迎電影之一的復仇者聯盟，此場景帶出一幕各路英雄於國會大樓門前與宿敵洛基生死決戰之震撼場面，場景氣氛相當逼真，絕對是全場焦點所在！
鐵甲奇俠、美國隊長、雷神、變形俠醫、個個都是能獨當一面的超級英雄，現在聚集在一起戰鬥，我想這應該是今年最賣座電影是也.......
另一幕係蝙蝠俠 - 夜神起義的電影場景，今次再由奧斯卡得獎男星基斯頓比爾飾演蝙蝠俠布斯偉恩，其他主要演員包括飾演貓女郎塞琳娜凱爾的安夏菲慧，至於蝙蝠俠之死敵班恩則由湯夏迪飾演，場景中更添置多架新型嘅蝙蝠車及專用飛機，亦是相當搶眼佈置之處！
睇完兩大場景之後，又見到另一新作蜘蛛俠 - 驚世現身的展品，此電影基本係重拍第一集，但在造型方面有著嶄新的突破，值得ㄧ讚的是，特效場面的確精彩很多。因為今次蜘蛛俠換了男角，所以Hot Toys 也成勢推出1/6 全新蜘蛛俠Figures，會場內亦有相關產品展出接受預定！
另一接受預定的新產品為1/6 鐵甲奇俠MARK VII ，這款Figures 真的長出長有，越出越好賣，咁佢又確係設定與造型非常精緻，這亦是Hot Toys當中最成功的Figures之一！
這邊相係Hot Toys 今年重點出擊新作，1/4TH Batman 及 1/4TH Terminator Endoskeleton Collectible Figure ，比起1/6 Size 顯得更有質感，細緻度亦相對提高，真實感也大幅增加，絕對係震撼之作，不過價格亦相當令人咋舌！
接著是一些近年產品，在此不作多介紹喇，您哋自己慢慢睇啦.....
舊年的Batman & Joker 超逼真場景，近期又會再度推出的Joker 2.0 新版本！
睇完Hot Toys攤位之後就去到另一知名人偶生產商Enterbay 參觀，先睇睇佢哋主打新產品1/4 Size Terminator 2 T-800 同埋Rambo III ，又係精心設計之作，頭部雕刻十分細緻，亦相當神似，附件也非常豐富，不錯的產品喔..........
跟住就係1/4HD 版嘅 Batman ，淨係頭雕都附有四個，相當有誠意嘅產品，咁當然售價一樣咁有誠意啦，會場優先發售價HK$2788@........
佢哋另一出色作品1/4HD 版嘅Joker ，一樣係配件多多，頭雕出眾，比起Hot Toys 嘅Joker 2.0 版確係有過之而無不及，令人期待的產品.........
Enterbay 的另外多款1/6新產品，美國籃球名將Kobe Bryant、一代武打巨星Bruce Lee 李小龍先生、在肌肉線條方面顯得相當真實化，頭部表情亦刻劃細緻，相當唔錯的出品，最後仲有電影MIB 3裡面的兩大要角，Will Smith 韋史密夫及 tommy Lee Jones 湯美李鍾斯，每個售價HK$1180 - $1380！
Enterbay 攤位內更展示多款1/6 舊作給各位參觀，計有「貓王」皮禮士利、「教父」阿爾帕仙奴、「魔盜王」尊尼特普、「星球大戰」盧克‧天行者及古巴革命鬥士捷古華拉等等，每個都係獨特而有個性的產品.......
之後又轉到另一玩具代理攤位參觀，知唔係Kotobukiya 壽屋囉，近期超人氣嘅鐵甲奇俠佢哋都將會推出，這款名為極合金Iron Man MK III 產品，原型設定係由香港名師邱福龍先生主理，負責設計製作的是林凱恩先生，此商品定價為日幣14490 元，好興奮能夠見到有本土原型師的作品登場，不過始終覺得尾水咗啲啲囉！但係本人都會支持佢哋架，尤其是邱福龍先生........yeah.......
同樣係極合金惡靈戰車 + 騎士本體，原型設計製作都係林凱恩先生，發售日期未定，惡靈戰車主要關節部分使用合金製成，重量和質感十足，搭配惡靈騎士更顯倍添魄力！
The Incredible Hulk 新變形俠醫套裝盒蛋，雕刻手工精緻，細部清晰，絕對值得收藏.......
還有其他特定產品，如Q版三一萬能俠、巨靈神、會場特別優先發售的全隻金碧輝煌勇者王、仲有電鍍Q版索斯機械獸紅、藍兩色亦都係會場優先發售！
攤位內仲擺設了多款以美國漫畫英雄為題材的暴力熊公仔，我就冇乜興趣嘞，唔知您又點睇呢？
跟住就被呢一堆精美的人偶所吸引着，係呀....又係佢哋呀，近期熱爆嘅美國超級英雄人物囉！今次係輪到環球UML HOBBY 館所生產的獨家手辦模型，佢哋係會生產兩個版本，會場展出為精裝版同埋即時接受預定，每款售價為HK$688，另一版本為普通模型裝，要自行上色，所以售價較為便宜HK$388，但係見到個Batman樣版就唔多對路，手工認真麻麻，同埋最差就係完全唔可動，真係比起其他生產商差咗啲囉.....認真失敗......
咁又唔係衰到貼地嘅，幸好其他幾款「復仇者聯盟」系列人偶都做得相當出色，尤其是Iron Man Mark VII 更為出眾，金屬質感方面表現一流，人偶的動作亦表達得流暢，確係唔錯，次之為變形俠醫的綠色巨人，面部表情及身體肌肉線條都非常細緻，亦可能係Hulk是主角中的主角，所以特別受人注意，再數到就係美國隊長，姿態同雕刻都相當入神，其如雷神同鷹眼都有番咁上下水準，算係攞番多少分數架啦..........就講住咁多先.....Day 1 仲未完架.....有興趣嘅朋友遲啲再傾過
...............Bye Bye
...............Bye Bye
沒有留言:
張貼留言