港島大坑「龍也 Ramen Tatsuya」日式拉麵店

2012年10月21日(SUN)

 

一年前在大坑開業的日式拉麵店「龍也Ramen Tatsuya」，並非傳統的拉麵連鎖店，在日本全國只有富山一間店，屬家庭式經營，老闆名叫石黑龍也。而這間香港店的另一位老闆是有一半日本人血統，曾長居當地的洪先生與石黑師傅共同開設，於開店初期石黑師傅親自到店舖調味試教，使之風味更為地道，「龍也拉麵」賣點是日本富國田舍風味（鄉郊風味），做法非常講究，特點味道清淡無味精，叉燒亦不會採用腩肉，而係改用肉質肥瘦分布平均的豬脊肉，口味感覺清新。這回主理人石黑龍也師傅又派出大徒弟石崎師傅過江駐港坐鎮，將這碗富有健康風格的拉麵完全帶來香港！

  

龍也拉麵位於港島區的大坑，這天是過開海順道拜訪它們，原因係望吓呀囡個Look 你就發覺有多少特別，係呀....囡囡化哂妝仲set 埋頭添，皆因這天早上要去柴灣參加跳舞比賽，喺未講食之前，就順便報導吓比賽情況先........

舞蹈比賽場地是位於柴灣的青年廣場，是第九屆「德藝雙馨」中國文藝展示活動香港區舞蹈比賽，當中的西方舞組比賽，小公主舞蹈學院各區分校都有排出隊伍參加，咁呀囡就代表坑口分校出賽.....yeah......加油呀........

晨咁早...星期天早上09：00 到達比賽場地，老師快手快腳幫參賽的小朋友化妝及Set 好頭，咁喺比賽之前梗要做番啲熱身運動先啦！

之後就輪到老師同佢哋排練吓隻舞啦，睇吓個個都精神旺盛，充滿信心.....Yeah.....

大約10：45就排隊進場，囡囡參加的是西方群舞組的幼兒B組，這個組別有八隊參賽隊伍，囡囡嗰隊係排第6出場，好嘞.....輪到佢哋比賽喇.....努力呀！

她們的參賽舞蹈是「精靈大小姐」，睇吓佢哋演出幾咁精彩，真係非常之落力.....抵讚......

不過落力唔止淨係佢哋，精彩的有別人更加精彩，所以結果呀囡嗰隊就攞唔到前三名囉！只能獲得嘉許證書咋！唔要緊啦，比賽玩吓啫，努力啲下次嬴番咪得囉，今次就當作吸收經驗先囉.......


好快咁就講完個比賽喇，即刻返呢講番正題龍也拉麵先，我哋大約兩點鐘到達，不須排隊立即有位，望吓個菜牌較為簡單，只有白、金、黑、紅及火龍五款拉麵選擇，仲有幾種和風小菜及可追加的材料，囡囡話等佢嚟揀喎！

感覺上龍也都是一間小店鋪，我們最初被安排坐吧枱，但係發覺呀囡唔係好合適，因為佢唔夠高食嘢，之後等到大枱的客人食完，我哋即刻轉枱，皆因全店只得一張可坐六人的長方形大枱，其餘三面都係吧枱，大概16位客人就會全店坐滿，店內裝飾同一般日式麵店冇乜分別，大同小異！

龍也拉麵的特點是強調不用味精，食得健康，牆壁上仲貼咗張提示，教你最正確的進食方法，等陣間再同大家詳細解釋，今期特別推介清新口味紅龍拉麵，係豬骨湯底加入新鮮蕃茄蓉，屬近期超人氣之選........

我最終選擇了黑龍拉麵 $85，事關個人對黑蒜油特別鍾愛，每款拉麵都會跟上三種配菜，九州長浜拉麵的傳統食法都相當有趣，當拉麵上到枱時先喝兩口湯，至湯剩低8成倒，加入打磨過的芝麻粉及原粒芝麻，再食到只剩6成左右，再加入日本生切紅薑絲，到食剩4 成時則加入辛子高菜。最先是香，然後是清香帶辛味，繼而是辛辣口感，味道循序漸進，日本人對於品嚐美味真的非常講究。而每款拉麵都會跟細樽汽水一支........


至於太太就Order 咗白龍拉麵 $79，純豬骨濃湯底配以秘製义燒、溫泉玉子，木耳、蔥花及紫菜，比起我的黑龍拉麵相差不遠，黑龍只係多加入了黑芝麻蒜油，其他配料相同，湯頭味道香甜濃滑，义燒亦燜得十分軟腍，厚度適中，入口即容，非常好味，至於麵條質感屬爽口不膩，傳統九州長浜拉麵是麵長且幼，他們找來香港的日本拉麵工場為其特製麵條，也會因應季節而調整麵條的粗幼度，整體質素都非常滿意，但最美中不足之處就係麵湯唔夠熱，這點希望他們日後能夠多加注意！

兩碗拉麵三個人食點會夠飽，所以就追加咗兩款招牌小食，首先係綠蔥义燒$ 38，一碟三塊厚身义燒，面頭鋪上白芝麻照燒汁，搭配上算完美，但义燒可能過於大塊及厚身，食落感覺有啲韌，這是唯一不足之處，另一款小食係秘製豬肚$ 25，豬肚煮得軟硬適中，再灑上香蔥與白芝麻，醬汁略帶酸味，開胃非常之餐前小食，直得推介一試...........

囡囡都話好好味呀.......yeah........

埋單$250個大洋，因為要收加一服務小費，最後又係指定動作，咪係店內留影囉！開業一週年的龍也拉麵，現正舉行拉麵感謝祭，於星期一至五惠顧，午市可享八折優惠，再送滋潤蜂蜜柚子茶一杯，啱食嘅朋友，千萬唔好錯過喇！

呀囡連店舖門口都唔放過，話要影低佢喎..........真的給她吹漲......

整體總結：湯底香濃厚滑，义燒軟腍，麵質彈牙爽口，價錢與質量成正比，唯一缺點係碗麵略為唔夠熱，這點店主應多加留意！

龍也拉麵地址：香港大坑京街16號地舖
我的個人評分會畀：80分........嘻嘻.........下次再見.......拜拜 

 

 

 



她的到來 ~ 快要5個年頭了(今年的第100 篇文章)

 2012年10月18日(THU)

唔經唔覺....這篇已經是今年內的第100 篇文章了，好想寫啲較為特別有紀念價值的事情，想了一回，不如就講吓我兩心目中最重要的人，她已經來到我們身邊快要5 個年頭喇，係呀....佢就係我哋個寶貝囡囡詩漫喇，其實我兩都冇任何宗教信仰架，不過都好想同個天講一句，多謝您給與我們這一份咁真貴的禮物，真心非常感謝您......... 

 

當每年這個月份見到文具店及玩具舖都擺滿各種萬聖節玩意時，這就代表囡囡快要又大一歲了，10月尾出世的她今年5 歲大喇，不過就越來越有自己嘅主見，咁即係越來越唔聽話囉！唔知係未現在啲食用較充裕，啲小朋友確實比以前醒目好多，依家真係個腦轉得慢啲都會畀佢哋考起..........

 

好嘞....都係唔好撐咁遠喇，講番囡囡啲近況先，唔知點解佢特別鍾意行超市架，上圖係佢前幾日喺超市影嘅，認真係搞搞震，冇幫襯，皆因萬聖節來臨，喺度扮鬼扮馬，古靈精怪，不過又都幾搞笑喎.......

囡囡喺小公主舞蹈學校跳舞都有一段時間喇，經過老師差不多一年的觀察，覺得詩漫較為好動，會係跳爵士舞比芭蕾舞合適，所以近期詩漫已經換上新的爵士舞衣，其實詩漫自己都話鍾意跳爵士舞多啲.....好......囡囡妳喜歡就得嘞.......繼續努力學習.......yeah.........

較早前報導過的2012年度小公主大匯演暨頒獎典禮，現在送上的是小公主舞蹈學校Facebook裡上載的照片，咁我哋就從溫一吓當天的盛況啦，大會邀請了兩位嘉賓裕美姐姐及彭紀諺哥哥連同小公主眾位學員載歌載舞表演，囡囡都有份與他們同台演出架.........

以下係今日新鮮滾熱辣嘅消息，今天係西貢祟真學校( 小學部 )嘅校運會日，太陽島幼稚園亦被應邀出席參與親子接力賽活動，詩漫同我都有參加呀，比賽結果暫時唔話畀您哋知住，現在就先欣賞吓比賽嘅實況及精彩連環圖片先，真係估佢唔到囡囡都跑得幾快喎，睇吓佢只係輸啲啲畀身邊嗰位男同學咋，之後爸爸接力跑去終點.........結果？？？

嘩...嘩...嘩...冠軍終於誕生啦，我同囡囡詩漫在K-3 組別勇奪冠軍，賽後由祟真小學部校長頒發金牌畀我哋呀，詩漫好開心呀...yeah...yeah，好興奮的囡囡仲學啲運動員咬吓塊金牌添

囡囡好喜歡劃圖畫架，所以都有喺社區中心上幼兒畫班，上圖下面嗰四幅就係佢較近期的作品，睇佢確係有所進步，上邊兩張係參加每月的填色比賽，分別得到8月份主題「開學了」的冠軍，9月份主題「中秋節」的冠軍，囡囡話好想繼續攞多啲冠軍，因為冠軍會攞到20個印仔，啲印仔係可以用來換小
禮物架......哈哈......

最後帶各位睇吓囡囡的成長歷程，這張是她的1 歲生日照片，睇吓佢收到禮物個樣幾開心，之後就同囡囡分享佢嘅人生第一個蛋糕，阿囡生日快樂...


囡囡兩歲生日就同佢去海洋公園慶祝，起初佢都玩得好興奮架，夜啲之後就猛鬼出籠，到處鬼聲鬼氣，皆因係萬聖節吖嗎，所以囡囡話好驚喎，仲不時喊喊添，最後梗係提早離場，都係等囡囡大個啲先再帶佢嚟玩過，我想這天應該係阿囡有生以來最難忘的一日了........... 

2010年囡囡3 歲大喇，亦都開始番學了，仲有就係參加咗佢嘅第一個萬聖節同樂日，阿囡係扮演小黃蜂，睇吓個扮相幾咁可愛呀..........


囡囡4 歲生日人大咗連個蛋糕都要大啲喎，佢特別喜歡食朱古力味蛋糕架，這年萬聖節她扮演魔界小魔女，仲四周圍搞事，喺公園同其他鬼怪小朋友玩得非常投入添......

最後充心祝福全家人身體健康，尤其是係囡囡要開開心心過著每一天，永遠快快樂樂享受妳人生的每一日.......永遠祝福守護妳的人........爸爸及媽媽

係咪感性咗小小呢.......哈哈.......Bye Bye



2012 香港動漫電玩節回顧 Day1 後篇「BANDAI 官方高達模型大賽」

2012年7月27日(FRI)

 

每年動漫節必睇嘅主要項目必然係高達模型王大賽，當見到各方模友的精心設計、獨特精巧的手藝及超強的情景設計，真係令我嘆為觀止，但今屆型式上作出了改變，連活動名稱都變更為「GUNPLA Builders World Cup 2012」香港區預賽，將分為少年組、公開組及團體組三個項目，前兩組的冠軍將代表香港遠赴日本參加總決賽，唔怪得知咁小這方面的比賽結果公報啦，原來如此，所以今年的勝利者可以係話冠軍中之冠軍，使命重大，要為港爭光呀！

 

 

每年的參賽者都會各出奇謀，用盡方法去表現自己，這座台場新貴「GundamFront 東京」真係搶盡風頭，情景佈局及模型製作手工都非常了得......佳作喔......

 

BANDAI 除咗搞模型大賽之外，每年都會有新產品售賣的攤位擺設，但又係依然故我，平均價格比起外間高昂，所以我絕對唔會幫襯佢架，做個精明消費者吖嗎！

 

以下是本人認為較特出的一些參賽者作品，現在就等大家靜心欣賞！

 

依稀記得這台好像是得獎作品，如有搞錯，請多多包涵.......

 

四年一度體壇盛事奧運會，高達都話要參加埋一份，襯吓熱鬧喎！

 

真係非常多有創意嘅作品，今年水準亦有番咁上下，所以話呢！嚟行動漫節唔須要一定有嘢買架，有時欣賞吓人哋用心製作的模型作品，都係一件賞心樂事呢架！

 

參觀完眾多高達模型作品之後，就見到Hasbro孩之寶攤位前有柯拍文出現，仲有兩位性感靚女喺度擺哂Pose 咁畀您哋影相，咁梗係飛撲過去睇吓乜嘢環境先啦，原來佢哋推廣緊新變形金剛商品，仲係全亞洲區首賣，不過都要成千二銀，好在本人對Hasbro嘅美玩不甚感興趣，始終感覺佢哋啲產品比較太過玩具感重，欠缺一份真實感，都係日系玩具啱我多啲！

 

咁唔啱買都可以睇吓嘅，佢哋攤位內亦展出多款1/4 Size 柯拍文同大黃蜂非賣品，只供參觀，圖下方嗰個柯拍文真係製作得相當有氣勢，確實係一件絕佳的展示品！

 

今年超人氣的商品，復仇者聯盟內的幾名主角公仔Hasbro都有發售，Size 分別有6" 和 3"，這回他們亦有三款會場優先發售產品，係兩款蜘蛛俠與宿敵蜥蜴人，每款賣HK$189.9，都係嗰句，睇吓就算啦........

 

跟住又係被鋼鐵人Iron man 吸引了視線，這攤位名為KidsIogic，佢哋即將推出一連串Iron man 系列Q版Figures，展覽品睇落都幾有質感，一項幾特別的新系列產品，我想都應該有佢哋嘅市場價值嘅！

佢哋嘅另一產品Street Fighter街霸人偶Figure，面部表情都做得幾迫真，更有一身發達的肌肉，這些產品正在監修中，仲未有得賣住，喜歡他們的朋友就要等吓啦！

KidsIogic 仲有一件超強產品在其攤位展現，產品名為CBC雅典娜真金東映特別版，製作原型師係Ray Wong，售價為HK$2000，限量200個，據聞已經售罄，這裡還有其他幾款星矢星座產品展示，星矢迷又要破財啦囉，幸好我就免疫嘞.......

睇到呢度時間都唔早啦，所以就速速離開，不過我唔會就咁算數架，我會喺最後一日展期再去參觀架，因為仲有LEGO攤位仲未睇吖嗎...........
咁就講聲....Bye Bye......下次再見.....