西貢橋咀島生態半天遊 (part 2) 瞬間隱藏的步道(連島沙洲)

 2011年11月6日(星期日)

眼前就是神秘的連島沙洲，它是由沙石構成的沉積地貌，將島嶼和大陸連接起來，通常形成的地方多數位於狹窄的海峽，連島沙洲主要是由礫石構成，將橋咀洲與橋頭連接起來!!!!
 

何解稱它為瞬間消失的步道呢，因它在潮退時，遊人先可以沿著沙洲步行至對岸橋頭，當潮漲時會被海水浸沒(一般水位高於1.4米)，如果大家要登上橋頭遊玩時，請先留意不同時間潮汐漲退的水位變化，呢喥有個由天文台發出的潮汐預報時間表，供遊客參考!!!

 

唔講咁多哪，要馬上感受吓連島沙洲的魅力，在步道上回看沙灘的景色，又是別一種景象喎!!!

另一面石灘有人架起帳篷，仲有幾個人跳落水遊玩，睇見佢哋玩得真係痛快......

 

囡囡可能有啲潔癖，成日行行吓話隻拖鞋入咗好多沙，好唔舒服要立即幫佢清理，真係冇佢乎......

 

囡囡突然注視到有人喺喥掘野，咪八吓卦行埋去睇睇!!!!


原來有人喺喥掘蜆，嘩...睇吓啲蜆都幾大隻架，多口問句你哋掘咗幾耐先至有咁嘅收獲呀?佢話有快有慢睇你好唔好彩啦，佢哋掘呢兩盤就用咗一個鍾頭，咁都Ok喎，下次我都要嘗試親自掘吓蜆嘅感受至得.....

繼續行吓..........

又停低望吓.........

一條細長狹窄泥路夾雜著大小不同的礫石，就產生了現今的連島沙洲景觀，大自然的力量真的不可思以!!!!!!!!!!!

這裡釣魚郎到處可見，但係又見唔到佢哋釣到魚喎!!!!!!!!!!!!!!

囡囡手執礫石同大家Say Hello~~之後就將礫石掟咗落海，佢話好好玩喎......

兩母女坐喺石上嘆世界....呀....係嘆風景至真......

沙洲對岸連接住橋頭的橋咀郊野公園，這個牌坊係熱門影相位置，睇吓呢幾位來自內地的哥哥姐姐影得幾投入，咁你又知人哋係內地嚟，因為都有幫佢哋影合照，仲傾咗幾句計.....咁咪知囉!!!!

好嘞....現在開始要上山哪，繼續向下一個美景出發........go! ..........go!! ........go!!!

待續........................



西貢橋咀島生態半天遊 (part 1) 向橋咀洲出發

 2011年11月6日(星期日)

橋咀洲離西貢市中心僅15分鐘船程，這是西貢地質公園區內的其中一個景點，島上最出名有兩大景物，其一是有「菠蘿包」之稱的石英二長岩，以及只有在退潮時才可步行通過的連島沙洲！

~話時話，往咗喺西貢咁耐，都未去過橋咀洲，真係有啲唔好意思，這天大人突然心血來潮，話不如同個女出去行吓~~好~~咁就立即起行向橋咀洲出發!!!!我哋就喺西貢碼頭搭藍色旗仔嘅駁艇過去，中午出發有半價優惠每人$20來回....正呀

睇吓今日天氣幾晴朗，好理想的郊遊日!!!!!!!!!!!!

咪睇船長大叔坐得好正經咁開船，中途佢突然起身走去攞條毛巾抹汗，見佢左抺吓、右抺吓、前抺吓、後抺吓，都抺咗半分鐘有多，連呔盤都唔理，可能佢藝高人膽大，但都幾危險不過又幾搞笑喎.......

囡囡都睇到眼定定，唔係講嗰位大叔，係海上啲美麗風景至真.......

都唔駛20分鐘船程，話咁快就到達橋咀洲碼頭!!!!!!

碼頭左邊有個康文署轄下嘅泳灘，不過都見唔到有人遊水，聽講話水底下面有好多蠔殼，如果要遊水就要小心啲哪!!!!

約在一億四千萬年前的「白堊紀」時期，香港經歷咗一系列的火山爆發，當時有一座直徑超過二十公里的巨型火山坐落於西貢一帶，以糧船灣為中心，證據顯示橋咀洲現在的位置，可能就是當時的破火山口邊緣，在島上可找到多種岩石，包括火成岩及火山沉積岩等等!!!!!

在碼頭附近的火山角礫岩，它是由猛烈火山爆發，把大塊的岩石炸裂成細小的棱角狀碎塊，冷卻及凝固後成為現時的火山角礫岩，這些岩石顯證橋咀洲可能就是位於當時的火山口邊緣！

一億四千萬年後的今天，見證囡囡踏足這片歷史地段.....橋咀洲到著.....

媽咪話囡囡睇吓.....遠處就係連島沙洲哪.....

 

一條荒廢了的石橋墩，好啱情侶或三五知己坐喺喥吹吓水!!!!!!!!!!!!

好.....再向前推進，即將進入瞬間隱藏的道路，香港版的「天橋立」步道.....我話嘅...哈哈!!.....

 

待續....................

 



King Ludwig Beerhall 德國餐廳 2011「尖東店」

 2011年11月12日(六)

今次同大家介紹吓德國餐廳 King Ludwig Beerhall 尖沙咀店，地址喺尖沙咀梳士巴利道港鐵尖東站地面32號鋪 ，隔鄰就係中間道停車場，都好容易搵到.....
 

餐廳門外都擺設咗幾張檯，都唔明白啲老外特別喜愛坐喺門口出面，可能係習慣咗露天茶座仲有得曬埋日光浴掛.......

 

我咃Book咗2:00─4:30嘅Tea Buffet，每位$148，要收加一服務費嫁!!!!!

 

中午1:45到達餐廳，好快就攞埋位坐，見仲未係好多人時，就帶大家周圍睇吓餐廳啲裝飾..

入門口右手面係一張長方型大餐檯，都可容納十幾人一齊進餐!!


牆壁掛上很多格仔旗好有德國feel 呀!!!


直望右手面係幾個三面卡位，如果係五至六個人就最啱嘞!!

呢喥係陣間攞豬手嘅地方，認住上面有杯吹氣大啤酒，牆上面仲掛咗個野豬頭，等陣唔好行錯呀........

如果唔係開大餐嘅話，可以過隔離飲吓啤酒吹吓水，happy hour 至到夜晚8:00 啤酒好低飲!

昏黃偏暗帶點柔和嘅燈光，好有feel嘅感覺坐得好舒服....讚!!




餐廳一角擺設咗張好古典華麗嘅鏡檯!!!


吧檯好大擺放咗好多各式各樣酒杯，睇見都想飲多幾杯........飲勝........


首先飲碗南瓜湯先，濃郁帶有清香甜甜的南瓜味.....幾開胃嘅湯水....正

冷盤食咗啲...灼蝦...螺...青口...味道都是淡淡的，不過啲料都幾新鮮......過得去啦!!!

 

跟住第一時間就去排隊攞豬手同德國香腸，雖然Tea Buffet 人數都幾full吓，但都只係排3-4個人就攞到....yeah

登....登....主角(豬腳)出場..燒焗德國鹹豬手，睇見都流哂口水啦.....


師傅手起刀落...已很純熟且快的刀法續一把豬手解體，就快到我哪...


隔離位師傅就正在忙碌地燒香腸，好香噴噴嘅味道呀!!!!!


首輪攞咗三款腸仔同一隻豬手，其實Tea Buffet 只得三款香腸，最好味係左面幼幼長長最唔起眼嗰條，次之係右上方粗粗肥肥嚟條，腸皮有啲韌好似司華力腸咁上吓，至於最差係中間

嗰兩條，味道遍淡好一般，豬手就鹹味適中，皮脆肉嫩，口感非常，配上茄汁、芥末一起進食，可將食物的味覺更加提升...冇得頂呀......


其他仲有沙拉Bar，可隨意揀選適合自己口味嘅沙拉，但本人對沙拉的興趣麻麻，所以沒有嘗試.....sorry
 

還有多款不同口味的麵包.......又係忙記咗冇食到....唉!!!!!!!!

 

仲有呢碟煙燻唔知乜嘢魚，鹹鹹地又幾有咬口，加啲檸檬汁食都算幾好味!!!!
 

多款布丁、慕斯蛋糕、各式鬆餅、任君選擇.......

 

食番兩杯甜品中和吓先，紅梅布丁、芒果布丁是也....好正

 

跟住發動第二輪攻勢，成隻豬手連埋豬骨，如此佳餚點可以唔飲啤酒架，Tea Buffet 係包一杯飲品，所以我哋都order 咗啤酒，不過只係得盧雲堡一種選舉仲係細細杯，幾啖就飲哂，咁點得呀......

 

之前聽友人話德國麥啤酒好得，咁咪即刻攞個餐牌睇吓.....嘩.....happy hour 好抵飲喎，Maisel's Weisse(1.0 Ltr) $102 正呀，立即order 咗1.0 Ltr ，睇吓連個啤酒杯都有型過人.......

 

侍應生好好人仲同我哋分開成0.5 Ltr一杯，杯麥酒嘅顏色比起普通啤酒較為深色，好似竹庶水咁樣，一啖飲落去...噢...麥味相當之濃郁，又唔會澀口，真係冇得頂，你說甚麼乜乜盧雲堡、青島、女人(藍妹)通通企埋一邊，唔係同你講笑，咁跟住更係大杯酒大塊肉啦.....係咪流哂口水呢....yummy...yummy

 

再嚟係廚師即煮蕃茄煙肉長通粉，睇落好簡單材料煮成嘅通粉，其實一啲都唔簡單，非常新鮮嘅蕃茄味，好有田園氣息的感覺，加上廚師嘅好手藝，本來已經大半飽的我們，都可以瞬間把它成碟清倉......利害.....yeah

最後甜點係雪糕巴夫配朱古力單球雪糕，巴夫內裡有紅梅及士多啤梨雪糕，好幸福的感覺呀......

 

其實本人對於餐廳的要求不只在乎食物嘅質素，對於餐廳的環境坐得舒適與否也很重要，所以我對 King Ludwig Beerhall 都十分滿意，再講係德國菜在香港是非主流菜色，講真它們又確實做得不錯，有興趣的朋友不妨去嘗試吓吖.....

 

因為友人有會員咭，所以有15%折扣優惠，埋單五百幾銀，三人每位$170非常抵食，會員咭可以即場申請(http://w4.kingparrot.com/index.php) 惠顧集團旗下任何一間餐廳均可使用，都有成十幾間架.............後會有期........拜拜