2006件10月24日
本次關西日本行主要目的是和太太一起去追蹤紅楓葉，出發前不時上網留意紅葉情報，恐怕到時錯過紅葉滿頃時間，另一方面又驚啲楓葉唔夠紅，心情確係十分緊張，但最後總算好運，所見的紅葉開放度都有90%或以上，我倆亦滿意非常............
一大清早就由大阪搭乘JR去到京都車站，當第一眼見到京都車站的感覺，真的非常科幻及時代感，皆因聖誕節將近，遠處還轟立了一棵巨型的聖誕樹，為這車站增添了不少節日氣氛...
京都車站咁有時代感梗係要到處參觀吓啦！
最緊要影多啲相喎，從車站高處望過去的京都塔，在晴空高照下又確是格外美麗喔！
現時正好是賞楓季節，但今天人潮唔算多，之後走到京都車站旁的巴士站搭巴士，都唔使點排隊，馬上有巴士開出，我哋在清水阪落車，原來大部份人都在這站下車，跟住再沿路步行上清水寺，如果唔想行的話，可考慮請這位車夫效勞，看他的動作是多麼的友善呵............
我哋用咗大約15分鐘時間，就來到京都的第一個重頭景點，眼前突然紅光一照，被列入世界遺產的京都第一名寺「清水寺」就轟立於面前，齋睇個門口已經咁震撼，心急的我們立即買券入內拜訪啦！
睇吓清水舞台這裡幾咁香火鼎盛，但其實我倆都不信神佛，所以沒有做任何動作，不過始終一場嚟到，就跟啲日本人飲吓清水同淨手囉！
登....登....登....各位觀眾......這裡就是指定拍攝萬眾觸目的清水舞台最佳位置 ，呢個景象係咪好似喺某某雜誌見過啦！
從另一個角度去觀看清水舞台，是否有唔同的感覺啦！
清水寺是京都最古老的寺院，建於公元798年，佔地面積13萬平方米，清水寺為棟樑結構式寺院。正殿寬19米，進深16米，大殿前為懸空的「舞台」，由139根高數十米的大圓木支撐。寺院建築氣勢宏偉，結構巧妙，不用一根釘子。寺中六層炬木築成的木台為日本所罕有！而現存之清水寺為1633年重修的。
音羽山清水寺網址 : http://www.kiyomizudera.or.jp/
之後順路來到這座名為「地主神社」參觀，這裡是祈求良緣的好地方，如果摸埋呢舊「恋占の石」就會更加靈驗，今日到此一遊更係唔會失手勢啦！
跟住見到大批日本民眾排哂長龍等飲寺水，我哋唔得閒同您癲，搵間路邊烏冬店灘唞吓咪仲好，咁就即場發生了第一次於野外紅楓葉下品嚐日式烏冬，仲要係盤膝打坐，好有日本Feel呀........yeah......yeah
離開清水寺就沿著二年阪及產寜阪方向推進，沿路兩旁都是古色古香的木屋平房，亦有不少食店林立，我們一路觀賞紅楓葉，食吓雪糕、嘆吓熱烘烘嘅燒餅，真係人生一大樂事！
轉眼間就來到高台寺，高台寺是京都東山一帶的名剎，寺內的傘亭、時雨亭茶室、靈屋、觀月台等是名勝景觀，而高台寺春季櫻花和秋季紅葉的夜間燈飾觀賞，是聞名的京都絕景之一，高台寺也是日本國家重要文物。我哋就冇機會睇夜間燈飾景觀！不過轉吓呢一排幸運輪都可以得到祝福架.......yes.......得咗！相關資訊 : http://www.kodaiji.com/index.html
紅葉亭園映照落水中的倒影，就配合成這般奪目的景色，真的如詩如畫！
之後就來到建造得非常宏偉的「知恩院」，正如門前個木牌所寫，知恩院的創始人為法然上人，寺院建於平安末期，是京都的寺院群中規模最大，1621(元和7)年修建的三門為日本最大的山門 ，而知恩院每年於除夕夜會由17位僧呂齊力撞響院內的大鐘，此大吊鐘重達70噸，高3.3米，鐘鳴渾厚悠遠，響徹齊個古剎京都的夜空，這活動已成為除夕夜不可或缺的節目喔！我哋冇入去參觀呀，喺門口拍些照片就走啦！
位於四條通大街盡頭的「八阪神社」，據考證八阪神社的名稱由明治維新1868年起至今，朱紅的西門樓閣，是現存日本最大的石牌坊鳥居，以及是日本國家重要文物的祗園造建築樣式之正殿等為主要觀景點。不過今天這朱紅色門樓正在修輯用布蓋著，所以冇緣相見！這一連串東山寺廟群都拜訪過，啲紅葉情況只可說係可以，不過下一個景點就唔同哪，保證令您滿意！
馬不停蹄，只需用行的方式，就到咗下一個賞楓名所「南禪寺永觀堂」，日本人稱它為「紅葉永觀堂」，看見這麼多人就知它名不虛傳，難怪我如此興奮莫名呢！通往南禪寺的街道兩旁的楓葉已經「見頃」盡放，綠中有黃、黃中帶橙、橙中見紅、紅內有透深紅，層次感非常鮮明.........嘩.........正呀！！！
穿過這扇「遊心門」就代表到達永觀堂哪， 講番南禪寺的中門東側有座22米高的三門，如登上三門樓遠眺京都市內風景，更是風光無限！南禪寺內還有很多具有代表性的日本庭園，其中國寶大方丈庭園，被稱為是江戶初期的枯山水庭園的表表者，更並被指定為日本國家名勝！
而寺內還設有數間茶屋和京都著名的湯豆腐店，非常值得造訪架，入鄉隨俗、入廟拜神，又跟隨啲本地人吸收吓爐煙，好似話可帶來好運與祝福架！
拜訪完南禪寺之後，時間大約是四點半左右，見仲未天黑，不如去埋近近地嘅銀閣寺吖，咁就即刻搭巴士過去囉，大概兩三個站就到達，當時都未夠五點，但個天已經開始黃昏，見一場嚟到，就入去走轉啦，但事後先知這個決定是錯的！
當行咗10分鐘倒，天色就全部黑齊，心諗有冇黑得咁快呀，雖然銀閣寺亭園都有打燈，但微弱非常，四周都漆黑一片，此時乜嘢心情都冇哂，求其影幾幅相就走人，認真冇癮！
最後搭JR返回大阪，於梅田地下街食咖哩飯做晚餐，雖然這是一間細小店舖，又唔起眼，就連店名我都唔記得，但係咖哩飯係我的最愛，圖中這碟是特色羊肉咖哩飯，較遠處是碗薄切牛肉飯，煮得認真好味，食後有滿足的感覺，立時心情靚番哂，跟手仲買埋超甜草莓做夜宵，今日都可算是大滿足的一天了！
明天預告：會遊覽京都洛西嵐山風景區及金閣寺，請留心欣賞............
