關西「京、阪、神」深秋紅葉八天自由之旅 Day-2「空中庭園、四天皇寺、通天閣、品嚐河豚、四天皇拉麵」....重新修定版本....

2006年11月23日

 

一早起床吃過簡單早餐後，就馬上行過去梅田SKY BUILD 參觀，因為我們買咗兩套(OsakaUnlimited Pass)大板周遊卡2000円，而周遊卡內付送多個大阪市觀光景點票，係完全無料「免費」.......碓係好抵用架！

 

而這個梅田SKY BUILD 就是其中之一，因它就在酒店的不遠處，所以今天第一個景點就選中佢囉！

 

SKY BUILD 係樓高40層的兩座大樓，中間有個圓形的建築物就是空中庭園，在地面望上去十分之壯觀，如果要上到最高的空中展望台，就要依靠這兩條天梯啦！

 

我們直達庭園的展望台，在這裡更能觀看大阪市嘅大部份景觀，不過這處風特別大又凍，所以停留的時間唔多，跟住好快就離開走人咯！

 

在SKY BUILD地下有個名叫「滝見小路」區域，聽講話好有江戶時期氣氛，咁就入去打番個白鴨轉囉！

 

臨離開前仲參觀埋這處的聖誕特備德國市集，都係 Look Look 冇嘢買到！ 

 

之後就搭地下鐵到天皇寺站，又畀我哋發現這個地區特色渠蓋，步行咗5分鐘就來到日本佛法最初的「四天王寺」！

 

四天王寺係免費參觀既，寺內建造了多個美輪美奐的日式庭園擺設，魚池內的肥大錦鯉也相當活躍，地方唔算大的四天王寺好快就行完，睇吓手上隻蛋已經中午時分，又要諗吓食乜嘢啦！

 

離開四天王寺後搭地下鐵到動物園站落車，再由動物園前站通過這條橫丁名為(加嗯加嗯橫丁)，這一帶的建築物和店舖都十分古舊，一遍下町(貧民)嘅光景，從窗外望進去見到好多「歐巴桑」在下將棋，可能這就是下町民眾的日常消遣啦！

 

通過了加嗯加嗯橫丁，再直行轉多兩三個彎，很快便來到新世界通天閣地區，遠處嘅就係模仿巴黎埃菲爾鐵塔建造的高達 103 米的大阪象徵塔............通天閣！

 

 好......搵個地方食晏先，其實冇特定食乜，不過見到呢處好多間食店都有呢味嘢賣，見到佢就有啲衝動，咁就搵咗條命去博，學人胆粗粗第一次食河豚！而日本最好食的河豚便是這條名為虎豚，牠大約有接近兩隻手掌般大小，我倆就點了河豚火鍋及鐵板河豚燒午餐，份量洽可，火鍋湯底是用清湯，這樣更能帶出河豚嘅鮮味，在心驚胆震之心情下吃完，但感覺味道都不太特別，咁多人話佢好味可能係夠胆嚐試有份英雄感啩，我就話見識過就算啦！日本人兄唔使對佢又愛又恨係嘛！「溫馨提示」：日本大部份食市在下午四時前入坐都有午餐供應，價錢是晚餐的一半左右，所以這餐用了5500円左右，都可以接受既.......

 

 食飽不如做番啲運動，就係行吓附近嘅天皇寺動物園，又係貪佢周遊卡包埋，都好多種動物睇架，咁又消磨咗一粒鐘時間！

 

 之後又過番去通天閭，見到呢檔燒章魚丸有人龍喎，店前又有大量讚好相片，忍唔住口又落疊，咁一份燒章魚丸吖，啲照燒汁好好味，確係比香港的出色！

 

 Festivalate﹝盛節門遊樂園﹞有部時速高達100公里穿梭室內外的過山車，咁架勢唔玩都睇吓啦，呢張照片係我自己認為拍得幾有水準的作品之一...............

 

晚間亮起燈飾的通天閣，燈光的顏色是會不停地轉換，非常之有睇頭各位同意嗎？咁當然又要登頂啦，皆因都係周遊卡包埋，通天閣內有一尊福神，如果想行番個好運，就要埋去摸吓佢啦！hea咗半粒鐘左右就離開，跟住搭地鐵番道頓堀行夜街...

更多通天閣資訊請到: http://www.tsutenkaku.co.jp/

 

 喺行夜街之前又要做一個動作先，咪係食晚飯囉，今晚揀咗食我的至愛日本拉麵是也，而四天皇拉麵道頓堀店係我嘅選擇！日本的拉麵店通常門口都會設置一部售賣機，任由您自助選購喜歡的麵款，非常之簡單方便！我點了招牌义燒拉麵豬骨湯頭，另加一隻玉子(糖心雞蛋)，豬骨湯頭睇落相當肥膩，但味道香甜濃郁，一啲口乾嘅感覺都冇，好味程度可達五粒之多，值得為大家推介..........

四天皇拉麵網址 : http://www.shitennou.jp/

 

 跟住就行吓愈夜愈精彩嘅道頓堀，赤鬼又係賣燒章魚丸嘅大阪名店，道頓堀極樂商店街及大阪標記大叔是可以買到很多手信的地方，我哋都買番多少唔好失手勢嘛！

 

 這間食蟹專門店日本到處可見，其實我哋都會去品嚐，不過唔係今晚，遲吓再為大家分享！此處心齋橋道頓屈的指定固力果燈飾夜景怎能錯過！

 

今日真係玩得非常攰，要趕快返回酒店休息，因為明天就開始京都觀賞紅葉之行！

 

........待續........