隨心隨意獅城七天聖誕自由行「出發準備篇」

2013年12月20日(FRI)

 

 

又幾個月冇出 Post 啦，原因我諗大家都清楚，咪就係搬屋囉，唔係住嗰隻喎，係要從即將摺埋嘅 yahoo blog 將啲網誌轉移過來新屋，都咪話唔煩呀，經過一輪努力，終於都搬得七七八八！揀今日出新屋的第一份 post 其實冇乜特別原因，只係想預先送份聖誕禮物給您們，如標題一樣，何家三友的聖誕旅行，就索性來個新加坡「獅城」七天聖誕探索遊啦！

原來新加坡聖誕節期間啲機位同酒店係非常、十分之緊張，好在我哋醒目，於兩個多月前就已經 book定哂，如果唔係依家就煩啦！今次旅遊冇乜定下行程表，而主要目標景點有新加坡環球影城、S.E.A.海洋館、馬來西亞樂高樂園Legoland等等，因為是會順道探親，所以會享有免費導遊及多晚千呎祖屋住宿！但都會豪吓入住一晚聖淘沙名勝世界的節慶五星級大酒店！http://www.rwsentosa.com/language/zh-CN/Homepage/HotelsAndSpa/FestiveHotel








而必食之地道美食就有以下的目標選擇：辣椒蟹/胡椒蟹、海南雞飯、肉骨茶、叻沙、咖央多士、串燒沙爹等等，今次一定大飽口福啦！




雖然話在兩個幾月前已經搞掂哂啲機票同住宿，但都係攞到CX嘅凌晨機位，所以今晚就要搭凌晨01:30機，所以現在要把握時間休息吓先，唔講咁多啦，返來再同大家分享啦！


最後祝何家三友旅途愉快.......拜拜........



 

2013 太陽島教育基金「第29屆聯校畢業典禮」

 2013年7月10日(WED)

今天是囡囡自出世以來的一個都幾重要嘅日子，三年的時間話長唔長、話短亦唔算短，回想起囡囡第一天著上整齊校服，滿臉笑容地精精神神回到學校，還很有禮貌的向老師校長講聲早晨，充滿學習好奇心的她，很快就能溶入幼稚園環境裡，每天都享受著愉快的校園生活了............


三年的幼稚園課程直到今天終於要劃上句號，冇錯啦各位，今天就係阿囡嘅畢業典禮大日子啦！太陽島教育基金「第29屆聯校畢業典禮」將於灣仔「伊利沙伯體育館」舉行，今次係會有11間分校聯合慶典，之後仲會因應典禮主題「彩色世界」而分別演出自創舞蹈，咁精彩嘅文娛表演稍後再為大家獻上！


因為囡囡都要演出，所以一早就跟學校老師來到場館，先作化妝及最後演練，我倆就 2：00入到會場，睇吓望落去真係人山人海架，要搵阿囡都幾傷腦筋架，好在最後都搵到佢，原來阿囡一早就望到我哋，仲同我哋揮手添喎！


當所有出席嘉賓及校長就坐之後，2：30 畢業典禮就正式開始，首先全場人士起立，由嘉賓與校長一齊帶領全體學生唱出校歌！


跟住就請主禮嘉賓田北晨先生致詞，身兼港區全國人大代表、立法會議員及新民黨副主席的他果然名不虛傳，口水多過茶，一噴就嗡咗接近30分鐘，搞到我倆差啲瞓著，田北晨.......你好嘢！


就喺阿田生吹水吹得興高采烈之際，台下已經有一班小朋友正在列隊，準備等陣間上台接受獎項，聽聞阿囡又有份喎，睇吓開心得佢個樣吖！


當囡囡喺校長手上接過畢業證書那一刻，就代表三年的幼稚園里程告一段落，囡囡好叻呀！仲攞埋個「豬肉獎項」操行獎狀添.........好嘢！


一輪頒獎禮完畢後就由學生代表獻花給兩位主禮嘉賓，跟住就到三位學生代表用不同的語言讀出畢業生致謝詞，當初囡囡都有份候選講致謝詞「廣東話」，不過最終都落選，冇緣上台致謝各位老師同校長添！
 

之後就輪到整個畢業典禮的畢業生文娛表演時間，係會由各間太陽島分校輪流演出他們自創舞蹈，首先出場係元朗分校，表演項目名為「扇中紅花開」，極富中國色彩嘅舞蹈，看著多把紅色羽扇在學生手中飛舞，確實艷麗非常，場面亦夠哂熱鬧！
 

跟住就到東涌分校表現，舞蹈名稱是「粉紅派對」，只見眾多位小朋友打扮成紳士淑女般，在場中跳起優雅的社交舞步，令場面華麗奪目！

接住就到囡囡的西貢分校出場，他們今次表演的是活力十足嘅舞蹈，名為「熱力節拍 Orange Power」，剛好同上隻舞蹈有著強烈對比，睇吓佢哋嘅服飾亦相當狂野，舞步也極富動感，所以令到全場觀眾都睇得熱血沸騰，反應熱烈！

阿囡當然係跳得非常投入啦，有幾投入，齋講冇用，不如就加埋條片過您哋睇啦...........請收看：http://www.youtube.com/watch?v=OVVOEb1ap1

跟住係港灣豪庭分校表演，名為「快樂花園」的舞蹈，她們的打扮極盡巴西嘉年華氣息，更為大家送上奔放的森芭舞步！

再嚟係卑路乍街分校，為大家演出嘅係「夏日熱浪」舞曲，夏日咁鬼熱梗係要去游泳啦，所以好直接連水泡都出埋場，認真貼題！

跟住就到葵景分校出場，所演出的舞蹈名為「浪漫紫醉夜」，男同學就負責玩樂器，女同學則負責舞蹈，分工合作，悠然歡樂！

接著就由葵涌分校表演一場雪亮的「夢幻白色婚禮」，這刻舞台於一瞬間變成教堂，而天真無邪的多對小新人正在此間舉行莊嚴而快樂的婚禮！

之後係輪到土瓜灣分校上場，將會為大家表演「華麗舞台」，這個舞蹈彷彿回到60年代的大上海舞池，他們的金光閃閃衣著與主題華麗舞台尤其配合，給與我們相當懷舊舞曲的感覺！

跟住就是非常富有科幻感的舞蹈登場，名字稱為「智能機械人」為我們演出的是油麻地分校，眾位同學們的純銀色服飾，再配以多具機械人模型，令演出加添幾分神秘感，未來時空亦即將來臨了！

到最後壓軸出場表演的是葵興分校，他們將會演出的舞蹈名為「舞動彩虹頌和平」，多位外籍小朋友穿上異國服飾，更友誼地共同起舞，亦希望世界和平，祝願小孩子每天都開心地成長，生活愉快！

就在「舞動彩虹頌和平」舞曲完結那一刻，會場上方就發放無數的碎紙粒，場內的小朋友個個都尖聲大叫，把整個畢業典禮的氣氛推上高潮，就在這混亂的嘈吵聲中，畢業典禮就此完滿結束...........


之後家長就分批落去大堂接回子女，睇吓囡囡幾有舞蹈家風範，而老師設計這套服裝亦相當了得，非常感謝她們這三年來對囡囡的教導和照顧，在此真的要再次講聲.....謝謝......


今日咁有紀念價值，而囡囡又打扮得咁醒精，梗係要同佢影多幾張照片啦，講真吖，其實最興奮嗰兩個咪就係我哋囉....


一條對於每位小朋友都要必經的學習之路，是那麼慢長及挑戰滿途，囡囡今天只不過是完成了最基本的人生學習四步曲之起跑準備，跟住迎面以來的挑戰將會越來越多，囡囡妳要更加努力，爸爸媽媽一定會永遠支持同愛護妳架................加油呀........

囡囡現正享受著充實及有意義的各項暑假活動，入讀的小學所提供之夏令營課程，社區中心的暑期特別班活動，到8月份就會上游泳初班，而8月尾亦會參與新生開學營，都相當忙碌架，而好動的囡囡就十分之期待啦........




時代廣場 ~ 迪士尼‧彼思「怪獸大學展覽會」2013

 2013年7月15日(MON)

迪士尼‧彼思 暑期動畫鉅獻《怪獸大學》已於7月11日在香港隆重上映，為配合電影宣傳，這所全球獨一無二的「怪獸大學」就決定於時代廣場進行開學禮啦！轉眼間露天廣場已經變身成一所「怪獸大學」，當你由氣勢驚人的校園大閘步入「驚嚇學院」的同時，應留心到校園的每個細節都全面「怪獸化」，這施佈置最能配合您跟一大班怪獸新生合照，如主角毛毛、大眼仔和「變色龍」蘭度寶基司等等！他們每個都是真人原大的模型公仔嚟架！露天廣場展期：6月21日-7月17日，二樓大堂：6月21日-7月21日 ~

身為「怪獸公司」的兩大最頂尖「驚嚇專員」，毛毛( 占士蘇利雲 )和大眼仔(米高華素基 )並非自出世就懂得嚇人、尤其是專嚇細路，這對拍檔好兄弟更非初相識就一見如故！今次這部《怪獸大學》就是特別為他兩個最受歡迎的角色而推出之「前傳」！《怪獸大學》故事係講述10年前，毛毛和大眼仔的大學時代生活，揭開這對活寶貝不為人知的過去！這對大學新生毛毛和大眼仔每天都在鬥個你死我活，但後來共同都要面對被趕出校的危機，因此被迫化敵為友，最終更成為一起出生入死的最佳驚嚇拍檔添！


各位《怪獸大學》攝影系嘅同學，今天老師將會派遣一份暑期功課，就是到來時代廣場展覽會，以特別打造嘅19 個大型3D 模型公仔為主題拍懾寫真作品，皆因呢19 個是全球獨家香港限定公仔，請盡情發揮您們的攝影天份啦！

此間的佈置真的充滿卡通色彩，七彩繽紛的花草樹木，配合美式校園格局，走進來確能令您感受到十足童話世界般似的！

新入大學就梗係要攞番張學生証先啦，呢度有多款証件樣本可供選擇！就在此時首先遇見這位同學，紫色毛茸茸的(ART) 他有著超長的雙臂與短小的身軀，看落非常搞笑，他的存在就像一道小拱門站立著似的，關於(ART) 的過去是一個謎，不過若兇猛起來嚇人的身手也是矯健非常，如捲成一個球體狀更可說是所向披靡添！

雙頭連體怪物泰瑞與泰瑞 (Terri and Terry) 這對兄弟共用一個身體，但思維是有不同的，咁兩人如何可駕馭一個身體呢？這點就要由大家自己去體會啦，不過這個特點也剛好適合用來嚇人囉！

史考特(Scott 'Squishy' Squibbles )同樣為怪獸大學驚嚇學院的新生，史考特是個十分害羞的男孩子，沒有自信的他時常成為同學欺負與整古的對象，及後得到「萬事OK」夥伴們的協助下，史考特意識到自己不只是躲在角落裡害羞的怪物，而是也有能力去驚嚇別人呢！

 蘭度寶基司( 變色龍 )他對於大學生活充滿憧憬，這隻外表古怪、十足一隻外太空變色龍的怪獸，一心打算考入驚嚇學系後就廣交朋友，吃喝玩樂，不過他必須要克服受驚時隨時隱影這個壞習慣，皆因如果別人當他透明，他又如何能夠成為一位出色的驚嚇專員呢？ 

 米高華素基(大眼仔) 是電影中兩大主角之一，大眼仔的畢生夢想就是成為怪獸公司的驚嚇專員，而且志在必得，充滿自信的他深信自己一定能夠夢想成真，他自小就已經心繫怪獸大學，一間全球最頂級的驚嚇學府，今天他終於如願以償，順利考入怪獸大學成為新生，準備大展抱負！一早已經精通驚嚇學歷史、理論和技巧，加上自信心爆棚，以及全情投入，大眼仔的超班表現明顯地拋離所有同班同學！不過，他的成功路上卻出現了意想不到的阻滯，最終他被迫與一班騎呢怪獸為伍，以及同一個唔多夾嘅拍檔組成同盟，發動玩轉怪獸大學的大行動呢！

 唐卡頓「唐叔(Don Carlton)」受到經濟不景氣所影響，來自中西部從事銷售業的怪獸唐卡頓，決定重返校園再作培訓，希望轉型成為驚嚇專員，身為怪獸大學的「超齡新生」兼「啱Key 會」的創辦成員，他以誠實苦幹，腳踏實地的作風，帶領社團成員專心一致向目標進發！

 

 跟住就輪到超級主角出場啦，佢就係占士蘇利雲 (毛毛)，講到驚嚇呢一個科目，毛毛絕對是天材，他生得大大隻隻，聲如洪鐘，加上出身自顯赫有名的驚嚇世家，要入怪獸大學驚嚇學系話都冇咁易！自信心爆棚的他踏足校園後，自恃有天份有背景，終日沉迷玩樂無心向學，結果好快就衰到冇朋友，前途幾乎就咁盡毀，最後他終於明白到要放低自我，與一眾騎呢怪獸齊心合力，才有機會盡展所長！

 

與咁多位新同學見過面之後，跟住就帶大家步向時代廣場的二樓大堂，這裡亦化身成「怪獸大學」的其中一間宿舍房間，入得這座學府的同學都要必修歷史課，所以各位同學請到展覽室內硏讀展出的《怪獸大學》概念草圖、角色草圖、美術製作圖，及幕後花絮片段等！
  

 Hello.....兩位同學您好嗎？ 

 各位怪大學生你必須要認識史上最強校友單眼青豆釘怪獸！這次展覽特別邀請全球藝術家創作出他們心目中的「大眼仔」，有來自歐洲、南美、日本、香港及台灣等20位藝術家的精心作品，保證是獨一無二的「大眼仔」！此間又可以到教學講堂參觀K教授授課，而K教授在怪獸大學裡主要是任教「驚嚇入門101」課程，在眾多的怪獸新生裡面，他必須選出最有潛質的「優獸生」！每年都只得數位能夠通過嚴格的考試，繼續進修精英課程！您又有冇興趣嚟同佢地一齊上課啦！

 

 另一方面在宿舍房間那處，大家亦可以參觀到大眼仔和毛毛在此苦練驚嚇絕技！而怪獸學員當中有一位最具天份的同學大眼仔(米高華素基) ，好鍾意對住面鏡練習嚇人表情，您都嚟學吓佢啦！

 

而宿舍的另一角最勤力的同學毛毛 (占士蘇利雲)，無時無刻自己都喺房間裡努力練習嚇人技倆，這處也是最熱門的拍照輪候區！
 

 等我搵多幾個不同角度，作一次360度的環迴拍攝，好讓大家睇得更加清楚，皆因佈置得那麼迫真的展覽場景唔係咁常見架！

 如果仲未去參觀的朋友就要把握最後機會啦，因二樓展場期限到21日止！

 

 怪獸大學全體師生齊集的全家福壁畫！

 終於都了解過怪獸大學的新生學習環境，在臨走時看見風頭躉毛毛仍然係最受歡迎的一個，他深得男女老幼愛戴，要與他合照的話就唔該排隊先啦！這次時代廣場搞的迪士尼‧彼思「怪獸大學展覽會」確係相當成功，不論展場內外的佈置都像真非常，尤其是那戶外學校園區更為出色，當您一踏足這處

，就仿如走進卡通故事裡的童話世界，樂而忘返呢！

當時代廣場的迪士尼‧彼思「怪獸大學展覽會」完結後，接著就輪到另一重頭展覽會登場，就係由7月26日起直至9月1 日整個暑假期間展出的高達模型展( GUNDAM DOCKS AT HONG KONG )，身為 Gundam 迷嘅我又點會錯過呢！但各位千萬不要忘記，真正暑假的重頭戲當然是7月26日起一連4日舉行的動漫電玩節啦，所以話啫呢個7月份真係特別精彩！

係咁先.....下次再傾過.......Bye Bye.....