吃吃浸浸台北礁溪聖誕行 ~ Day 5c「四圍堡車站奇幻餐廳 ~ 湯圍溝公園冇料足浴 ~ 電車男聖地萬年商廈篇」

2014年12月23日(TUE)

 

這是Day5的最後篇，品嚐過火山爆發雞之後，接著參觀就近的四圍堡車站奇幻餐廳，這是一間主題餐廳及古怪食品店，及後再折返礁溪搭火車回台北，候車期間走去湯圍溝公園嘗試浸吓冇料足浴，黃昏返回台北入住樂客商旅，增遊電車男聖地西門町萬年商廈，再行吓夜街掃吓路邊小吃，非常充實的一天遊就此完成了！

 

吃飽火山雞後便往礁溪路對面的另一目標景點「四圍堡車站」進發，實行來個一雞兩味，即係話一次車程，兩種不同享受囉！齋聽四圍堡車站個名不要以為這是個真正火車站，其實四圍堡車站是一間專門販賣古怪食品店，而店內設置了一處主題特定餐廳，其可觀性也高，等陣再同大家詳細詳講吓！店舖門前的不倫不類怪人站立於入口處，而怪人那賣相就嚇到這倆名女生手足都有啲失控！
 

 急不及待入內看個究竟，站內兩旁都是賣食品的店家，而屋頂上一排長長的鳥籠襯托著昏黃的燈光，我們彷彿走進了時光隧道，來到充滿魔法能量的學院呢！
 

 店內附設一處貌似西方中世紀的懷舊餐廳，平直的一張長餐桌，確令聯想起哈利波特電影裡面霍格華茲魔法學院的場景效應！

如想入內感受一吓現場氣氛，方法好簡單，幫襯買少許食品，就可以入去坐啦！ 



來個飯後甜點都好喎，於是漫妹妹要咗杯兩球雪糕NT150，可加添三種配料！

 我就Order咗杯奶油啤酒NT180體驗一吓，其實味道冇乜特別，只不過在啤酒面鋪上一層奶油泡沫，口感就油膩咗啲，睇吓我飲到嘔哂白泡就知啦！
 

 牆壁上的人像油畫亦都相當生鬼，屋簷下的白色貓頭鷹也在穿梭飛揚，像是對我們說自由可貴，要好好珍惜呀！

吃過美味甜點之後，又係時候說再見了！

 這是一款人氣商品，拐子骨麵包，完全即場製作，保證軟嫩Q彈口，賣相非常吸引，加上這位Sales姐姐的落力推銷，咁就把它收下啦！

收銀處的姐姐非常忙碌！

 

更詳盡資料請到以下連結：https://www.facebook.com/lanyangrailway

 參觀完「四圍堡車站」後即打的返回礁溪亦順軒買些少伴手禮，見離火車開行仲有啲時間，就走過對面湯圍溝公園hea番陣！

 

 公園周邊到處都是魚療足浴的店舖，不過是要收費的！
 

 如想享受冇料足湯，公園的中央位置就有喔！突然間心血來潮，很想浸吓這公眾足湯，可以同眾多礁溪街坊一齊浸吓腳仔，確係相當難得！

 睇吓我越浸越興奮囉，原來一大班人齊齊浸腳係咁鬼過癮嘅！
 

 迎頭觀賞著礁溪的天空，遠望那座奇形怪狀的建築物，此刻我在細味人生！

 終於要迎接黃昏的來臨，礁溪、宜蘭再見了，真的有點捨不得你們！

 17:40分開出的普悠瑪自強號列車將會把我們送回台北！
 

 個多鐘時間我們就順利回到台北車站，這時天已經全黑了，火速到樂客商旅Check in！

 房間是以白色為主，給人一種清潔舒適的感覺，印象中和捷絲旅的格局差不多，我們休息了一會，跟住又再次出動！

台北樂客商旅：http://www.lookhotel.com.tw/index.php

 首先去西門町的電車男勝地萬年商業大廈走番轉先，因為我也是一名玩具愛好者！

 

睇玩具漫妹妹梗係興奮啦，佢特別歡喜呢兩條仔喎，咪就係車仔同公仔囉.......嘻嘻....... 不過啲玩具價位比香港仲要高，所以只來個齋睇冇幫襯，實行運吓吉先，就係咁運到差啲出事！
 

 睇得太入神就忘記了時間，差啲唔記得仲未吃晚飯添，於是立即鎖定目標，target係呢間名為「阿毛」嘅意食餐廳，見佢門口有兩隻尋回犬做生招牌咁夠綽，就咁啦！選好餐點準備買票之餘，服務生小姐先同我哋講餐廳已經打烊，頂........唔早啲響，等我哋仲睇咁耐！
 

 望吓錶原來已經9點幾鐘啦，在冇乜選擇的情況下，最後揀了呢間Yes 58 意大利麵店，由上至下是我揀的茄火腿意大利麵，媽咪選的焗海鮮意大利飯，漫妹妹愛吃的Q版芝士腸仔Pizza！
 

 講真這店的食物味道認真油麻地，由於結合性價比都算恰可，今餐只求食飽，不求味道就是了！



餐後再於西門町一帶行吓夜街，看見四周小食檔林立，馳名的萬國滷味及素食千層豆腐，一向擁有大白鯊稱號的我又怎能錯過呢，一於來個宵夜大放送！

風騷的老闆娘話兩串火鴨腎計平啲NT50畀你，就咁啦，同我包起佢！NT30小份素食千層豆腐配麻辣醬，嘩.......麻辣醬果真辣到跳舞..........勁！仲有雙響泡嘅牛肉杯麵，飲料係礁溪帶回來的羅東養生杏仁奶，今夜的大白鯊定能超大滿足呢！

 

三日兩夜的宜蘭礁溪溫泉之旅亦都順利完成，現在身處台北，明天就會踏入旅程的第六日，亦都是漫妹妹非常期待的日子，就係再度探訪 Baby Boss 職業體驗任意城！

 

敬請留意播放時間..........謝謝收看！

 

 



吃吃浸浸台北礁溪聖誕行 ~ Day 5b「向左走、向右走的幾米繪本場景 ~ 見證火山爆發雞試食篇」

2014年12月23日(TUE)

 

今篇我們會繼續遊玩宜蘭幾米廣場的其他景區，如繪本場景「地下鐵」「向左走、向右走」及「星空」等等！跟住午餐就去品嚐礁溪名物「火山爆發雞」，聽落個名就幾過癮，唔知食落會係甚麼味道呢？想知就唔好行開......繼續睇落去啦！

 

 在宜蘭火車站旁右方的旅客服務中心，有相關的民宿旅館提供參考，突然決定想於這裡留宿是絕對冇問題的！

於旅客服務中心再向前行多一小段路，就來到幾米的另一繪本場景「地下鐵」， 這裡有大大小小、各式各樣的漫畫行李箱，非常QQ可愛，在這裡巧遇熱情的一對台灣夫婦，助我們何家三友給拍上紀念照片.....非常謝謝！

嘩........巧重呀這個行李箱，爹地快啲嚟幫手啦！

 

 出現於漫畫繪本中的對白在這裡也可以隨意找到《不知到為什麼，我總會在這裡那裡遇見他》！

 真係睇唔出漫妹妹又幾好力喎！
 

《星空》描述了一個關於長大的故事，有個少女認識了一個不說話的少年，他們都不是最快樂的孩子， 有一天，他們逃離城市，翻山越嶺，來到少女爺爺曾經住過的山中小屋，在山裡的夜晚，他們看到了最美麗的星空！ 回到城市之後，少女生病了，而少年不知去向…… 後來，他們到底有沒有好好地成長呢？

這個故事既單純卻又複雜，它單純因為這就是一個描述兩個人相遇之後又分開的故事，但它也複雜，因為這故事會讓讀者也走進書中的某個畫節，在某一句話上徘徊，並且回憶起自己的青春.......青春是多麼一言難盡的話題，人們不是說得太多而仍然覺得說不清楚，就是找不到適當的語言來表達因此只能無言以對，人們總是要到錯過了之後，才發現自己其實曾經擁有那種複雜的層次感覺！

幾米公園是截取自三輯繪本的圖像來真確呈現，分別是「向左走、向右走、地下鐵、星空」，並以《記憶片刻風景》為主題，期待旅客能和這片空間作互動，向左走、向右走的男女主角是否能在宜蘭再次相遇呢？ 
 

 Smiling fish 幾米的獨特繪風，顏色亦顯繽紛，繪本「星空」裡的男孩望著手受傷的女孩，名為星空幻想！我就話很像深海獵奇呢！

 而幾米長廊的盡處便是男女主角在繪本中「向左走、向右走」之場景，今天匆忙的告別，就是期望他日的重逢，真的希望她們能夠早日相遇！

人生中總有許多巧合，兩條平行線也可能會有交會的一天！

 我和漫妹妹也來個向左走、向右走步伐，但不同之處是我們很快便會合了！

 跟住來到最後的一個場景，繪本「星空」裡小男孩與小女孩一起等公車上學的巴士站！

 咁我們也一起加入啦！吓......等咁耐都未有巴士......唔係掛！
 

 巴士站旁有這台幸福明信片售賣機，如想幸福再得到加添，咁就要速速寄番張傳遞訊息了！

 同幾米相聚了片刻，終於又到別離時候，別過宜蘭後我們立即坐火車回到礁溪，再轉乘計程車向下一站進發！

 中午時分梗係醫吓個肚先啦，這家是在網上冇意發現的食店，聽佢個名確係勁爆夾抵死，所以今天就特定前來看個究竟，店名為「火山爆發雞」是也！從礁溪打的過來只需幾分鐘車程，相當快捷方便！

 這火山食店地方相當闊落及整潔，可能今天為閒日，所以店內客人不算多，只得三幾檯客，這也是我樂於看見的清幽環境！

 NT600的振店食品「火山爆發雞」參上，附醬料椒鹽各一碟及勞工手套一對！

 火山爆發雞一上到檯，濃烈的烤雞香味四散，這兩名女子都異口同聲地說，嘩......巧香呀！
 

 對礁溪名物三星蔥很是好奇，所以Order咗碟炒三星蔥NT200體驗吓，口感青爽同幾有咬勁，又夠新鮮幾好味，白飯是冇料任食，仲可加入豬油同醬油，香味濃郁的豬油飯雖然冇益，不過小吃也無妨吖！
 

 以下就等我同各位介紹吓爆發雞嘅食法，首先同隻爆發雞按摩吓先，等佢防衛鬆懈，咁即刻就要引爆佢，先爆翼、再爆腿、跟住爆埋身同頭，呢個咁爆嘅場面係咪好震撼呢？
 

 火山爆發雞是採用宜蘭的名種同安雞製作，加入多種香料於雞肚內烘烤！所以肉質也帶點燻草味，咬落口感嫩滑，金黃色的烤雞皮也很酥脆，果然唔錯值得一試，咁我就唔客氣了......全速開動啦！
 

 夠水準嘅食店當然要同佢來個合照啦，雞型手表揚吓佢先！其實礁溪除了「火山爆發雞」馳名外，還有「甕窯雞」「大灶雞」「台雞店」等等多間名店，數一數起碼有5 ~ 6家，現在的礁溪路給人一種錯覺，彷彿這裡就是窯烤雞大食街似的呢！

火山爆發雞連結：http://www.039870108.com.tw/